Отяжелесэ ютась эрзянь-мокшонь раськень кенярксчи
Эштё вейке покш кенярксчи ютась «Минь вейсэ!» од ломанень раськень культуратнень фестиваленть юрсо. Отяжелесь субутасто вастсь «Шумбрат!» эрзянь ды мокшонь раськень регионъютконь фольклорной праздникенть, конась Мордовиясо ютавтови тедеде уш котоцеде ды вейсэнди ламо раськень ломантнень – «Шумбратонть» вечксызь рузтнэяк, татартнэяк, удмурттнэяк, чуваштнеяк… Мелят покш чинь инжетнень вастсь Ковылкинась, сыця иестэ жо сон карми Сыре Шайговасо. Улить мельть келейгавтомс те раськень кенярксчинть ды ютавтнемс шабра регионтнэсэ, косо эрить ламо эрзят ды мокшот, тердтнемс омбо масторсо эрицятнень.
«Шумбраттонть» икеле Отяжелень Раськень культурань центрасо ютавтозель эштё вейке мероприятия – эрзянь ды мокшонь раськень регионъютконь общественной организациянь исполкомонь промксось. Панжизь сонзэ вейсэндявксонь прявтось Юрий Мишанин ды Отяжелень райононь прявтось Константин Николаев.
Юрий Мишанин кортась неень шкань вейсэндявоманть эрявиксчидензэ, а кунсоломс сеть ломантнень, конатне бажить совавтомс раськетнень ялгаксчинтень колавкст, аладямот, кортыть башка масторонь панжомадо. Тень коряс важодить омбо мастортнэсэ цела структурат, сынь чаракавтыть превть интернет-лопатнесэ ды аволь ансяк, бажить явомс эрзятнень ды мокшотнень, ансяк те зярдояк тенст а топавтови. «Неть минек государствань алкуксонь ятт ды сынст марто кодаяк а молема ве киява!» – тешкстась вейсэндявксонь прявтось ды ёвтнесь седе, кода ютасть Саранскойсэ РФ-нь Финнэнь-угрань раськетнень форумось (ловнозельть сонзэ резолюциянь сехте редявикс тешкстнэ) ды «Минь вейсэ!» фестивалесь, лия мероприятиятне, конатне важодсть сынст юрсо. Сынст ютавтомань васенце лувось – те патриотизмась, тиринь масторонтень вечкемась, кисэнзэ аштемась, кода теить минек цёратне спецоперациянь таркасонть. Эрзянь-мокшонь раськень вейсэндявксось истя жо а ашти ве ёно, исполкомонь члентнэ пурныть ярмакт, рамсить эрявикс оборудования, оршамо- ды карсемапельть. Невтемакс, Сургутсто Геннадий Наркаев ялганзо марто рамасть квадрокоптерт, оптической оборудования ды ускизь тей, штобу ильтямс минек республикань боецтнэнень «Сияжар», «Кавал» ды «Аралай» бригадатнес.
Райононь прявтось Константин Николаев поладызе Юрий Мишанинэнь те теманть коряс ды кортась исторической ледстнематнень ванстомадонть, се виев ялгаксчиденть, конась вейсэнди спецоперациянь участниктнень. Кадык тозонь пурнавсть ламо раськень ломанть, ялатеке цёратнень ютксо кеме кирдема, вейкень-вейкень кисэ аштема ды вейке мель – изнямс нацизманть.
«Шумбрат!» кенярксчинь участниктненень Константин Николаевич пшкадсь эрзянь кельсэ, сон тешкстась, эрзянь-мокшонь лиятнень ёнов а молиця культурась – те алкуксонь сюпавчи ды весенень эряви содамс ды ванстомс тиринь келенть.
Исполкомонть важодеманзо шкасто кунсолозельть докладт МР-нь Культурань, раськень политикань ды архивень тевень министрань васенце полавтыцянть Александр Карьгинэнь, исполкомонь прявтонть Татьяна Ларинань, Отяжелень райононь образованиянь управлениянь прявтонть Ирина Чапоргинань, исполкомонь Дубёнкань райононь местной отделениянь прявтонть Елизавета Бурнаевань (конась ёвтызе мелявксонзо Кобалесэ ды Кендесэ эрзянь велень школатнень пекстамодо), Оренбургсто НКА-нь прявтонть Михаил Кузьминэнь ды лия регионтнэнь представительтнень.
Теде мейле промксонь весе участниктне пуромсть Отяжелень посёлканть куншкакурос, косо пек мазый таркасонть, Андрей Первозванноень Храмонть вакссо, уш ушодовкшнось «Шумбрат!» кенярксчись. Келей сценанть лангсо морасть Россиянь зярыя регионсто сазь творческой коллективтне, ютксост Донецкой Народной Республикасто «Донбасс» киштемань-морамонь ансамбляськак. Моротне гайгсть эрьва кодамо кельтнесэ. Куншкакуросонть сравтозельть Мордовиянь ды шабра ёнкстнэнь кедьчелькев ломантнень выставкаст, Отяжелень райононь велетнень тантей пидевксэст-паневксэст, конатнеде мейле каванявсть весе инжетне, эйкакштненень теезельть налксема таркат, «Крошка» театрась невтсь спектаклят ды усксь сэрей някат.
Кенярксчинть панжизь МР-нь Правительствань Председателесь Дмитрий Поздняков ды райононь азорось Константин Николаев. Дмитрий Александрович, коень коряс, васняяк шумбракстнесь тиринь эрзянь кельсэ, ёвтась поздоровт Мордовиянь Прявтонть Артём Здуновонь пельде ды тешкстась: «Те кенярксчись пурнынзе Мордовиянь весе эрицятнень, Россиянь весе раськетнень, сон юты «Минь вейсэ!» весероссиянь фестиваленть юрсо. Ниле чинь перть Мордовиясь вастсь инжеть 51 регионсто, минь невттяно эсенек культуратнень сюпавчитнень, эсенек виенек... Зярс минь вейсэ – минь покш вий, ды минь изнятано!»
Правительствань Председателесь явшесь покш наградат ды казнеть. Мордовия Республикань Почетной Грамотасо казезель Отяжелень 2 № ПСШ-нь эрзянь келень тонавтыцясь Надежда Сигимова, Мордовиянь Прявтонь Благодарностьсэ – Нижней Новгородонь областень Лукояновань райононь «Лисьмапря» НКА-нь прявтось Марина Голодова, Саратовань «Шумбрат» вейсэндявксонь прявтось Валентина Кривошеева, Москов ошонь раськень культурань центрань прявтось Лидия Круглова, М.Е. Евсевьев лемсэ МГПУ-нь эрзянь ды мокшонь келень кафедрань прявтось Ольга Налдеева ды ламот лият.
Поздоровт кенярксчинть кувалма ёвтась истя жо эрзянь-мокшонь раськень вейсэндявксонь прявтось Юрий Мишанин, кона тешкстызе Отяжелень райононть покш таликанзо этнокультурной образованиянть виевгавтомасо, ды сон кармась паро невтевксэкс (примерэкс) лиятнень туртов.
«Шумбратонь» тешксэсь – штатолось ды Саранск ошонь тешксэсь – ривезесь мэрэнть Игорь Асабинэнь пельде максозельть Отяжелень райононь азоронтень Константин Николаевнень. Сыця иестэ штатолось юты Сыре Шайговав.
Торжественной пелькстэнть мейле ушодовсть алкуксонь эрьгелемат: морамот, киштемат, вастовомат, кутморямот, тантей ярсамопельде каванямот, позадо симемат. Эх, маштыть Отяжелесэ вастомо инжеть! Кода тешкстызь пурнавозтне, тесэ свал эрясть трудонь вечкиця ломанть, конатне аволь ансяк парсте важодеме – оймсемеяк маштыть. Куватьс эштё Отяжеленть велькссэ гайгсть кенярксов вайгельть ды «Шумбрат!» весенень содавикс валось.
Марина Девятова