Вторник, марта 19, 2024
Важное



2000 иетнестэ минек телевидениясо (Мордовиянь ГТРК-со) ульнесь эйкакштнень туртов «Клу­бочек» передача. Ветясть сонзэ од тейтересь Татьяна вейсэ Алина тейтерьканть марто. Передачась ульнесь пек вечкевикс ды сонзэ покш мельсэ учость аволь ансяк вишкинетне, весе покштнеяк.



Шкась ютась уш аволь аламо, ансяк шкинемань толось те тейтерь-аванть седейсэ эзь лепамо ды творчестванть марто сон юты эрямованть. Течи эсь ловныцятнень минь содавтсынек ёроков, превей ды эрьва тевсэ дока тейтерь-аванть Татьяна Лисевцева марто.

- Мон чачинь Саранскойсэ. Трясь- кастсь авам эйсэнь ськамонзо. Нама, сонензэ а шождаль монь кепетемс, ансяк тень туртов тейсь весементь. Монь авам - весень туртов невтема. Пек тантейстэ пиди-пани ды валмеревксэсь «Узерьстэ каша пидемс» - те сондензэ! - корты Та­тьяна. - Истя жо кода бабамгак, авам вадрясто коды, сты, викшни. Сонзэ туртов виень коряс куш кодамо тевесь. Тень коряс эйдень кужосо кенярксчитнестэ монень максыльть прявт рольтнень, весе содасть: авам монень сты мазыйдеяк мазый ды лия ёнов а молиця оршамопельть. Школасо тонавтнемстэ минь сонзэ марто мезть ансяк эзинек анокста: артынек лаз лан­га, карандаштнень-ручкатнень туртов тейнинек путомкат.

Артомань туртов альбомтнеяк, дневниктнеяк, гербарийтнеяк - весемесь ульнесь аволь кода весень. Сынь теезельть мазый вельтявкс марто, потсонтькак весемесь топавтозель парсте. Мезекс мон тень весементь ёвтнян? Паряк, секс, што весементь тень ко­ряс мон касынь пек творческой ломанекс.

Татьяна уш вишкапингстэ пек вечксь артоманть. Лавкасо ламо рамицят, Татьяна весенде ве ёно кодамояк конёвпанкскес мезеяк арты. А стяко крёстнавазо кортыль: блокноттомо ды ручкавтомо тейтерьканть эзь некшне: «Ансяк сы ды уш а неяви, а маряви. Киякс лангсо мадезь мезеяк рисови».

- Монь течис ванстовсть эйкакшпорань весе альбомтне, конатнес артынь, - ёвтни Татьяна. - Истямо мельспаро ванномс сынст ней... Вана эйдень кужосо кенярксчи, тесэ редяви се шкань квартиранок. Аволь умок тейтерькан марто ванкшнынек сынст, пейдинек.

Татьянань авазо, зярдо редизе артомантень тейтерьканть вечкеманзо, кото иесэ максызе изостудияс. Мейле ульнесь художе­ственной школась, косо тейтересь тонавтнесь декоративно-прикладной отделениясонть. Тосо тонавтсть викшнеме, кодамо, артомо ды натой коцтонь кодамояк. Самай тосо тейтересь кармась содамо мокшэрзянь викшневкстэнть. Сынь викшнесть нардамот, салфеткат ды някатнень лангс оршамопельть.

- Мон вишкапингстэ саезь пек бажинь улемс вишка классонь тонавтыцякс. Секскак художественной училищанть прядомадо мейле молинь тонавтнеме С.М.Киров лемсэ Ицялонь педагогической училищав. Кочкия школьной отделениянть, косо покш мельсэ пурнынь тонавтыцянь тевень содамочитнень. Педучилищанть марто монь сюлмавозь сехте валдо, сехте паро мельть-арсемат. Ёвтан покш сюкпря эрьва тонавтыцянтень сеть содамочитнень кисэ, конат монень максовсть училищасонть.Тесэ важодить эсь тевень алкуксонь профессионалт.

Тонавтыцянь тевсэнть шкинемавтомо ковгак. Минь тесэ морынекак, киштинекак, тонавтнинек музыкальной инструментсэ налксеме (мон вете иеть тонавтнинь баянсо налксеманть), арсинек-ладинек эрьва кодамо невтемат. Кодамо покш мельсэ якинек практикатнес! Кодамо ульнесь мельспаро варчамс эсь вийтнень тонавтыцянь тевсэнть.
А эштё педучилищасо тонавтнемстэ минь эрьва тундо ардтнинек «кузнэс». Те - астувтовикс ёжомарямо. Минек озавтылимизь грузовой машинань кузовс ды гитара мельга моразь ардылинек васоло вирев Смольнойсэ кузонь ды пичень видьмексэнь озавтомо. Мон каштанчисэ аштян сень коряс, эрямон перть озавтынь сядот кузнэть, - корты Татьяна.

Педучилищасо тонавтнема шкастонть Татьяна вейсэ лия студенттнэнь марто пурнакшность киштемань коллектив, конась га­строль марто ардтнизе весе Ицялонь райононть, ды ульнесть «Шумбрат, Мордовия!» фестивалень лауреатокскак.

- Кодат вадрят ульнесть шкатне! - тешксты Татьяна. - Кеман, алтавлияяк прям учителень профессиянтень, эйстэдень лисевель алкуксонь тонавтыця.
Ансяк, зярдо прядыя педучилищанть (1998 иесь), важодема таркатнень коряс пек стакаль. Ледстнян, пекставильть эйдень кужотне, школатнесэ киртильть тонавтыцятнень. Секскак монь мелентень, улемс вишка классонь тонавтыцякс, топавтовомс эзь саво.

Теке марто уцяскась мизолдозевсь тейтерентень. Сон кармась роботамо тонавтыцякс «Ясли-сад - начальная школа № 104» МДОУ- сонть. Те ульнесь ды ловови нейгак пек вадря кужокс, конань прявтсо Раиса Александровна Киселёва, кона весе эрямонзо алтызе педагогонь тевентень ды эсь важодицятнень пельде вешсь текень.

Татьяна Лисевцева тонавтсь шкинемантень весе вишкинетнень. Сынь варчнесть артомань весе ёнкстнэнь. Мейсэ ансяк эзть арто - сурсо, суресэ, ягодасо, модамарьсэ, салсо, кварцень човарсо... Юткошкасто жо мазылгавтсть группатнень ды целанек кужонть потмонзо.

- Те шкас седейлембе марто ледстнян те кужосонть важодема шканть. Ды покш мельспаро ваномс, кода эйкакштне, конатнень тон тонавтыть, кастыть-трить эсь эйкакштнень. А монь течис ванстовсть сынст роботатне, конатнень сынь артсть 4-5 иесэ, - тешксты Татьяна Лисевцева.

Эйдень кужосо важодемстэ Татьяна заоч­на тонавтнесь М.Е.Евсевьев лемсэ МГПИ-нь филологиянь факультетсэ, пештясь эсь содамочитнень. Ды неть содамочитне лездасть тензэ изнямс «Иень воспитатель» пелькста­мосонть. Те ульнесь 2001 иестэ. Эйдень кужосо важодема шкастонть Татьяна теевсь содавиксэкс «Мордовия» ГТРК-нь сестэнь прявт режиссёронть В.А.Иванов марто, кона, тейтеренть творческой ёнкстонть содазь, тердизе телевиденияв эйкакшонь туртов передачань авторокс ды ветицякс.

- Эштё вейке а стувтовикс шка ды лезэв опыт монь биографиясонть, - тешксты Татьяна. - Минь вейсэ вишка соведущеенть Алинань марто эрьва недля лиснинек эфирс ды тонавтынек эйкакштнень артомо, мезеньгак анокстамо.

Вейсэ сынст марто тонавтынек азбуканть, вастынек инжетнень - творческой коллективтнень, конатнень ютксо «Карусельки» вокальной студиясь, «ТВ», «Пилигрим» киштемань коллективтне ды ламо лиятне. А эштё минек программань инжекс ульнесь В.В.Жириновский, конань тонавтынек артомо суресэ, ды С.В.Кириенко, конань марто теинек картинат кварцень човаронть вельде. Алина кассь, сонзэ таркас сась лия ёроков эйкакшось, Ваня. Минь сонзэ марто ветинек передачатнень ды тонавтынек эйкакштнень шкинемантень. Ульнесь покш мельспаро, кода эфирдэ мейле сат важодема таркав эйдень кужов ды эйкакштне кенярдозь пижнить, кода сынь тонь вансть телевизорга. А воспитательтне, бути менстизь передачанть, кевкстнесть, мезе минь теинек, штобу нолдамс тень эсь важодемасонть. Ансяк эрямось ладявсь истя, эйдень кужостонть савсь туемс.

Ней вана уш кемготово иеть важодян «ЛВЗ «Саранский» предприятиясонть ды покш каштанчисан, прась уцяска улемс истямо содавикс коллективень пельксэкс. Нама, роботась овсе аволь творческой, ансяк тесэяк муян эсь шкинеманть невтемантень ёнкс.
Покш мельсэ невтнян эсь ёрокчим пелькстамотнесэ, конат ютавтовить кода пред­приятиясонть, истя сон­зэ томбалеяк. Истя, тейтерькан марто изнинек стенгазетань пелькстамосонть, кона алтавсь ми­нек предприятиянь 120 иетненень. Аволь весть изнякшнынь пелькстамотнесэ, конатнень ютавтни минек Профсоюзонь организациясь ды сонзэ прявтось Т.В.Дувакина.

Юткошканть, конадонть Татьянань аволь ламояк, истя жо алты шкинемантень. Зярс тейтерьказо вишкинель, ламо эрьва кодамо теевкст анокстась васня эйдень кужов, мейле школав. Ней тейтерькась 7-це классо ды весементь теи сонсь. Ансяк Татьянань шкинемась а кады. Секскак свал мейсэяк котьми, мезеяк теи. Ве шкане мельс пек тукшнось тензэ топиариянь искусствась. Тейнесь «уцяскань чувтынеть». Ламонень сынь тукшность мельс ды энялдыльть теемс. Лисевцевтнень семиясо покш тевесь - Инечинтень ды Од иентень анокстамось. Эрьва ие бажи кенярдовтомс ды дивавтомс малавикстнэнь од лувсо мазылгавтозь алсо, лия ёнов а молиця Од иень открыткасо ды сувенирсэ, конат, нама, теезь эсь кедьсэ.

- Ней, ламо иень ютазь, пек парсте чарькодян, кодамо эрявикс ёнксось - котьмамс вечкевикс тевсэ. Косо-бути оймесэнь мон янксян, зярдо-бути кадыя профессиям ды туинь эйдень кужосто. Эдь кодамо покш уцяска, зярдо роботась мелень коряс. Эсь тейтерень туртов арсян истямо тев, конась карми со­нензэ вечкевикс. Ней сон яви мель балетэнтень, тонавтни Мордовиянь эйкакшонь хореографиянь школасонть. Покш мельсэ ловны балеттэнть, яки театрав, соды балетэнь содавикс артисттнэнь биографияст. Сон бажи эрямонзо сюлмамс те искусстванть марто. Нама, те покш важодема, ансяк мон, кода ава, бажан, штобу сонзэ весемесь топавтоволь ды эсь эрямонзо сюлмавлизе вечкевикс тевенть марто. Эдь зяро истят историят, зярдо эйкакшось бажи творческой профессиянтень, тетятне-аватне жо кармавтыть кочкамс лия тев. Ды неть эйкакштне, сень таркас, штобу теевемс содавикс творческой гениекс, кармить свалшкань экономистэкс, юристэкс. Эсь эйкакшонтень арсян истямо тев, конась ули сонзэ коряс, конась а карми янксемакс!

Юлия ЕРЕМИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».