Вторник, марта 19, 2024
Важное

 

Телень чись тондавсь прок тундонь. Верде ашо ловонть лангс суводсь чова пиземе. Кинть ланга жойнезь жойнесь чадыведесь. Яхим Кондратич Шабашкин стясь удомсто ранаяк, варштась вальмаванть.

Чилисемась палсь инзеень кондямо толсо. Атясь лиссь ушов. Ташто Од иентень кадовкшность ловозь чить. Сон свал те шкастонть сёрмасо эли телефонсо пачтиль кулят раськензэ-малавиксэнзэ туртов эсь эрямодонзо ды ёвтыль седейшкавань лембе валт те покш чинть кувалма.

Васняяк гайневти Вармазейкав. Тосо эри вечкевиксэзэ Ната баба. Сонсь мери: Наталя Петровна. Талайде уш теевсть паро ялгакс ды зярдояк а стувтнить кеме ояксчиденть. Лиякс а кода, сыредезь, ськамнеть кадовозь кудонтень, менель алксонтень, эрямось маряви сэпей.
Ната баба пек а тошнакали, велесэнть эрить эйкакшонзо. Яхим атя марто содавиксэкс теевсть умок, сёксень вейке чистэ. Покровонь покш чиденть мейле Шабашкин якась Ратор ошов кой-мезень рамсеме. Сёксень чись истя жо тондавсь маней. Яки ошонь базарганть. Лавсятнень лангсо мезе ансяк арась: медь, ой, эрьва кодат эмежть... Сон вешнесь теленень лембе панар, эзь муе, кодамо эряви сонензэ. Вановтозо прась вейке авиненть лангс. Малазонзо шаштсь, кевкстизе:
– Почем ваши чурьки? – арсезевсь: те, нать, рузава.

– Чурькат теть эрявить, эрзянь ломань? – ёртынзе валтнэнь кияксос прок кснавт. – Рамак! Миян!..
– Рамавлинь ды эряви в-а-с-о-в!.. – эзть ёвтаво пес валтнэ Шабашкиннэнь ды ушодсь чурькатнень ванкшномо.
– Олясь тонь, мелезэть эзть туе, кевкстть лиянь кедьстэ, – невтсь сурсонзо авась ве пелев. – Базарось покш.
Маласонзо татарава микшнесь чиньжарамот. Мезе вийсэ, базаронть келес пижни: «Семечки, семечки каленые, вкусные!» Яхим атя рамась натой кавто кедьгеть нуцьканстэнь. Авинесь истямо кель-валов, прок озяз чоледи. Сась туема шка базарстонть. Татаравась учи лездыця ды эськанзо мунды: «Одинокой женщине никто не поможет, а как тяжело!» – ды варштась витьстэ Шабашкинэнь сельмс.
Ната баба, чурькань микшницясь, кунсолы ды «муст-муст» пейди. Яхим Кондратич каподизе чиньжарамонь кескавонть лавтовонзо лангс ды кевкстсь: «Куда нести?» – мендявсь натой сталмодонть. – Сюда, сюда! – невтсь кедьсэнзэ татаравась. – Иди, иди, я за тобой. Здесь недалеко идти.

Яхим атя вайгельбешка ютась, канстось седеяк стакалгадсь. Ланганзо човт, пильгензэ эль уски. Татаравась моли мельганзо ды яла корты: «Вай, алла! Якши, якши! Скоро дойдем, немножко осталось до места». Шабашкин моли пупорькшнезь, кунсолы ды сонсь арси: «Кодамо тензэ якшамо! Монь пильгесуронгак псилгадсть, сонензэ экше. Курок пачкодтяно. Эжнеса – «одинокой женщинанть».

Кудонть видьс пачкодезь, Яхим Кондратич эзь кенере каямо канстонть, кудыкельденть лиссь овтошка пельсштапо цёра. Чамазо сувтемешка, мештезэ понав, мокшнанзо прок кавто пондонь гирят. Шабашкин, кода неизе, озавсь натой кузтемапентень. Мейле пурнась вийть ды истя ношкстась вокзалов, удаловгак эзь варшта.
Тосто неизе Ната баба ды пшкадсь: «Мекс курок сезить тосто, атя? Чаматкак ловтаня...»

– Иля кевкстнеяк! – ахолдась кедьсэнзэ Шабашкин ды нардызе ливезенть конястонзо. – Пряс оршамомгак кадовсь тоско, – ды ёвтнизе, мезе лиссь мартонзо. – Вай, оргодевинь – мерькавлимим овтонь кондямось. Лездак истямонень.
Ната баба пейдезевсь, стясь икелензэ ды мери: «Вана кода пуло алгат ведь валсь «одинокой женщинась». Якши, тык Якши, нейгак псилгалят? Вант, седе тов иля манявкшно».
– Тонгак, нать, истямат, ськамнеть эрят? – варштась кежейстэ ды ютавтызе вановтонзо сэрьганзо Яхим атя.
– Вана неть чурькатнень кандсыть автобусонь лоткамо таркантень, сеста ёвтаса теть, – яла пеедькшнесь авась. – Тон костонят? Ошонь эли велень?
– Костонь-костонь, ланга коцтонь – алга сывелень, – прянзояк ве ёнов велявтызе эйстэнзэ Яхим Кондратич. – Бути ули мелеть содамс? Мон Пиченейкань ломанесь, бабай.
– Мон арсинь, тон аволь велень, – мизолдсь Ната баба. – Пек уш галстукот мазый. Покш пенсият? Эрямо таркат ули?
– Вана эдь кодат ней «ськамост» эрицятне, – сорновтынзе кавонест кедензэ Кондратич. – Сыненст а эряви ломань. Макст тенст квартира ды ярмакт. Аволь бу кевкстевлимик, кодамо шумбрачим?
– Теде а мезть кортамс, – видькстась авась, – оно кодамо сталмо кандыть татаравантень. Улема, урьвакстовлить?
– А содан, косто саевсь истямо пек неицясь-марицясь?
– Тосто, Вармазейкасто, ливтясь базаров, – лавцадинзе меельцекс валонзо авась.
Истя теевсть содавиксэкс. Вейкест-вейкест туртов кучнить сёрминеть, кортнить телефон вельде. Весть-кавксть савкшнось тенст вастовомскак. Ялатеке вейсэнь эрямодонть тевест эзь лисе. «Теде иля ледстнеяк, Яхимкай, – свал кортась Ната баба. – Кодат венчамот, куломань оршамонгак анокстазь умок. Ютась шкась, мекев а велявтсак».
– Зяро кадовсь, те шканть куш вейсэ ютавтсынек, – каршо мольсь Яхим Кондратич.

– Монгак лиясто истя арсян, ды эйкакштне пряколганонть клюкить. Превстэ, келя, лисить сыречинь сазь. Визькс велень ломантнеде! – сёвныть яла эйсэнь.
– Ва-а-а! Кунсолок сынст. Эдь истямо сыречинь эрямонть сынь эштё эзизь варчне. Вейсэ кортасынек, курок сан инжекс Ташто Од иентень.
– Вай, пежетьксэть мартояк, прят-чамат иляк невтне тезэнь! Кепе, лов ланга чиевттядызь велестэнть. Яхим дугай, эсь прят ванстык-жалик, – мелявтозь видькстась Ната баба, ды путызе телефононть.
Яхим Кондратич – аволь лавшо обуцянь ломанесь, бути кодамояк тевенть сыргавтсы, куватьс а кадсы – тейсы. Ната бабань кармавтоманзо эзинзе стувто.

«Ней кода улемс? – арсезевсь эськанзо Шабашкин. – Оршнян цыганавакс. Содан, сынст велеванть якить истят кизэнек-теленек». Ды истя тейськак. Моли велень куринкаванть: прясонзо сувтемешка шляпа, сельмукшонзо раужот, юбказо кочкаря видьс. Весе бу парсте улевель, ансяк лиясто кажось лиси пильгеть алдо. Кудо икельде ардсь эйзэнзэ раужо киска ды кода рожомсь оршамонзо раздеме. Кодаяк а очобави, мейле уш кудонь азортнэ маризь ды лиссть идемензэ.
Шабашкин муизе пижесэ артозь кудонть. Кенкшентень «тук-тук» сурсонзо. Кияк эзь лисе. Мейле мокшнасонзо зярыяксть пек вачкодсь. Кудыкелькс кенкшесь панжовсь ды одс пекставиксэль. Яхим атя пильгесэнзэ кирдизе ды пшкадсь: «Те мон, Ната дугай! Нолдамак, пачк кельминь!..»

– Азё ютак ковгак, чопоти ды нолдатан. Веженсь цёрась кедьсэнь, – тошказь мерсь Ната баба.
Авась сеске совась кудос. Цёразо кевкстизе: «Авай, те кие сакшнось?»
– Цыганава, Митя цёрам. Эзия нолда. Тусь Алопев.
Яхим Кондратич веленть песэ кудыненть удало учизе чопотеманть. Эзь кирдеве, таго велявтсь Ната бабанень. Окойники совась кудопотмонтень, лембентень прок солась. Ялгазо-вечкевиксэзэ каванизе пси ямдо. Сонськак тусь каванямкат ды казне – мазый паця.
– Шампанскоенть, нама, ванды, Ташто Од иенть каршо панжсынек? Арсян, вандыс кадсамак, вензэ лангс ней ков молян?
– Бути кияк сы, кекшат, дугай, – пшкадсь Ната баба. – Прят а невтьсак.
– Кода мерят, истя теян, – ваксозонзо озась Яхим. – Вай, кодамо вадря вейсэ!
Валскестэнть кенкшентень вачкодсть. Ната баба таркастонть ёртозь ёртовсь:
– Яхим! Стяк, совак каськас! – капшазь мерсь ды лиссь кенкшенть панжомо.
– Куватьс удат, авай! – серьгедсь Митрей. Цёразо совась кудыкелев. – Мень-бути таргамо чине качады? – кевкстизе аванзо.
– Ды вана конёвпанкскеть пултынь. Од иестэ свал истя тейнить, – мерсь Ната баба. – Цёрам, кардаз кенкшенть витик-петик, бурясь ловонть кардазс канды.
– Васняяк кудос сован, веднеде копордан, симемам пек сась, – пшкадсь Митрей.
Те шкастонть каськастонть марявсь кодамо-бути шалт.
– Авай, те мень шум маряви? – кевкстсь Митрей. – Суликань кедьгетнень поркснесызь весе.
– Вай, мон тозонь кавто атяка псакат нолдынь. Чеерть-крысат модамартнень ушодсть пореме, – мелявтозь мерсь Ната баба.
– Вейкенть эряви тосто панемс, – кеместэ ёвтынзе валтнэнь Митрей. – Кавто атякатне свал а ладить – тюрить.
Ната баба чатьмонсь, неявсь, пек колавсь ёжозо Ташто Од иенть каршо. Эськанзо арсезевсь: «Вана истямо салавань вечкемась».

Михаил Маторкин

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».