Вторник, марта 19, 2024
Важное


Видькстан, аволь сеске муевсь кудось, конань лангсо сёрмадозь «Муниципальное дошкольное образовательное учреждение «Детский сад №91 компенсирующего вида». Паряк, секс: седе сэрей кудотнень потсо сон ашти прок кекшезь. Тов тердимим Р.С.Зорькина, кинь марто содатано умок ды кирдтяно кеме сюлмот. Раиса Сергеевна те эйдень кужосонть важоди музыкальной тевтнень ветиекс. Секс, весе сень эйсэ, кодат вастовомат, чокшнеть ды лия мероприятият ютавтовить тосо, ули путовксозо сонзэяк. Се чистэнтькак (те ульнесь сундерьковонь 21-це чистэ) сынь ютавтсть «Монь кудораськем» лем ало тетятнень-аватнень марто вастовома, кона алтазель Шкинень Авань чинтень.


Васня эряви ледстямс: Авань чи (монень маряви сонзэ седе виде ули лемдемс Шкинень Авань чикс) икеле арасель. Аватнеде ледстнесть ды сыненст поздоровт ёвтнесть Мартонь 8-це чистэ, конань тешкстыть весе масторлангонть келес. А вана эйдень трицятненень, лиякс мерезь, шкинень аватненень алтазь чинть Россиясо кармасть тешкстамо ансяк 1998 иестэ саезь, зярдо Алевтина Апарина депутатось ёвтызе арсеманзо, кона тусь се шкань президентэнть Б.Ельцинэнь мельс ды сон нолдась Указ. Те коесь ней кеместэ кармась совамо эрямозонок. Сонзэ тешкстамо чикс ловови сундерьковонь (ноябрянь) меельце таргочись (недлячись). Лисни, тедеде сон сави 24-це чинтень. Тень лангс апак вано, ламо таркава сонзэ кармасть тешкстамо седе икеле читнестэ. Саранск ошонь 91-це № эйдень кужосо те покш чись ютавтозель 21-це чистэ. Сон, кода уш меринек, сюлмавозель кудораськенть (семиянть) марто.
«Кудораськесь – те авам, кудораськесь – те мон, тетям, сырькаем, ялаксом, патям, сазором…» – кадовсть превезэнь вейке валморосто валтнэ. Эйсэнзэ ды ламо лиятнесэяк васенце таркасо ашти АВА валось. Алкукскак, авась – эрямонь максыця, эйдень триця. Сонзэ лавтовонзо лангс пракшныть весемеде ламо мелявкстнэ ды стакачитне. Эрьва эйкакшонть туртовгак сехте малавикс ломанесь – те сонзэ чачтыцязо, шкинень авазо. Ды ансяк шкинень аванть пельде вечкемась эйкакшонтень лезды касомс виевекс, превеекс, весемень цидярдыцякс. Но авантеньгак эряви лезкс. Сехте пек сестэ, зярдо кудос сови кодамояк кажо. Мезеяк а теят. Эрямосонть аволь ансяк сэтьме ды лембе вармат пувить, кандыловткак ютнить моданть ланга. Кода стака илязо уле, эряви эрямс. Ков седе шожда авантень карми, зярдо тензэ лездыть истят ломанть, кодат важодить Саранск ошонь 91-це номер эйдень кужосо…
…Лембе ды валдо нупальсэнть, косо ютась чокшнесь, аравтнезь стольтнень экшсэ озадотнень ютксо малав весе ават. Кить седе сыреть, кить – овсе однэть. Сынь – аволь косто-бути сазь ломанть. Тей сынь ветнить эсест эйкакшост, конатне касомань, превень таштамонь коряс кадновить эсест эйшка пакшатнень эйстэ. Тесэ сынст тонавтыть чарькодиця педагогт, психологт, мельгаст ваныть те тевентень анокстазь ломанть. Сындест коллективсэнть весемезэ 42. Ды, кода мерсь эйдень кужонь прявтось Е.В.Кузина, весе сынь паро специалистт, содасызь ды вечксызь тевест.
Ды те алкукс истя, мезесь неявсь се вастовомасонтькак. Сень эйстэяк, кода превейстэ арсезель сценариесь, сень эйстэяк, кода сон анокстазель ды ютавтозель. Марявсь, весе коллективесь тесэль. Ды кияк эйстэст эзь ульне ве ёно ваныцякс. Эрьвась налксесь эсензэ ролензэ. Ветицянь тевенть топавтсть Е.Н.Наумова ды З.А.Кочетова. Ды кода! Лембе ды седейс токиця валтнэде весень чамаст валдомгадсть, сонсь нупалесь седеяк лембелгадсь. Седе тов – моро мельга моро. Васенцесь – эйдень кужонь прявтонть Е.В.Кузинань ды Ксения тейтерензэ пельде. Омбоцесь – О.М.Исайкинань ды Даниил цёранзо пельде. Весень мелест седеяк витизе Кузя кудатясь. Сонзэ роленть седе а ков парсте налксизе Л.И.Едукова.
Нувсезь эзть аште инжетнеяк. Сынст туртов ютавтозельть эрьва кодат пря яжамкат, налксемат ды пелькстамот. Весемеде питней казнекс сынст туртов ульнесть эйкакштнень пельде, конат ловность валморот, невтсть киштемань композицият.
– Истят вастовомат бажатано ютавтнемс сеедьстэ, – кевкстемам каршо мерсь Е.В.Кузина. – Те эряви аволь ансяк эйкакштненень, конатне вечкить, зярдо тенст явить покш мель. Те эряви эстест тетятненень-аватненень. Эдь пек стака эрси ськамост цидярдомс весе сеть стакачитнень каршо, конат стякшныть эйкакшост трямсто-кастомсто. Неть валтнэнь пес каднови ансяк ёвтамс седейшкавань сюкпря весень пельде, кить содасызь, мезе истямось эйдень трямось.
Раиса Щанкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».