Мордовиянь Сёрмадеень вейсэндявксонь прявтокс аравтозь эрзянь поэтессась, лия кельстэ ютавтыцясь ды редакторось Татьяна Петровна Швецова (Мокшанова).

Татьяна Петровна – Россиянь Писателень союзонтень совиця, поэзиянь кавто вейспурнавксонь автор: «Эрьгекерькс» («Ожерелье») ды «Толонь лопат»; од автортнэнь туртов Прявтонь литературной премиянь лауреат.

Татьяна Швецова чачсь 1984 иень январень 9-це чистэ. Неень шкасто сон важоди «Чилисема» эрзянь кельсэ эйкакшонь ды од ломанень журналонь ответственной секретарекс. Сермады рузонь ды эрзянь кельтнесэ стихть ды ёвтнемат, эрзянь кельс ютавты рузонь, удмуртонь, венгрань, украинецэнь автортнэнь стихест. Истя жо теке шкастонть тонавтни Н. П. Огарев лемсэ МГУ-нь финнэнь-угрань литературань кафедрань аспирантурасо.

– Монь покш мелем улемс лезэвекс эсь раськенть туртов, ды кеман, важодемам лезды тиринь келенть ванстомасо ды виевгавтомасо, – мерсь Татьяна Петровна.

Ледстясынек, теде икеле республикань Сёрмадеень вейсэндявксонть прявтсоль Мордовиянь заслуженной поэтэсь Алексей Громыхин, конась аволь умок тусь эрямостонть.