Кодамо закононь коламонь тев аволь лисе – ули-паронь саламот, ломанень чавомат, ДТП-ть – куш кодамо тевсэнть зыянонь лисема таркасонть васенцекс роботыть эксперттнэ-криминалисттнэ. Сынст важодемадонть ламот содыть кинотнень ды сериалтнэнь коряс. Ансяк вана экспертэнть-криминалистэнть алкуксонь важодемазо пек явови киносотнеде.
Внутренней тевень органтнэсэ важодицятнень кенярксчиденть икеле минь вастовинек Саранск ошка Россиянь УМВД-нь 4-це № полициянь отделэнь Пролетарской районсо важодиця экспертно-криминалистической отделэнь экспертэнть Владислав Владимирович Савелькаев марто. Сон ёвтнесь седе, кода сюлмизе эрямонзо ОВД-сэ службанть марто, ды экспертэнь профессиядонть.
Кода весемесь ушодовсь
– Чачинь-касынь Кочкуровань райононь Од Пурня велесэ. Тосо прядыя школанть ды молинь тонавтнеме Саранск ошонь строительной техникумов. Монь тетям весе эрямонзо алтызе строителень тевентень, сонзэ кияванть бажинь сыргамс монгак, – ёвтни Владислав Савелькаев. – Техникумсо тонавтнеманть прядомадо мейле туинь армияв. Службанть васня ютынь Самарасо (разведывательной батальонсо), мейле Таджикистан Республикань Душанбе ошсо (артиллерийской дивизиононь башка батальонсо).
Армиясто самодо мейле Владислав зярс-бути роботась строителекс. Ялганзо ютксто ламотне жо кандсть службанть силовой структуратнесэ, сеедьстэ ёвтнесть цёрантень тосо важодемадонть, ды сонзэ чачсь мелезэ варчамс молемс Росгвардияв. Службанть туртов сонзэ ульнесть весе вешематне – армиясо служась, физической анокстамозо вадря, ламо иень перть яви мель спортонтень – греко-римской тюремань ёнксонтень.
Саранск ошсо Росгвардиянь структурасонть сестэ таркат арасельть, теке марто Орданьбуесэ эрявсь полицейской водитель, ды Владислав Савелькаев мольсь тов. Те ульнесь 2017 иестэ. Орданьбуесэ цёрась роботась малав кавксо ковт, те шкастонть лиссь тарка Саранскойсэяк ды теке должностьсэнть сон ютась ошов.
Саранскойсэ Росгвардиясо важодемстэ Савелькаев невтизе прянзо аволь ансяк кода паро специалист, невтинзе спортсо ёрокчинзэяк. Структуранть пельде сон ульнесь самбонь коряс ПФО-нь пелькстамотнесэ. Ды кавто иень перть изнякшнось неть пелькстамотнесэ.
Эряви ёвтамс, правоохранительной органтнэс важодеме сазь, 2017 иестэ, цёрась заочна мольсь тонавтнеме Саранск ошонь кооперативной институтонь юридической факультетэв.
Владислав Савелькаевень ульнесь покш мелезэ важодемс силовой структуратнесэ ды теке марто а аштемс ве таркасо. Сон бажась кастомс эсь содамочитнень ды касомс должностьсэяк. Истя, 2019 иестэ, весементь арсезь, ютась важодеме МВД-нь системас. Тосо ушодсь патрульно-постовой службастонть.
– ППС-сэ важодемась – пек эрявикс тев ды, монь койсэ, внутренней тевень органтнэсэ эсь кинть эряви ушодомс самай тестэ, штобу седе тов весементь чарькодемс вадрясто. Тесэ тонадат пек ламонтень, – тешксты Владислав Владимирович.
ППС-сэ зярсыя важодемадо мейле Савелькаев ютась «Подразделение охраны и конвоирования подозреваемых и обвиняемых» отделс. Тосо сон ушодсь полицейскойстэ, а зярыя шкань ютазь кармась важодеме полицейскоекс-кинологокс.
– Кинологокс важодеме апак тонавтне кияк а нолдатанзат. Тевесь пек покш, кисканть марто тыненк вейке-вейкень эряви чарькодемс пек парсте, – ёвтни Владислав Владимирович. – Тонавтнеманть ютынь дистанционной лувсо Уфань полицейскойтнень-кинологтнень анокстамонь академиясонть. Весе экзаментнэнь максынь парсте. Теке шкастонть кискатнень марто важодемантень анокстынь монськак. Кортынь важодиця кинологтнень марто, пурнынь весе информациянть кискатнень коряс. Ды ансяк теде мейле карминь роботамо. Важодинь Рейчел лемсэ немецкой овчарканть марто. Кискась ульнесь пек превей, чарькодиця.
Владислав Савелькаев эзь аште ве таркасо ды аламонь-аламонь тонавтнесь МВД-нь системань профессиянтень. Сон эзь учо, зярдо ковгак тердьсызь, свал ёвтыль мелензэ сонсь. Истя, Северной Кавказонь Дагестан Республикав служебной командировкавгак мольсь эсь олясо. Те ульнесь 2020-2021 иетнестэ. Командировкасо цёрась ульнесь пельиень перть. Эсь службанть сынь кандсть Джемикентэнь контрольно-постовой пунктсонть.
Те командировканть кисэ В. В. Савелькаев казевсь «За службу на Кавказе» знаксо ды МР-ва Россиянь МВД-нь министрань Почётной грамотасо.
2022 иестэ, ВУЗ-со тонавтнеманть прядозь, юристэнь дипломонть марто, Владислав Савелькаев ютась важодеме Саранск ошка Россиянь УМВД-нь 1-це № ОП-в уголовной розыскень полицейской оперуполномоченноень тевс. Кода мерсь Владислав, роботась тосо стака, ансяк те эрявикс школа. Ды пурназь содамочитне пек лездыть тензэ экспертэкс роботасонть.
Экспертэнь важодемась
Зярдо Саранск ошка Россиянь УМВД-нь 4-це № полициянь отделэнь Пролетарской районсо важодиця экспертно-криминалистической отделсэнть чамсь экспертэнь-криминалистэнь тарка, Владислав Савелькаев, кувать апак арсе, ютась тов.
– МР-ва Россиянь МВД-нь Экспертно-криминалистической центрань прявтокс важоди полициянь полковникесь Дмитрий Владимирович Гагарин. Сон алкуксонь профессионал, пек паро специалист. Монь туртов сон кармась примерэкс, – корты Владислав Владимирович. – Покш сюкпря сонензэ, зярдо молинь кортамо, кунсолымим, мейле весементь толковизе. Ёвтнесь важодемань прявт ёнкстнэде.
Экспертэкс важодеманть ушодомадо икеле Владислав ютась стажировка – оперативно-следственной группасо лия эксперттнэнь марто аволь весть савкшнось ардомс зыянов тевтнес чемоданчик марто, косо ули весемесь уликатнень пурнамонть туртов, ванныль, кода ветить важодеманть, мезестэ ушодыть. Теке шкастонть цёрась тонавтнесь уголовной законодательстванть ды весе эрявикс статьятнень, конатне сюлмавозь экспертно-криминалистической тевенть марто.
– Васенце чистэ саезь монень истя тусь мельс экспертэнь-криминалистэнь тевесь, кудовгак сылинь ды тонавтнилинь статьятнень, ловнылинь важодемань ветямонь ёнкстнэнь. Ды ёвтаса, мезеяк эзь полавтово нейгак. Роботась тень пек вечкеви. Нама, те тевсэнть мон эштё овсе аволь кувать, ламо мезе эряви тонавтнемс, чарькодемс, теке марто мон муинь эстень тев мелень коряс. Профессиясь пек мельстуиця, – кемексты цёрась.
Чинь эли вень куш кодамо шкасто следственно-оперативной группанть юрсо экспертэсь-криминалистэсь арды закононь коламонь весе тевтнес, конатне лисить сынст участкасонть. Зыянонь лисема таркасонть сон важодеманть ушоды васенцекс. Пельксэнь-пелькс пурны весе информациянть зыянонь теицятнеде. Суронь отпечаткатне, карсемапельтнень чалгавкстнэ, кодамояк панкске, черь эли лия мезе – весемесь, мезесь седе тов маштови преступлениянть панжомасо, мезеськак а кадови специалистэнть вановттомо.
– Экспертэнь роботась пек мельстуиця, теде башка, стака ды ответственной. Эрявить ламо содамочить. Эдь экспертэнть пурнавт доказательстватнень базась аштить прявтокс закононь колыцянть чумонзо ливтемасо, – ёвтни Владислав Владимирович.
Владислав Савелькаев тешкстась, сынь а стяко лемдевить криминалистэкс-экспертэкс, криминалистической экспертизатне важодемасонть – прявт тев. Истя, криминалистической прявт экспертизатнень ютксто явовить сисем. Дактилоскопиянть вельде (суронь отпечаткатнень коряс) ливтеви лангс зыянонь теицясь; трасологиясь тонавты следтнэнь ды косто сынь саевсть, мертяно, карсемапелень; почерковедческой экспертизась невти ломантнень сёрмадома лувонть; баллистикась – ледниця оружиятне ды сынст сезевемадо мейле кадовкстнэ. Портретной экспертизась ливти ломаненть фото-ды видеоматериалтнэнь вельде. Ули эштё кериця ды ёртневиця оружиянь экспертиза ды документэнь технико-криминалистической экспертиза. Нама, аволь весе эксперттнэ теить весе неть экспертизатнень. Сеедьстэ кочкавить зярыя ды важодить сынст коряс.
– Эксперттнэ-криминалистнэ топавтыть технической ёнксонть – пурныть, тонавтнить, снимить предметтнэнь. Сынь а теить, невтемга, верень эли кодамояк лия веществань анализэнть. Тень теить лия эксперттнэ – химиктне эли генетиктне. Тешкстаса, зярдояк а эрси истя, штобу теемс зыян ды а кадомс кодаткак следт. Лия тевесь, лиясто сынст стака редямс. Эдь тесэ покш тарка саить пертьпельксэнь условиятне, зыянонь теемань умоньчись ды ламо лия ёнкстнэ. Тесэ криминалистэнтень улема седе докакс ды ёроковокс, – тешксты В. В. Савелькаев.
Владислав Савелькаев покш сюкпря ёвты эсь наставникентень, экспертэнь тевентень тонавтыцянтень Алексей Александрович Устиннэнь.
– Сон алкуксонь профессионал, пек вадря эксперт-криминалист. Сонзэ улить малав сисем эрьва кодамо экспертизатнень теемс допусконзо. Мон меревлинь бу, сон лиятнень ёнов а молиця ломань. Истят пек аламо, – мерсь Владислав Владимирович.
Зярдо кевкстинек Владислав Савелькаевень, кодамокс эряви улемс алкуксонь экспертэнтень-криминалистэнтень, сон тешкстась кавксо профессиональной ёнкст: аналитической ёрокчитне, логикась, куроксто арсемась, пшти вановтось, аккуратнойчись, цидярдомачись, эсь содамочитнень ды маштоматнень свалшкань кастомась, технической средстватнень тонавтнемась. А вана сень лангс ванозь, што шкатнень марто полавтови важодема лувось ды технологиятне, эряви а кадовомс тень эйстэяк. Лиякс меремс, вадря экспертэнтень-криминалистэнтень, штобу улемс алкуксонь профессионалокс, эряви тонавтнемс весе эрямонзо перть. Секскак, сы иень мартсто Владислав Савелькаев моли тонавтнеме Волгоградов, тосо ули Российской Федерациянь МВД-нь академия, косо анокстыть экспертт-криминалистт.
– Тонавтнемась, васняяк, эряви эстень. Монь покш мелем кармамс эсь тевсэ алкуксонь профессионалокс, вадрядояк вадря экспертэкс-криминалистэкс. А бути ули мель, арсян, весемесь топавтови, – кемекстась Владислав Владимирович.
Юлия Еремина