Вторник, марта 19, 2024
Важное



Ульяна бабанень цёразо явсь башка комната. Покш, валдо, вадря. Ансяк, нама, мезе-бути а саты.
«Прок нармунесь клеткасан, а тей, а тов», – арсесь эськанзо бабась.


Веньперть удомась эзь педя. Кувака весь, окойники, прядовсь.
«Стяма, ялатеке а удан», – арсесь бабась.
– Авай, тон мекс истя рана стить? – малав вейсэ кевкстизь цёрась ды урьвась. – Удок ды удок, те миненек важодеме, эйкакштненень школав, эйдень кужов...
– Кодат удомат. Велесэ те шкас зняро тевть теевлинь! – ушодсь велень инжесь. – Тон, цёрам, гайгставлить бу велев, кода тосо кудом, эри ялган – сеясь ды псакась.
– Паро, авай, кодак важодеме сан, сеске гайгстан, – максызе валонзо цёрась.
– Вана завторкоськак анок, озадо, ярсадо, – тердсь азоравась.
– Кодат монень ярсамот истя рана, – ушодсь Ульяна баба, – ярсадо уш тынсь, тыненк туемка, мон кудос кадован.
– Арась, истя а тейнить, ней минь – вейке семия, весе вейсэ, – ладсесть инженть.
Курок столенть экшс озасть весе. Столь лангсонть домка вакансонть ульнесь салат, эйзэнзэ пезнавтозь покш пенч. Эштё вакантнэсэ лепшазь модамарть, котлетат, эрьванть икеле – чаво торелкат.
– Урьва, а мезекс зняро чаво торелкатнень?
– Эрьванть эсензэ, мезе ды зяро эрявить тензэ – каи, путы.
– Минь велесэ икеле шкань ладсо, вейке вакансто...
...Ярсамось мольсь. Урьвась тантейстэ пидесь!
– Тон, авай, кадоват ськамот...
– Вай, авакай, ськамон мезе теян чаво кудосо?..
– Удок, оймсек, оймсек, удок... – пеедькшнесь цёрась. – Вант телевизор.
Теньсэ и явовсть.
Ульяна баба мекев-васов якась комнатасто комнатас, сядоксть мекев-васов озакшнось-стякшнось, кармавтнесь-лоткавтнесь телевизоронть...
«Эрьга ушов лисян, мезть вальмава ды вальмава ванан, шукшонть ёртса», – кортась эськанзо бабась.
Оршнесь, саизе ведранть, ды – ушов. Контейнерэнтень ёртызе ведранть ды шожда оймесэ састыне якась кудонть перька. Мекев-васов якамось налкставсь.
«Эрьга сован кудос», – арсезевсь бабась. Састыне кузсь квартиранть ваксс. Панжи, а панжови, а тей, а тов.
«Те таго мень тамаша! – арсезевсь. – Паряк, кияк уш кудов сась».
Лепштизе баягиненть. Панжиця арась. Аштесь кузтема лангсо, лиссь ушов. Кармась якамо мекев-васов, налкстась, кельмесь.
– Тон, авай, мекс ушосат? – кевкстсь сыця Николаесь.
– Вана лисинь шукшонть ёртомо.
– Ды тонстеметькак ёртовлинек. А ведрась косо?
– Кода косо? Ёртыя шукшонть марто.
– Шукшось ведрастонть ёртомаль контейнерс, чаво ведрась жо мекев кандомаль кудов. Ну, паро, ведрась те аволь сюпавчи. Умок ушосат?
– Талайде.
– А мекс кудос а соват?
– Совавлинь бу, кенкшесь а панжови.
– Эрьга ключтнень.
– Кодат ключт?
– А-а-а... Тон лисить ключтомо, кенкшенть тулкадик, ды сон пекставсь ключтомо, минек панжоманок истямо, – оймавтсь цёрась. – Иля мелявто, тонадат, кармат содамо, ошсо эрямось ламонь коряс лия...

Геннадий ГРЕБЕНЦОВ

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».