НАДЕЖДА НИКОЛАЕВНА БЕРЕЗИНА 41-це № ДОМОУПРАВЛЕНИЯНТЕНЬ САСЬ ВАЖОДЕМЕ 1997-це ИЕСТЭ, СЕСКЕ АРАВТЫЗЬ УЧАСТКАНЬ МАСТЕРЭКС. 23 ИЕТНЕ ЛИВТЯЗЬ ЛИВТЯСТЬ, ДЫ ЗЯРДОЯК ЭЗЬ САКШНО МЕЛЬ ПОЛАВТОМС ТЕ ТЕВЕНТЬ, МУЕМА МЕЗЕЯК ЛИЯ, СЕДЕ ШОЖДА.

– Важодеме тей сынь кода-бути апак учо, – корты Надежда Березина. – Неинь яволявтома, домоуправленияв эрявить важодицят. Арсинь, мекс бу а варчамс. Саимизь участкань мастерэкс. Ушодынь роботамо ды эзинь арсеяк, стака, мелявксов тевесь тень вечкеви.

Надежда Николаевнань вановт ало важодить комськавксово ломанть: слесарть, дворникть ды подъездтнэсэ киякстнэнь шлицят-урядыцят. Ды сонзэ участкантень совить ламо этажсо кемгавксово кудот, конатнесэ эрить кавто тёжадо ламо ломанть.

– Тевтнеде теемс сави ламо. Эряви ваномс, кода урядавить кудотнень перька таркатне ды подъездтнэ, теке марто эрьва мастерэнть ули участказо, конась истя жо сонзэ вановт ало. Эряви меремс, мартон важодицятне пек парсте содасызь эсь тевест, секскак кодаткак мелявкст мартост а лиснить. Покш робота ветятано домкомтнень марто, сынь миненек пшкалить куш кодамо кевкстема ды тев марто. Ламо роботамс савкшны документтнэнь марто. Видьстэ меремс, тейтяно малав весементь. Ансяк монь туртов неть тевтне кода-бути а марявитькак, роботам пек вечкса, – корты Надежда Березина.

Теке марто Надежда Николаевна тешкстызе, роботась ламосо вечкеви сень коряскак, пек паро коллективесь ды чарькодиця прявтось.

– Покш сюкпря минек прявтонтень. Николай Фёдорович Сайгашкин – ёроков ды чарькодиця прявт. Эрьвантень кандови ломанькс, эрьванть чарькодьсы. Сон пурнась истямо коллектив, конанть марто важодемась – покш уцяска, – кемекстызе Надежда Березина.

Юлия Еремина
Фотось Э.Ретунскиень