Вторник, марта 19, 2024
Важное

ОТЯЖЕЛЕНЬ РАЙОНОНЬ САБАНЦЕЛЕ ВЕЛЕСЬ АВОЛЬ ВИШКИНЕТНЕСТЭ. ТЕЧИНЬ ВЕШЕМАТНЕНЬ КОРЯС ТЕСЭ УЛИ ВЕСЕМЕСЬ ВАДРЯ ДЫ УЦЯСКАВ ЭРЯМОНТЬ ТУРТОВ. УЛИТЬ ВАЖОДЕМА ТАРКАТ, ТЕСЭ ПОКШ ПУТОВКСОЗО ВЕЛЕНЬ ХОЗЯЙСТВАНЬ ПРЕДПРИЯТИЯНТЬ – «САБАНЧЕЕВСКОЕ» ООО-нть, ВАЖОДИТЬ ШКОЛА, ЭЙДЕНЬ КУЖО, МЕДПУНКТ ДЫ БИБЛИОТЕКА, УЛИТЬ ЛАВКАТ. ВЕСЕМЕСЬ ЛАДЯЗЬ ЭРИЦЯТНЕНЬ КУЛЬТУРНОЙ ОЙМСЕМАНТЬ ТУРТОВ – РОБОТЫ КУЛЬТУРАНЬ КУДО.
ДУХОВНОЙ ЭРЯМОНТЬ ТУРТОВГАК УЛИ ВЕСЕМЕСЬ – ВЕЛЕНТЬ КУНШКАКУРОСО, ПАНДОНТЬ ПРЯСО МЕНЕЛЕВ ЭСЬ СЁЛМОНЗО ВЕНСТИНЗЕ КАШТАНСТО АШТИЦЯ МАЗЫЙ ЦЕРЬКОВАСЬ. СВЕТЯЗЕЛЬ СОН 2009 ИЕСТЭ ДЫ КАНДТНИ ТРОИЦКОЙ ЛЕМЕНТЬ. ВАНА УШ КОТО ИЕТЬ НАСТОЯТЕЛЕСЬ ТЕСЭ ОТЕЦ ДМИТРИЙ (МОЛЧАНОВ). АВОЛЬ УМОК МИНЬ СОДАВТЫНЕК САБАНЦЕЛЕ ЭРЗЯНЬ ВЕЛЕНТЬ ДЫ УЛЬНИНЕК ИНЖЕКС МОЛЧАНОВТНЕНЬ ЛАМО ЭЙКАКШОНЬ ТРИЦЯ СЕМИЯНТЬ КЕДЬСЭ.

Дмитрий ды Ирина Молчановтне чачсть-кассть Литвасо ды Мордовиядонть марсесть ансяк раськест пельде, конат эрясть эрзя-мокшонь ёнкссонть. Весть од ломантне арсизь содавтомс республиканть ды састь инжекс бабаст туртов. Кода ёвтни отец Дмитрий, сакшность даволковсто. Ушосонть ульнесь алкуксонь теле ды Саранск ошонь куротнесэ ульнесть ловонь шушмот. Од ломантненень ошось марявсь истямо мазыекс ды вадрякс, сон тердсь эсь сэтьмечисэнзэ, ды сынь алкукс арсезевсть самс тей эрямо. Шкась ютась, од ломантне тусть мекев тиринь Литвав, ансяк Мордовиясо эрямодо мелесь эйсэст эзь кадно.

Зярыя шкань ютазь отец Дмитрий таго сы Саранскоев, вастови тесэ Мордовиянь сестэнь митрополитэнть Варсонофий марто. Тонась од ломаненть кортасы самс эрямо тей, алты тензэ приход. Ды кавто недлянь ютазь Молчановтнень од семиясь сы Мордовияв. Те ульнесь 2001 иестэ.

– Вана истя, сынек кавто недляс бабанень инжекс ды кадовинек свалшкас, – ёвтни Дмитрий батюшкась. – Митрополитэсь валонзо кирдизе, макссь тень приход Ромодановань районсо. Эряви меремс, приходось ульнесь аволь шождатнестэ, роботамс савсь ламо. Зярдо Мордовияв сынек, матушкась ульнесь пешксесэ, ды зярыя шкань ютазь чачсь васень эйкакшонок – Иван цёранок. Ней жо минек касыть сисем тейтерьканок-цёрыненек.

Эряви меремс, республикав самодонть мейле важодема тарка сеске муевсь Ирина матушканть туртовгак. Сонзэ, консерваториянь музыкальной образования марто, од специалистэнть покш мельсэ саизь Ромодановань музыкальной школав. Сон покш мельсэ кундась тевентень ды эйкакштнень марто важодемась тензэ пек вечкевсь.
Зярыя шкань ютазь отец Дмитрийнень од приход максыть Чаунзань районсо, мейле Орданьбуесэ. Те шкантень Молчановтнень семиясь уш кассь, эйкакштне ламолгадсть.

– Эринек Орданьбуень Тургенева посёлкасо, матушкась теске важодсь музыкальной школасо, эйкакштне – кие школасо тонавтнесь, кие эйдень кужов якась. Мон топавтынь эсь тевем. Эрямось мольсь, – корты Дмитрий батюшкась.

2014 иестэ отец Дмитриень кучсызь Отяжелень райононь Сабанцеле велев. Сон карми тосонь Троицкой церьковань настоятелекс. Васень шкастонть семиясь эрясь тоско, Тургеневасо. Отец Дмитрий жо службань ветямо ардтнесь Сабанцелев, теке шкастонть лездась Орданьбуень ды Отяжелень Епархиянь епископонтень Вениаминнэнь, косо течинь чис важоди пресс-секретарекс. Ды, кода тешксты, чить топавты церьковань ды кудоютконь тевтнень, веть важоди статьятнень лангсо, конатнень ладси Епархиянь сайтэнтень ды социальной сетень лопатнес.

– Зярыя шкань перть Сабанцелесэ важодезь, чарькодинь, велесь тукшны мелезэнь, эрицятне вадрят, седеймарицят. Вадря эрямонть туртов ули весемесь. Ды, сехте прявтось – ули школа ды эйдень кужо. Мезесь минек, ламо эйкакшонь триця семиянть туртов – прявт тев, – ёвтни Дмитрий батюшкась.

Истя Молчановтнень семиясь кармась эрямо Сабанцелесэ. Тонавтнесть велесэ эрямонтень, тесэнь койтненень-кирдатненень. Отец Дмитрий жо арсесь эсь кудонь стявтомадо, косо эрьва нупалесь карми ёвтнеме ансяк тонь семиянть эрямодо, конась карми кирдеме тонь малавиксэть оймеёжонть. Те бажамонть топавтомантень эрявсть кавто иеть. Комсьнилее ковт отец Дмитрий эсь вийсэ тейсь тиринь кудонть, эсь семиянь эрямо нупаленть. Арсизе весементь педе-пес, кунсолынзе эрьванть мельтнень-бажамотнень, кармавтоматнень. Кудось лиссь кенярксокс семиянть ды дивамокс велень эрицятнень туртов. Кавто этажсо мазыйкась эсь юрсо кирди весементь: азораванть туртов – покш паникудо, косо ули пек лездыця ды эрявикс неень шкань техника, шлямонь-нардамонь туртов комната, косо весемесь арсезь цёрынькатнень, тейтерькатнень ды покштнень туртов, оймсемань-удомань туртов нупальть. Кудонть теемасо Молчановтне тевс нолдызь государстванть пельде сыненст явозь лезксэнть – федеральной ды республиканской авань капиталтнэнь. Ды кода тешксты Дмитрий батюшкась, сынст семиянть туртов те кармась а берянь лезксэкс.

– Течинь чине эйкакш марто семиятненень минек масторсонть явови эрьва кодамо лезкс, – корты отец Дмитрий. – Минек семиянтень а беряньстэ лездасть авань капиталонь государственной программатне. Сертификатонок ульнесть кода федеральной, истя республиканской авань капиталонь программанть коряс. Весе неть ярмактне нолдазельть кудонть строямс. Теке марто семиятненень лездамга Российской Федерациянь Президентэнть В.В.Путинэнь сёрмадстозь меельце од Указтнэ тагояк улить а берянекс.

Кода уш тешкстынек икеле, Молчановтнень семиясо касыть сисем эйкакшт. Покшось Иван – Н.П.Огарёв лемсэ МГУ-нь биотехнологиянь ды биологиянь факультетэнь 1-це курсонь студент. Елизавета пряды 10-це классонть. Покш мелезэ молемс тонавтнеме Пензань К.А.Савицкий лемсэ художественной училищав. Тейтерьканть ули ёрокчизэ артомасонть, Пензань те школась сови вадрятнень юткс. Александра, Татьяна ды Глафира башка мель явить музыкантень, налксить аккордеонсо ды фортепианасо. Николай – эйдень кужов якиця. А вана сехте вишкинесь – Мария, конантень ансяк зярыя ковт, весе шканть зярс ютавты аванзо марто. Эйкакштненень пек вечкеви велесэ эрямось ды тесэнь школасо тонавтнемась. Эйкакштнеде, Тургеневанть коряс, школасонть аволь ламо, уроконть шкасто мель явови эрьвантень, секскак тонавтнить весе вадрясто ды покш мельсэ.

Теке марто, эряви меремс, Молчановтнень семиясо эрьвась музыкантень яви покш мель. Тесэ покш путовксозо азораванть – Ирина матушканть. Декретс лисемадо икеле сон ардтнесь роботамо Орданьбуень (Тургеневасо) искусствань эйкакшонь школав, тонавтсь сольфеджио. Ней жо, вишкиненть марто кудосо аштемстэ, седе ламо шка яви эсь эйкакштненень ды тонавты эйсэст музыкань содамочитненень. Секскак эйкакштне эсь ёрокчист невтнить эрьва кодамо пелькстамосо, яксить районной ды республиканской мероприятиятнес. Теке марто эрьва недлячистэ ды кенярксчистэ морыть Сабанцелень Троицкой церьковань хорсо.

Молчановтнень ламо эйкакшонь триця семиясь умок уш кармась Сабанцеле велень пельксэкс. Тесэ эрямось сыненст пек вечкеви ды веленть марто сынь сюлмить эсь вандынь чинть.

Юлия ЕРЕМИНА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».