Вторник, марта 19, 2024
Важное

«Демография» национальной проектэнть коряс Ромоданова посёлкасо аволь умок панжовсь «родничок» эйдень кужось.

Райононь куншкакуросо эрицятне, ламо эйкакшонь триця од семиятне ёвтыть покш сюкпря правительствантень те питней ды эрявикс казненть кисэ. Неень шкане тетятне-аватне а печтить стакачить эйдень кужосо таркань асатноманть коряс, эйкакшонь эштё вейке кужо стявтови Белозерье велесэ, косо ламо вишка эйкакшт.

Вана минь ардынек Ромодановань эйкакшонь кужонтень. Сонзэ мазычизэ неяви ве ёндо. Вастымизь кужонь прявтось Нина Николаевна Борисова. Сон тесэ важоди уш ламо иеть, секскак тевензэ содасы пек парсте. Те редявсь сеске, зярдо мартонзо ушодынек кортнеме. Сон мельспаросо ёвтнесь эйкакшонь кужодонть ды важодицятнеде.




Минь, мерят, понгинек ёвксонь масторов, тесэ мезе ансяк арась: эйкакштнень туртов искусственной пиже вельтявкс марто футболонь пакся, эрьва кодат нурямкат, озамо таркат, ардтнемань пандынеть ды лия мезе. Кужонть перька касыть эрьва кодамо тюсонь мазый цецят.

Тесэ вейке иестэ саезь сисем иес эйкакштнень туртов налксемань ды оймсемань весе условиятне, конат теезь пек вадрясто, кода мерить, неень шкань вешематнень коряс.

Совинек эйкакшонь кужонть потс, косо учость эйсэнек весе тонавтыцятне, воспитательтне, конатнень марто озынек ве столь экшс информатикань покш кабинетс ды карминек кортнеме.

Нина Николаевна теимизь весень марто содавиксэкс, эрьва важодицядонть ёвтнесь башка. Весе сынь эсь тевень содыця специалистт. Эйкакштненень максыть весе седейлембест. Те – Лашина Ольга Сергеевна, Дементьева Мария Сергеевна, Левашова Ирина Алексеевна, Савинова Елена Борисовна ды лият.

– Мейсэ эштё сюпав кужонк, кодат важодить курынеть?

– Кужосонок важодить сисем курынеть: «Робот и техника», «Основа финансовой грамотности», «Шашки», «Шахматы», «Золотой ключик» театрализованной кружокось, «Умарина» эрзя-мокшонь фольклоронь курось. Эйкакштне покш мельспаросо тов яксить, сынь максыть тенст ламо содамочить. 

Видеяк, шкась а ашти таркасонзо, секскак эряви ней эрямс ды молемс шканть марто вейсэ, неень шкань вешематнень лангс нежедезь, ды а стяко кужонь воспитательтне эсест ёрокчист кемекстыть Саранск ошсо.

Эйкакшонь кужосонть важодицятне эрьва иестэ невтить ёрокчист «Воспитатель года» весероссиянь пелькстамотнесэ. Колмо иеть мельга-мельцек лиснесть воспитателень грантонь изницякс.

– Нина Николаевна, эйкакшонь кужосонть тевтнеде пек ламо, эдь цёраломантеме сынь а теевить. Улить истят лездыцянк?

– Кужосонть важодить ниле ванстыцят, конатне теить цёрань стака тевтнень. Ялатеке мон тешкставлия ванстыцятнень ютксто вейкенть – Селивёрстов Иван Алексеевичень. Сон – тевень вечкиця, эрьва козонь чарькодиця ды ёроков, мезес илязо кунда – тейсы парсте.

– Зярдо од кужось панжовсь ды ушодызе эсензэ важодеманть?

– Од кужось панжовсь уш мелят, ацамковсто эйкакштнень вастынзе ды ушодызе эсензэ важодеманзо 2020 иень даволковсто. Те шкантень кужосонть весемесь анокстазель вишкинетнень туртов, конат пек учость те кенярксонь чинть.

– Зяро весемезэ эйкакштнеде?

– Кужонтень весемезэ якить 160 эйкакшт: 80 эйкакшт – колмо иес, эштё 80 эйкакшт – колмо иестэ саезь сисем иес. Ансяк масторонь келес срадозь апаро орманть кувалма тунда пекставкшность весе кужотне ды тонавтнемань учреждениятне, секскак чадыковсто саезь савсь эйкакштнень марто важодеманть ветямс дистанционна. Те апаро орманть лангс апак вано, дистанционной важодемась мольсь тетятнень-аватнень мартояк. Весе вейсэ ютавтынек эрьва покш читненень онлайн-акцият: Ине Отечественной войнасо Изнямонь 75 иетненень, Эйкакшонь ванстомань чинтень, Ризксэнь ды мелявксонь чинтень, «Кизэсь – монь сехте вечкема шкам» морамонь ды артовксонь пелькстамот...

Тундосто саезь кизэнь перть кужосонть важодсть ниле дежурной группат, лиятнень марто важодемась ветявсь онлайн-режимсэ. Сентябрянь 1-це чистэ саезь важодить весе группатне, весе эйкакштне якить кужов.

Весе стакачитнень лангс апак вано, эйкакшонь кужосо важодемась эрьва чистэ кемекстави ды поладови теезьсэнть. Эдь тесэ важодить эсь тевест вечкиця, вейке-вейкенень лездыця пек ёроков ломанть, а сынст прявтсо ашти пек кемевикс ломань – Нина Николаевна Борисова.

Кужосо весе важодицятненень арсетяно кеме шумбрачи, кеняркс ды уцяска! Кадык эйкакшонь кужось эри апак пеле. Кадык эйсэнзэ свал марявить эйкакшонь кенярксов вайгельть!

 

Мила Богатова.

Ромодановань район

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».