Суббота, сентября 26, 2020
Важное


Покш Березникень Паракина велень эрицятне велень клубост ловить аволь ансяк Культурань кудокс - ломантнень вастовомань ды эрямонь-аштемань таркакс. Тесэ сынь вейс пурнавкшныть аволь ансяк покш читнестэ ды концерттнэстэ, истя жо кудонь тевтнеде мейле лембестэ ды седейшкава кортнеме.



Клубонь фасадось строязель уш умок, 1956 иестэ. Сон пек явови райононь лия зданиятнень эйстэ эсензэ архитектурной арсевкссэнть. Велень сыре ломантнень ледстнемаст коряс, клубонь строицятнень ютксо ульнесь пек превей ды ёроков ломань, кона парсте содылизе строямонь лувонть, секс се шкане сон лововсь пек вадря строицякс. Сонзэ лемезэ ульнесь Семакин Василий Сергеевич, кона чачсь-кассь Бозаева эрзянь велесэ.

Вана уш 60-де ламо иеть ютасть, кода строязель те клубось. Содави, зданиясь пек таштомсь. Зяро кирдсь сон неть иетнень перть виев вармат ды пиземеть, ламо несь ловонь даволткак... Колмо иень ютазь ве­лень клубонь потмось аламодо пурназель-сэрнязель. Велень ломантне покш сюкпря ёвтыть Ев­гений Евгеньевич Ледяйкиннэнь, кона семиянзо марто сась Московсто эсензэ тиринь велев. Сон покш седейсэ ды паро мельсэ бажи яла кепетемс Паракина тиринь велензэ, бажи лездамс велень эрицятненень, кепетемс потмоёжост, бульчом, велень ломантне допрок пекставсть эсест кудоваст. Сон ве таркас пурнынзе велень парсте викшницятнень-кодыцятнень, тантейстэ пидицятнень-паницятнень, мазыйстэ ды гайтевстэ морыцятнень. Велень ёроков эрзянь аватне кармасть аламонь-аламонь кудосто лиснеме, сакшномо велень клубов. Од ломантнеяк, конатнень, мерят, пикссэяк а усксыть кудосто, кармасть сакшномо клубов, паро мельсэ вейкест-вейкест марто вастневеме, кортнеме, лездамо тевсэ-валсо, седе сыретнень марто кармасть парсте поладомо- кемекстамо раськетнень ушодозь тевест.
Паракина велень клубсонть васень таркасо «Парынза» фоль­клорной народной ансамблясь, конась виевстэ ды мазыйстэ гайги аволь ансяк минек Мордовиянть келес, сонзэ томбалеяк. Сон ламоксть лиснесь изницякс ды Лауреатонь лементь кандыцякс республикань ды Россиянь покш фестивальтнесэ. Ансамблянь ху­дожественной руководителекс ашти велень ёроков авась, морыцясь: Тюрькина Пелагея Иванов­на. Кода велесэнть кортыть: морамонть коряс сон ашти тёкшсо, эдь сонзэ виев, мазый ды гайтев вайгелезэ. Аволь умок, панжиковонь 9-це чистэ, Пелагея Иванов­на Ирина тейтерензэ марто пек парсте морызь эрзянь кельс ютавтозь «Чись Изнямонь» моронть, конань сынь алтызь Ине Изнямонь 75 иетнень топодемантень. Ламо ломантнень мельс тусь те эрзянь кельсэ моразь морось! Тешкстама, Ирина тейтерезэ - «Келу» народ­ной ансамблясо парсте морыця, васенце вайгельсэ моронь серьгедиця! Теке жойниця чудикерькске тейтеренть вайгелезэ, конась пек парсте лади ды мазыйстэ маряви Пелагея Ивановнань - аванзо вайгеленть марто.

«Штырма лей» велень клубонь ансамблясь, конань музыкаль­ной руководителекс ашти Ледяйкина Людмила Яков­левна - морыця, книгань сёрмадыця, пек ёроков ды тевень содыця эрзянь ава, кона а ашти тевтеме, од ломантненьгак а кады нусмакалеме, яла терди клубов морамо. Сонензэ жо малав 80 иеть!

Вана истя, покштнень лангс ванозь, вишкинетнеяк кармасть сакшномо клубов, косо эйсэст тонавтыть викшнеме-кодамо, тантейстэ пидеме-панеме ды мазыйстэ мо­ронь морамо. Клубсонть эштё важодить эйкакшонь хореографиянь, морамонь ды кедьёнксонь теемань кружокт, конатнень ветить клубонь важодицятне. Эйкакштне покш мельспаросо сакшныть Куль­турань кудов.

Весе тень лангс ванозь, ло­мантне састь мельс: Паракина велень клубонь зданиянть витнема-одкстомтома. Кода ёвтни Александр Губанищев, кона ашти Покш Березникень райононь куль­турань отделэнь прявтокс:
«Ламо иень перть кодаткак покш тевтеемат Паракина велень Культурань кудосонть арасельть теезь, секс «Культу­ра» национальной проектэнть лувсо райононтень явовсть 6,5 миллионт целковойть, конатне кучозельть Паракина велень клубонь витнемантень-одкстомтомантень. Ды вана 2020 иень якшамковсто строительтне ушодызь те покш ды паро тевенть».

Культурань отделэнь прявтось ёвтнесь седе, кода эрязасто ды парсте тосо молить тевтне. Кизэнь куншкантень подрядчиктне алтыть объектэнть совавтомс тевс. Те кенярксов шкантень Паракина велень эрицятненень «Единая Россия» партиясь кази эштё вейке казне. «Местный дом культуры» партийной проектэнть лувсо велентень явозь 1,5 миллионт цел­ковойть, конатне ютавтовить од техникань, мебелень ды велень самодеятельной артисттнэнь туртов сценической оршамопелень стамс.

«Теде башка, ули меленек Паракинань ДК-со теемс раськень ремёслань мастерской, истя жо одкстомтомс велень библиотеканть, конась ашти клубсо», - тешкстызе А.Е.Губанищев.

Те тевесь пек паро! Монгак седейшкава кецян эсенек тиринь велень ломантнень марто вейсэ! Эдь зяро вадря арсемат ды од порань ледстнемат сюлмазь те тиринь клубонть марто. Эсень важодема кинть ушодыя те велень клубстонть! Важодинь тосо 80-це иетнестэ худрукокс. Секс пек ке­цян сонзэ одс чачомантень! Велесэнть сон кандсь ламонень покш уцяска ды кеняркс, зяро гайтев морот морсевкшнесть эйкакшпорасто ды од шкасто те велень клубонь сценанть лангсо!
Одс чачома марто тонь, вечкевикс тиринь клубонок! Эряк кувать-кувать, свал кецявтт инжетнень, велень эрицятнень! Кадык кенкшеть свал улест панжадот ломант­нень туртов, конатне паро мельсэ, покш мельспаросо кармить таго сакшномо тонеть инжекс!

Мон пек кеман: те одкстомтозь клубонть марто велень эрямось карми улеме седеяк кенярксовокс. Тиринь клубонок панжомадо мей­ле панжовить важодема таркат, конатне тердьсызь оштнестэ од ломантнень эсест тиринь велев. Сестэ велень эрямоськак седе одкстоми, ульцятнесэ тагояк кармить марявомо эйкакшонь кенярксов вайгельть, кудонь эрьва вальматнесэ карми неявомо толвалдо, ды эрямось лаказь-лаказеви, велесь таго вельми... А Паракина веленек перька пек мазый таркатне тагояк кецязевить, пиже тикшенть потсо мазый цецятне седеяк мазылгадыть, луганть потсо якстере ламбамо мастумартне кармить седеяк тантейть ды ламбамот. Ашо лисьманок парсте вастсамизь ды симдьсамизь поронь лисьмапрянь тантей кельме ведте, а кезэрень Русяйка латкось инжензэ туртов максы покш кемема ды эрямонь ламо вийть, конатнеде сёрмадозь «Русяй - богатырь» ёвтамосонть.

Седейшкава кеман, эрямось велесэнть а лотки, толонь сяткинекс аламонь-аламонь карми вельмеме, ды Вере Пазоськак кадык тенек лезды, максы валдо превть, ламо шумбрачи ды вандынь чинтень кемема ...

Мила БОГАТОВА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».