Вторник, марта 19, 2024
Важное


ТЕ ТЕВДЕНТЬ ЁВТНЕМАЛЬ УШ МЕЛЯТ КИЗНА, САМАРА ЁНКСОНТЕНЬГАК, МОРДОВИЯ РЕСПУБЛИКАНТЬ ТУРТОВГАК. АНСЯК ТЕВЕНЬ СЕХТЕ «ПОКШ» ЛОМАНТНЕ МЕРСТЬ: «АРАЗИ ТЕДЕ ЭРЯВИ ЁВТНЕМС?!» ВАНТА, КОДАТ ВИЗДИЦЯТ!
А СЫНСЬ – ВИШКА ГЕРОЙТЬ! ЁВТНЕСА – ЛОМАНЬСЭ ЛОМАНЬКСЧИНТЬ УЛЕМАНЗО КИС ДЫ ЛЕМС!

2019 иень кизэнть лелят-сазорт Михаил ды Маргарита Швецовтне, Саранск ошонь 3-це № школань тонавтницятне, ютавтсть сырькаест кедьсэ Самара ёнксонь Шентала буень Баганя велесэ. Аштемковонь 19-це чистэ сынь омбоце юронь покш леляст (дядя) марто, конань лемезэ Мокшанов Николай Васильевич, яксесть веленть маласо паксятнева ды несть, кода сэрейстэ аштиця кинть лангсто прась-кеверсь легковой машина (кода ёвтнесь Рита, васня – прянзо, мейле – боканзо лангс). Сынь колмонест чийсть тов ды неизь: машинасонть Баганя велень эриця – Ломкин Олег Геннадьевич. Покш лелясь кучинзе эйкакштнень ломанень тердеме, сонсь кадовсь пек томбавозенть ваксс. Вейксэ иесэ цёрынесь ды сисем иесэ тейтернесь ношкстасть маласо кавто куринкатненень. Миша ветизе ялганзо-кирдажонзо Девяткин Максимень ды сонзэ лелянть – Ледяев Юрий Александровичень, кона се шкане сакшнось инжекс баганянь раськензэ туртов. Рита пачтясь лисезь тевденть сыре патянстэнь, Сергеева Любовь Петровнанень, ды бабанстэнь, Мокшанова Мария Павловнанень. Колмонест капшазевсть апаро таркантень, ютамсто тердизь шабрасткак – Пазяев Николай Михайловичень, кона важоди медицинань куроконь лезксэнь машинань ветницякс.

Зярдо кармасть содамо, кие велявтовозь машинасонть, Люба патясь кармась гайневтнеме цёранть малавиксэнзэ туртов. Курок чийсть лелят-ялакст Чилигинтнэ, Андрей ды Александр Васильевичтне, мельгаст – Пазяевень цёранзо: Сергей ды Дима. Састь лия асодавикс ломантькак. Цёратне вейсэнь вийсэ таргизь Олег Геннадьевичень машинастонть. Сергей ды Дима чийнесть Дементьева Людмила Григорьевна медсестранть мельга. Те шкастонть Н.М.Пазяев панизе «скороенть», ускизе Ломкинэнь нинзэяк – Татьяна Геннадьевнань. Медсестрась лездась Олег Геннадьевичнень мейсэ маштсь ды сыргасть ЦРБ-в ускомонзо.

Зыянс понгома. Теке марто чанстеськак тувак якась – паро, Мишат-Ритат неизь ды ветясть лезкс. Видестэ кортыть: кажо паровтомо а эри!
Олег Геннадьевичень малавиксэнзэ сюконить весенень, кие путсь вий малавиксэст идемасо, сехте пек – эйкакштненень, Мишанень ды Ританень, конат лездыця мельга чиемстэ эзизь стувто, ков сыргасть, эзть налксезеве килангсо, шкастонзо тердсть ломанть зыянов таркантень ды ней кевкстнить, кодамо ёжозо «се лелянть»…
Капшамс лездамо – улемс ломанекс! Весе, кить ёвтнезь тевсэнть котьмасть – покш буквасто Ломанть!
Ней Олег Геннадьевич аламонь-аламонь виеми томбавксонзо эйстэ. Эно, арсетяно тензэ шумбралгадома?!! Менелесь-масторось мари-пачти.

Г.ГАФАРОВА,
Самара ёнксонь Шентала чугункань кинь
станциянь прявтонь тевень топавтыця.
 
 
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».