Суббота, октября 24, 2020
Важное

Минек республикань кезэрень велетнестэ вейкесь – те Дубенкань муниципальной райононь Пичалесь (Пуркаевась). Умонь шкасто саезь сонзэ лемдекшнизь Налитовакс. Кодгеменце иетнестэ сон кармась кандтнеме масторлангонь келес содавикс военачальникенть, Гражданской ды Ине Отечественной войнатнень участникенть, тесэ чачозенть М.А.Пуркаевень лементь.


Тешкстасынек, те эрзянь велестэнть лиссть эштё ламо содавикс ломанть, кинь лемест сырнесэ сёрмадозь аволь ансяк минек республиканть, истя жо масторонок историяс. Кода а ледстямс Ленинэнь премиянь лауреатонть С.П.Кильдюшовонь, лелят-ялакст Виктор Егорович ды Алексей Георгиевич Каргинтнэнь, конатненень максозь Социалистической Трудонь Героень лемтне.

А.Г.Каргин Советской властень иетнестэ ульнесь Гомелень партиянь обкомонь васенце секретарекс, войнадо мейлень стака иетнестэ Мордовияв ильтякшнось цела эшелон продовольствия. Алексей Георгиевичень ды ламо лиятненьгак покш путовксост те веленть республиканть ды масторонть келес содавиксэкс теемасо, сонзэ историянть ванстомасо. Ледстясынек, 2015 иестэ кезэрень те эрзянь велесь тешкстызе 400 иень юбилеензэ. Сестэ тиринь ёнксов пурнавкшность ламо инжеть, кить те шкас ледстнить те валдо, мелень витиця кенярксчинть. Сонзэ парсте ютавтомасо, тесэ эрицятнень ды ламот ве ёндо тиринь велев сыцятнень мелест кепедемасо, сы поколениянтень сонзэ ванстомасо покш путовксозо Пуркаева велень поселениянь прявтонть Т.В.Радаевань. Нать, а стяко Татьяна Викторовна ламо иень перть парсте важодемань кисэ казезь «Почетный работник общего образования РФ» мештесэ кандтнемань знаксо, Мордовия Республикань ды МР-нь Госсобраниянь Почетной грамотатнесэ ды ламо лия питней казнесэ.

Течи минь ловныцятненень ёвтнетяно те эрзянь авадонть, кие эрямонзо алты чачома веленть ванстомантень, тосо эрицятнень кисэ мелявтомантень.

ЛАМОСЬ ЮТЫ ТЕНЕК СЕМИЯСТО

Татьяна Викторовна Радаева (тейтерьксэнь фамилиязо Кузенкова) марто васенцеде вастовинек 1980 иестэ, Мордовской государственной университетэнь филологиянь факультетэнь эрзянь отделенияс документэнь максомсто. Ней, малав ниленьгемень иень ютазь, уш стувтовсь, кода сестэ минь, велестэ сыця тейтерькатне, ризнынек-мелявтынек экзаментнэнь максомаст кувалма.
Уцясказонок, весе ютась парсте, ды минь теевинек вузонь студентэкс ды ушодынек эрямо Саранскоень Пролетарской куросо аштиця котоце номер общежитиясонть.

Виде, вейсэнь таркасо эрямсто весемесь парсте редяви, кие кодамо семиясо чачсь-кассь ды мик мезе ютась тензэ тетянть-аванть ды лия малавикстнэнь пельде. Ансяк весе те домкасто чарькодеви иетнень ютазь, эрямонть лангс удалов варштазь.
Татьяна Кузенкова кармась эрямо вейке комнатасо Валентина Захватова ды Любовь Ротанова марто. Нать, а стяко кортыть, седе сеедьстэ эрьвась кочки эстензэ ялга обуцянь, прянь ветямонь коряс. Весе сынь тонавтнесть парсте, шкаст сатотсь кода экзаментнэс анокстамс, истя жо факультетсэ общественной роботань ветямс, кизэнь каникулатнестэ студентэнь строительной отрядсо важодемс. Шкась невтизе, сестэ эштё од тейтерькатне видестэ кочкизь тонавтыцянь тевенть.

Вузонь прядомадо мейле сынь колмонест тусть важодеме велень школав тонавтыцякс. Икелев чиезь пачтян, шкань ютазь колмонест невтизь тевень ладямо маштомаст, перькаст ломантнень вейсэндямост. Ней: Валентина Захватова – Мордовиянь Н.П.Огарёв лемсэ государственной университетэнь вуздо икеле анокстамонь факультетэнь деканонь полавтыця, Любовь Ротанова – Ицялонь райононь Береговые Сыреси велень поселениянь (сестэ велень Советэнь администрациянь) прявтонь полавтыця. Татьяна Радаеванень Пазось анокстась эсензэ ки-ян, конань сон топавты истя, штобу кементь иетнень ютазьгак аволь саво янксемс.

…Колмоце курсонь прядомадо мейле малавикс ялгам Лида Годяева марто туинек тонавтнеме Санкт-Петербург (сестэ эштё Ленинград) ошов. Виде, Саранскоев сакшнынек аволь пек сеедьстэ, каникулатнестэ ды сестэяк сеске велев, тиринь кудов. Ялатеке ульнесь меленек содамс ялгатнеде. Татьяна Кузенкова колмоце курсонть прядомадо мейле друк яволявтсь, седе тов тонавтнеманзо поладсы башка аравтлувонь коряс (индивидуальной планонь). Нама, сестэ сон ламотнень дивавтынзе: кода истя лиссь, мельстуевикс студентэнь паро эрямонь таркас тусь васоло Пуркаева тиринь велев ды ушодсь важодеме школасо тонавтыцякс? Ледстневи, се шкане истямо тев арасель аволь ансяк минек курссо, целанек факультетсэяк. Тешкстасынек, Татьяна Кузенкова ульнесь виев студенттнэнь ютксо, теде содасть тиринь школань сонзэ тонавтыцятнеяк, секс апак кавтолдо саизь икелень тонавтницяст эсь коллективезэст.

Аволь умок Татьяна Викторовна марто кортамсто карминь содамо, тувталось ульнесь кемекс. Самай се шкане, 1983 иестэ, стакасто кармась сэредеме авазо Серафима Яковлевна. Те ламо эйкакшонь триця, ояксчисэ эриця семиясь весе вейсэ арсемадо мейле прась вемельс: аваст мельга карми якамо веженсь тейтерест Татьяна. Виде, сонзэ лелятнень-патятнень се шкасто ульнесть уш семияст, ды малав весе сынь, Нина Викторовнадо башка, эрясть ве ёнга. Ветенест эйкакштнень Виктор Михайлович ды Серафима Яковлевна тризь-кастызь важодемань вечкицякс, ломань марто кортамо маштыцякс ды маласост улезтненень лезксэнь кандыцякс. Нать, а стяко Татьяна Викторовнань лелязо, кинень прась уцяска важодемс васоло Северсэ, казезь орденсэ.

ТЕВЕНЬ ВЕЧКЕМАСЬ – ПОКШТЯСТ ПЕЛЬДЕ

Татьяна Викторовнанень семиясост эйкакштнень ютксто, нать, сехте ламо савсь марямс Серафима Яковлевна аванзо пельде сынст раськеденть. Покштянзо-бабанзо семиясь покшоль: сисем тейтерть ды ансяк вейке цёра ульнесь. Секс кудазоронтень Яков Макарович Ефремовнень савсь пек ламо важодемс, эдь сестэ ансяк цёратнень лемс мода макссть. Паро, сынст велепева чуди Сурась, кува сестэ якасть баржат. Сон ульнесь паро калонь кундыця ды маштсь вадрясто сынст салтомо. Аванзо ледстнематнес те шкас кадовсь истямо невтевкс: кардазост келес аштить кал марто пешксе боцькат ды вейке-омбоце мельга сыть тенст эрьва косто рамицят. Эдь эрзятне ды мокшотне кезэрень шкасто калонь вечкицят. Паряк, сывелень арасьчиденть тонадсть, эдь сестэ лейтнесэ ды эрькетнесэ калдонть ульнесь пек ламо.
Эштё авазо вечкиль ёвтнеме седе, кода велесэст эриця боярось, сынст икельга ютамсто, карксамос сюконякшнось тетянстэнь. Нать, ульнесь мезень кисэ. Яков Макарович Ефремов велесэст ськамонзо казезель Георгиевской крёстсо. Авазо Серафима Яковлевна ёвтнесь: велень сехте сюпав ломанесь эрясь се таркасонть, косо ней Пичалесэ ашти психоневрологической интернатось, теде икеле тосо ульнесь эйдень кудо.

Те таркась Серафима Яковлевнань туртов пингень перть кадовсь а стувтовицякс. Эдь самай тосо войнадо мейлень стака иетнестэ эйдень ваныцякс важодемстэ сон вастызе уцясканзо. Ульяновской ёнкссто тов сакшнось сазоронзо вешнеме од цёра, конань тетязо чавовсь войнасо, а авазо апак учо кулось. Те ульнесь Виктор Михайлович Кузенков.
Одтнэ вечкевсть вейкест-вейкест туртов ды сайсть мель венчамс-урьвакстомс. Тетянть Яков Макаровичень мельс куш сеске тусь од цёрась, ялатеке ёвтась истямо кармавтома: мерсь, келя, макссы тейтерензэ тензэ ансяк сестэ, бути сы тенст эрямо содамокс. Нать, истя пек вечкевсь эрзянь тейтересь Серафима, Виктор Михайлович эзь карма атянть мелензэ коламо ды нолдынзе ундоксонзо Налитова кезэрень велентень. Ды кода уш вере ледстинек, кармась улеме ламо эйкакшонь триця кудазорокс. Эрясть парсте, путсть эстест паро кудо, кирдсть ламо ракшат. Ков сатотсть виест, лездасть ветенест эйкакштненень стямс пильге лангс, лисемс паро ломанекс.


ЭЙКАКШПОРАНЬ АРСЕМАСЬ ТОПАВТОВСЬ

Веженсь тейтерест Татьяна эштё эйкакшпингстэ арсесь улемс тонавтыцякс. Те тевесь сонензэ седеяк пек вечкевсь эсест велень тонавтницятнень марто важодемань кинзэ ушодомсто. Виде, 1983 иестэ саезь, зярдо сон ушодсь васенце уроконзо ветямо, школасо тонавтыцятнеде пек ламольть. Малав сисем иеть ульнесь Пуркаевань средней общеобразовательной школасо рузонь келень ды литературань тонавтыцякс. Седе тов кевейкее ие те школанть прявтокс.
Весе виензэ, содамочинзэ бажась максомс эйкакштненень, истямо жо лембе марясь тонавтницятнень пельдеяк. Нать, а стяко «Иень тонавтыця» пелькстамосонть лиснесь изницятнень юткс эсест райононь пелькстамотнесэ ды невтсь ёрокчинзэ республикань конкурссонтькак.

Школась сайсь тейтерь-аванть весе юткошканзо, лиясто кавонест эйкакшонзо Максимень ды Екатеринань туртов овсе сон эзь кадновкшно. Сынст тонавтсть лия тонавтыцятне. Эйкакштне кунсолыцяльть, истя жо аваст ладсо тонавтнемас бажицяльть. Школаст парсте прядомадо мейле кавонест тонавтнесть Мордовиянь Н.П.Огарёв лемсэ государственной университетсэ. Максим – промышленной электроникань, Екатерина – омбо масторонь келень факультеттнэсэ. Сонзэ, кода келень парсте содыця студентканть, кавто иес ильтякшнызь тонавтнеме Германияв. Ней кавонест эйкакшонзо эрить ды важодить Московсо, топавтыть вечкевикс тевест.
Нама, Татьяна Викторовнань нежезэ мирдезэ, Александр Николаевич, кие теи весементь семиянзо кирдемга, финансонь кевкстематнень решамга.

ВЕСЕМЕСЬ – ЭРИЦЯТНЕНЬ
ЛЕЗЭС

2011 иень мартсто Татьяна Викторовнань эрямосо ульнесь покш полавтома. Сонзэ ладизь Дубенкань муниципальной райононь Пуркаева велень поселениянь прявтонь тевень топавтыцякс, иенть прядовомсто, декабрясто, кочкавсь теке велень поселениянь прявтокс. Виде, важодемазо се шкастонть саезь ков седе пек ламолгадсь. Бути икеле ансяк вейке школанть кисэ покш ответственность кандсь, ней жо цела веленть кисэ, косо эрить 486 ломанть, а вейксэ иеде икеле тесэ ков седе ламольть.

Пуркаева велесэ неень шкане ули психоневрологической интернат, косо эрить 140 ломанть, мельгаст якить эрьва кодамо профессиянь 80 важодицят. Велень эрицятнень мельспарос ванстовсть: фельдшерэнь-акушерэнь пунктось, почтась, Культурань кудось, улить башка (индивидуальной) предприятият. Аволь пек умок велесэнть стявтозель Животроицкой храмось. Сонзэ теизе эсест велень Пазнэнь кемиця, седей мариця ломанесь Евгений Геннадьевич Тябкин.
Виде, Пуркаева велень поселениянь коллективенть икеле васень таркасо аштить ломантнеде мелявксось ды социально-экономической невтевкстнэнь кастомась, конат ламо иень перть уш топавтовить сядо ды седе ламо процентс. Велесэнть а седе вишкине мель явови кочкицятнень вешемаст-энялдомаст топавтомантень. Вейсэ велень поселениянь депутаттнэнь марто ламось удалы теемс. Куш Татьяна Викторовна аволь пек кувать важоди веленть прявтсо (малав кемень иеть), ялатеке те шканть перть удалась ламо теемс.

Истя, эштё 2012 иестэ азорксчись кемекстазель киненьгак а эрявикс 120 гектарт моданть лангсо, допрок одкстомтозель Культурань кудось. Иень ютазь парсте витнезель Жадейкин лемсэ курованть 1,5 вайгельбеть кись. 2014 иестэ ванськавтозельть ниле лисьмапрят ды перькаст мазылгавтозель таркась. Татьяна Викторовнань пингстэ теезель 400 кавонзазь метрат эрямо тарка.

Паро, те велесэнть икелепелев ушодсть Ине Отечественной войнасо Изнямонь 75 иетненень анокстамо. Мезесь яви сынст лиятнеде, ледстнемань лазонтень сынь тешкстызь аволь ансяк сеть ломантнень лемест, кить эзть велявто ятонть каршо тюремань паксятнестэ, истя жо сетненьгак, кить покш сэредькс марто цидярдсть Изнямонь чинть самс ды велявтсть тиринь кудов. Ризксэнтень, ламот умок уш арасть ютксонок, ялатеке сынст лемтнень пингеде-пингес кармить ледстнеме тесэнь эрицятне ды Пуркаевав сыця инжетне, сехте пек войнасо маштовозтнень малавикстнэ. Нама, теньсэ, кодамо покш мель течи явови эрицятненень, ули таликазо велень прявтонть, алкуксонь велень азораванть Татьяна Викторовна Радаевань.

Пичале велень эрицятнень ульнесь покш бажамост – сынст куротнева ветямс мода алга ведь. Тосо те кевкстемась аштесь пек пштистэ. Стакачись витевсь. Те иенть прядовомс ведесь пачкоди весе куротнес. Те – 11,7 вайгельбеть. Неть ды ламо лия тевтнесэ покш лезкс тенст максы Дубенкань муниципальной райононь Администрациянь прявтось С.Г.Плешаков.

Валентина Юдина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».