Вторник, марта 19, 2024
Важное


Ине Отечественной войнась кадсь покш тешкс масторонь эрьва семиянть, эрьва ломаненть эрямос. Эйкакшнек-сыренек корштасть войнань сэпей ведтенть. Ютасть уш малав 75 иеть Изнямонь чистэнть, ансяк зыянов неть шкатне зярдояк а стувтовить, зярдояк а нардавить превстэ.



Елена Петровна Вязова Ине Отечественной войнань ветеран. Сон эйкакшпорасто варчизе кажов ды зыянов эрямонть танстензэ. Войнав понгсь овсе тейтерькакс, зярдо тензэ топодекшнесть ансяк 15 иеть.
Елена чачсь Украинань Николаевской ёнксонь Воскополье велесэ. Авазо-тетязо эрямостонть тусть пек рана ды 1932 иестэ тейтерькась понги Сталинградонь эйкакшонь кудов. Ушодовсь войнась, эрямось пек стакалгадсь. Эйкакшонь кудонь седе покш эйкакшкетне эсь прянть ды вишкинетнень андомга якильть маласо колхозтнэс лездамо. Истя, 1942 иень умарьковонь вейке истямо чистэ, Елена лия ялганзо марто ульнесть колхозсо, лездасть тикшень урядамсто. Ды зярдо велявтсть важодемстэ, эйкакшонь кудост уш арасель. Сонзэ эвакуировизь Молотов (ней Пермь) ошов. А тейтерькатне лиядсть паксяс.

– Мезе теема ды ков молема эзинек сода. Галя ялгам марто молинек военкоматов, энялдынек саемс минек фронтов, – ёвтни Елена Петровна. – Военкомось кевкстимизь, зяро иенек. Ялганень уш ульнесть кемгавксово, иень коряс сон ладясь. Зярдо жо мон ёвтынь, што иень кеветее. Тонась сеске мерсь, вишкинян.

Тейтерькатне вешнесть удома тарка. Зина патясь, кона приминзе, сеске редизе сынст апаронть ды тейтерькатне апак сёпо весементь ёвтнизь.
Валске марто Зина патясь ёвтась тенст апаростонть лисемань ки – эряви ламолгавтомс эсь иетнень. Сестэ весемесь удалы ды сайсызь фронтов.

Тейтертне истя тейстькак, Еленань кеветее иетнес путсть эштё колмо. Ансяк вана военкоматов мекев эзть моле. Сталинградонть келес кармасть вешнеме яволявтомат, косо эрявсть ломанть фронтов. Истямось муевсь.

– Сынек воинской частев. Мартонок кортыця капитанось, фамилиязо ульнесь Богданов, васняяк истя жо кевкстимизь иетнень коряс. Ёвтынек, тенек 18 иеть. Ды минек саимизь. Монь седейсэнь ульнесь истямо покш кеняркс, натой, киштинь, – ёвтни Е.П.Вязова.

1942 иень таштамковстонть саезь тейтертне служасть фронтонь госпитальсэнть. Топавтсть весементь мезе кармавтыльть: муськильть оршамотнень, лездыльть ранявозтненень. Санитарной отрядонть марто ульнесть Сталинградонть ало, 1943 иестэнть III Белорусской фронтонь 5-це армиянть лувсо – Ржевсэ. Войнань китне ветизь Литванть ды Пруссиянть пачк ды пачтизь Кенигсбергенть видьс. Тесэ отрядонтень максозель приказ сыргамс Дальней Востоков.

– Изнямонь чинть минь вастынек килангсо, ульнинек Москва-Сортировочная станциясонть. Эрьва ёндо марявсть весёла пижнемат, пейдемат, весе кенярдсть. А мон авардинь. Молемс тень ульнесь а ков, кияк косояк эйсэнь эзь учо, – ёвтни Елена Петровна. – Апаром редизе однэ офицэрэсь. Кевкстизе тувталонть. Ды мон весементь ёвтния. Пейдезь ладсо кортнинек ды сон саимим никс.

Офицерэсь ульнесь Василий Тимофеевич Вязов. Эсь отрядонть марто сон истя жо ардсь Дальней Востоков. Тосо од ломантне урьвакстсть ды II Дальневосточной фронтонь 5-це армиянть лувсо эсь службанть кандсть 1948 иенть самс. Мейле велявтсть Василий Тимофеевичень тиринь ёнксов – Мордовиянь Орданьбуень райононь Спасские Мурзы велев. Василий Тимофеевич весе эрямонзо перть важодсь школасо прявтокс, Елена Петровна жо – Орданьбуень Куйбышев лемсэ колхозсонть. Важодемадо эзь пеле, кундыль куш кодамо тевс ды пенсияс лисемадо мейлеяк эштё кемень иеть эзизе кадно колхозсо роботанть.

– Мирдень марто эринек ведьгемень иеть, тринек-кастынек колмо эйкакшт. Зярдо сон тусь эрямостонть монь эстензэ саимим Галина тейтерем. Ды ней вана уш зярыя иеть эрян Ельниксэ. Свал арсян эрямодонть. Кодамо сэтьме ды паро сон ней, – тешкстызе меельцекс Елена Петровна.

Юлия Еремина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».