Республикань паксятнесэ моли сюронь нуемась. Те шкась лиятнень ёнов а молиця: пертьпелькссэнть качады ансяк пурнавт сюротнень чинесь, маряви комбайнатнень увтост, тей-тов ардыть сюродо пештязь машинатне. Велень хозяйстватнесэ молить сехте «пси» шкат.
Ве лувсо роботыть весе: комбайнёртнэ, водительтне, механизатортнэ ды тинге лангсо важодицятне. Ды, нама, тенень вадрясто анокстасть велень хозяйствань весе предприятиятне. Истямо лувсо тевтне молить Ицялонь райононь «Агропромсервис» ООО-сояк, косо минь ульнинек неть читнестэ.
– Нуеманть ушодынек июлень 25-це чистэ ды васняяк кундынек озимтнень пивсэме, – ёвтни «Агропромсервис» ООО-нь прявтось Владимир Ильич Нужнов. – Сюрось кенерсь парсте, прятне вадрят, зёрнынетне покшт. Васенце паксясонть сюронть летькечизэ ульнесь 18 %, нама, те аламодо ламо. Куш пертьпельксэсь тандавтнесь пиземесэ, сюрось жо пек паро, ды сонзэ а ёмавтомга минь бажинек лезэвстэ ютавтомс маней эрьва чинть.
Те иестэ «Агропромсервис» ООО-нь паксятнесэ сюротнеде видезь 6 тёжат гектарт. 1400 эйстэст – озимой товзюро, 260 – яровой товзюро, кадовозесь – шуж.
Кода тешксты Владимир Ильич, васенце читнестэ гектарсто саезель 5 тёжат тоннат сюро, гектарсто малав 50 центнерт, вейке паксястонть натой 60 ламо.
– Сюротне тедеде чачсть вадрят. Васняяк теньсэ покш путовксост минек хозяйствань механизатортнэнь, агрономтнень ды лия специалисттнэнь. Эдь вадря урожаенть кастомга покш робота теезель ютазь иень сёксня ды тунда – весе паксятне вадрясто сокавсть-анокставсть, кизна шкастонзо теезельть удобрениятнень каямось ды унжатнеде ванстомга пургсемась. Механизатортнэ весементь теизь шкастонзо. Эсь тевенть сынь содасызь ды топавтыть парсте. Ломантне хозяйствасонть весе роботыть уш умок ды, монь койсэ, минек арасть истят, конатне тевсэть кеменде седе аламо иеть. Бути пертьпельксэсь максы нуеманть прядомс шкастонзо, сюронь норовось карми вадря. А карман ловомо, зяро сайтяно, ансяк арсеви, ютазь иенть коряс ков седе ламо, – тешксты Владимир Нужнов.
Зярдо минь ульнинек Ицялонь районсо, ванынек, кода моли нуемась хозяйствань паксятнесэ. Теле лангс видезь товзюронть тесэ пивсэсть зярыя комбайнат. Паксясонть роботасть Rostselmach ды Claas комбайнатне.
– Весемезэ важодить вейксэ комбайнат, зняро жо автомашинат. Истя жо кото ломанть роботыть тинге лангсо, кавто – утомтнесэ. Бути видестэ кортамс, нуемань тевтнесэ важодить хозяйствань ламот роботниктне, – ёвтни Владимир Ильич. – Весе техникась эсенек, киньгак костояк эзинек сиведе. Тунда техникань парконть аламодо седе ламолгавтынек – раминек кавто од комбайнат. Вейкенть кисэ ярмактнень пандынек, омбоценть коряс миицятне мольсть энялдоманок каршо ды максызь рассрочкас. Сонзэ кисэ пандсынек сёксня. Техникась пек вадря, топавтозь компьютерсэ, конась невти сеньгак, зяро те эли тона паксястонть пивсэви сюро. Вана те паксястонть невти 50 центнерт гектарсто.
Пивсэзь сюрось ускови хозяйствань утомтнес, конась жо аламодо летьке – «АПО Элеком» ОАО-в. Тосо сюронть костить кода эряви.
– Нуемань васенце читне невтизь: тевтне молить, ломантнень важодемаст ладязь парсте. Эдь истямо урожай, кодамо чачсь те иестэ, сынь умок эзть нее, ды эсь паксятнень, конатнень видизь сёксня ды тунда, урядыть покш мельспаросо. Тесэ сынст трудост, – кемексты Владимир Ильич.
«Агропромсервис» ООО-нь паксятнесэ нуемань тевтнесэ техникась важоди весе эсест хозяйствань, механизатортнэяк тескень. Кода мерсь В. И. Нужнов, механизатортнэ, нама, а сатныть. Ансяк те мелявксось неень шкасто ули республикань весе хозяйстватнесэ. А капшить од ломантне молеме роботамо велень хозяйствав, кадык зарплататнеяк тесэ ков седе вадрят ошонсетнень коряс, ялатеке те ёнксонть а кочкить.
Конатне жо роботыть хозяйствасонть, эсь тевсэст алкуксонь специалистт. Важодемасо весе ёроковт, механизатортнэ эрьва кодамо техникас чарькодицят.
Истятнэнь ютксо комбайнёрось Анатолий Дмитриевич Волков. Сон сюронь нуемасо уш сисемеце ие, лия шкасто жо роботы хозяйствасонть механизаторокс.
– Сюронь нуема шкась – а стувтовикс шка. Сонзэ учат иень перть, – корты комбайнёрось. – Зярдо урожаесь паро, седееть кеци ды пурнамс сонзэ покш мельспаро. Ды зярдо ванат пивсэзь сюронть лангс, кенярдат, эдь тесэ ули тонь путовксоткак.
Велень хозяйствасо Анатолий Волков важоди уш 35 иеть, колхозонь тевтнес кундась сеске школанть прядомадо мейле. Неть иетнень перть варчнесь эрьва кодат машинат ды тракторт. Эрьвантень чарькоди ды техниканть марто муи кель-вал, секскак те иестэ рамазь вейке од комбайнась максозель сонензэ. Кода мерсь эйстэнзэ В. И. Нужнов, механизаторось сон опытной, важодемадо а пелиця ды куш мезес чарькодиця.
Эштё вейке комбайнёрось – Сергей Михайлович Козлов. Механизаторокс важодемазо ушодовсь малав сеске школанть прядомадо мейле, комбайнасо жо – эйкакш шкасто саезь.
– Тедеде хозяйствась рамась од комбайна, конань руль экшс озавтымизь монь. Техникась вадря, эряза, мерят, весементь сонсь теи. Теке марто сюронть пурны ёмавкстомо. А те пек эрявикс ёнксось. Ды важодемскак эйсэнзэ вадря куш кодамо шкане. Кодамо пси ушосонть илязо уле, кабинасонть экше.
Цёрась комбайнёронь тевенть вечксы вишка шкасто. Эштё эйкакшокс улемстэ лездыль эсь тетянстэнь Михаил Сергеевичнень, конась истя жо роботыль комбайнёрокс. Секскак школанть прядомадо мейле кочкась эстензэ веленть марто сюлмавозь тев. Мольсь Кемлянь аграрной техникумов, косо тонавтнесь механизаторонь тевентень.
– Мон чачинь-касынь теске, Оброчнойсэ. Велесь аволь вишкине, свал ульнесь колхоз. Тетям роботыль тосо ды нейгак тескень хозяйствасонть роботы механизаторокс, а кизна, сюротнень нуема шкасто, максыльть тензэ комбайна. Мон пек училинь те шканть. Сондензэ икелев ношкстылинь колхозонь мастерскойтнес ды училинь, зярдо сыргатано паксяв. Васень шкатнестэ ансяк ардтнемань кисэ якилинь, мейле тетям кармась аламонь-аламонь озавтнемень руль экшс, теке шкастонть ёвтниль панеленть лангсо улиця эрьва кнопкадонть. Истя, васня тонавтния кабинанть потмонзо, мейле карминь эцнеме машинань моторонть потскак. Эдь кодамо тон механизатор, бути а содасак, кода пурназь-теезь тонь машинась. Бути калады, мезе тееме кармат? Сюкпря тетянень, сонзэ лезксэнзэ вельде весементь тонавтния. Ды ней од техникасояк важодемась тень стакакс а маряви. Весементень пек куроксто чарькодян, – кемексты Сергей Козлов.
Юлия Еремина
Фототне Марина Агафоновань