Улить ломанть, кить вечкевикс тевсэст важо-дить пинге, а вешнить истят тевть, косо пандыть ламо ярмакт. Истяттнэнь ютксо Покш Манадыши велень средней школань прявтось Николай алексеевич Сюваев. Сон школань прявтонь тевенть топавты уш 30 иеть.
Н.А.Сюваев чачсь 1964 иень январень 29-це чистэ Отя-желень райононь Таразбуе эрзянь велесэ. 1985 иестэ Николай Алексеевич ды низэ, Ольга Семеновна, М.Е.Евсевьев лемсэ пединститутонть прядомадо мейле састь важодеме Покш Манадыши велень средней школав.
- Васня важодинь тонавтыцякс, ды зярыя шкань ютазь аравтымизь школань прявтокс, - ёвтни Н.А.Сюваев. -Минек педколлективесь аволь покш. Вадрясто тевест топавтыть од специалисттнэ Елена Сергеевна Сафонова, Ольга Васильевна Девяткина, Татьяна Геннадьевна Левща-нова. Вана монь ним, Ольга Семеновна, кандтни «МР-нь заслуженной учитель» лементь ды истя седе тов. Эрятано кеме ояксчисэ ды вейке омбоценень лездазь. Тень кувалма 2007 иестэ миненек максозель Россиянь Президентэнь Грантось. Неть ярмактнень лангс раминек школань класстнэс компьютерт, лия мезе.
Течи совиндерят Покш Манадыши велень средней школас, ёжот сеске вадрялгады. Сон уш анок 2020-2021 тонавтнема иентень. Киякстнэ ар-тозь. Коронавирусонь инфекциянть кувалма школасонть витнемань тевтнень топавтсть тонавтыцятне кавтонь-кавтонь. Мезе ульнесь аравтлувсонть -сень сынь топавтызь.
Течи Покш Манадыши велень средней школасонть тонавтнить 83 эйкакшт. Сынст содамочинь масторганть ветить эсь тевень содыця комсь тонавтыцятне. Эй-стэст ламотне казезь Россиянь покш казнесэ.
- Тедеде 11 класстнэнь пря-дызь ниле тонавтницят, - ёвтни Н.А.Сюваев. - Неть: Дарья Курышкина, Анастасия Горохова, Ирина Ермишина ды Алина Лисова, кона школанзо прядызе «сырнень медаль» марто. Сынь тонавтнемаст поладсызь вузсо.
Школань прявтонть Н.А.Сюваевень валонзо коряс, тонавтницятне участвовить «Окна Победы», «Окна России» акциятнесэ. Ды, нама, волонтеронь движениясонть.
Н.А.Сюваевень ушодксонзо коряс, сеть эйкакштненень, конань тетязо эли авазо а важоди ды ламо эйкакшонь семиятненень явшезь продукта марто пакетт. Сынь пек вечкевсть аволь ансяк эйкакштненень, истя жо тетятнененьгак-аватнененьгак.
- Аволь умок школанок лемдязь Советской Союзонь Героенть Григорий Сергеевич Кочетковонь лемсэ, - ёвтни Николай Алексеевич. - Мемориальной лазонть анокстызе ды понгавтызе школантень совамо таркас Российской военно-исторической вейсэндявксось. Те тееви сень кисэ, штобу тонавтницятне аволизь стувтне Ине Отечественной войнасо маштовозтнень, Геройтнень лемест.
- Косто саевить од вийтне? - кевкстинек школань прявтонть.
- Минек велесэ важоди «Искра» велень хозяйствань предприятия. Сон пек виев. Тесэ важодицятнестэ ламотне од ломанть. Сынь получить а берянь зарплата, вишка эйкакштне якить эйдень кужов. Ды истя седе тов. Лисни, улить од ломанть, улить тонавтницяткак. Улить тонавтницят, эри велеськак, эйкакштне - минек сюпавчинек, - ёвтни Николай Алексеевич.
... Покш Манадыши велестэ сыргинек паро ёжосо. Тесэнь ломантне эрить вандынь чиде арсезь.
Петр Зиновьев