Пятница, июля 01, 2022
Важное

Маень 18-це чистэ А. С. Пушкин лемсэ библиотекасо ушодозель «Мордовиянь од вайгельть» республикань литературань фестиваль» од теварсевксэнть топавтомазо.

Проектэнть анокстызь ды кармить топавтомонзо – «Некоммерческое партнерство «Национальный спектр» издателень ассоциациясь ды А.С. Пушкин лемсэ раськень библиотекась (Мордовия Республика) «Культура» национальной проектэнь «Творческие люди» федеральной проектэнть лувсо. Фестиваленть ютавтоманзо туртов ярмактне явозь «Россиянь культурань фондонть» пельде.

Теварсевксэнть топавтомазо карми молеме зярыя ковт. Те шканть перть ютавтовить эрьва кодат вастовомат, пелькстамот. Карми важодеме Литературань лаборатория, косо эсест содамочист кармить кастомо од сёрмадыцятне.

Литературань лабораториянь васенце промксос, конань ветясь А. С. Пушкин лемсэ библиотекань краеведческой отделэнь прявтось Н. В. Бочканова, сакшность вузсо, техникумсо, школасо тонавтницят, од ломанть, кить варчнить виест сёрмадома тевсэнть.
Вастовоманть панжизе А. С. Пушкин лемсэ библиотекань прявтось А. В. Бакулина. Анастасия Владимировна ёвтась лембе валт пурнавозтнень туртов, тердинзе весень покш мель явомс те проектэнтень, конась пек эряви сёрмадомо снартниця од ломантненень, панжи тенст келей ки литературань шкинемасост. Тень туртов яволявтови пелькстамо, косо кармить ванкшновомо сёрмадовксост сеть од ломантнень, кинень топодсть 35-де а седе ламо иеть.

Мордовиянь Сёрмадыцянь вейсэндявксонть пельде паро мельть-арсемат ёвтась сонзэ прявтось Т. П. Швецова. Татьяна Петровна тешкстызе, келя, эрьва раськенть литературазо касы ды кемексты одтнэнь вийсэ, секс эряви теемс весементь сынст анокстамост ды тонавтомаст кисэ.

Проектэнть эрявиксчинзэ лангс невтсь педагогической наукань докторось, профессорось МР-нь высшей школань заслуженной важодицясь А.М. Катороваяк. Александра Михайловна нурькинестэ ёвтнесь, кода молить тевтне минек литературасо неень шкасто. Эряви меремс, сынь аволь кенярксовт. Литературанть туртов, кода аволь весть тешкстазель эрзянь, мокшонь раськень вейсэндявксонь промкстнэсэяк, минек республикасо явови аволь сатышка мель.
Сёрмадыцятне, сехте пек одтнэ, вастневить покштояк покш стакачи марто. Эсест произведения марто книгань нолдамстояк кияк тенст а лезды, тень теемс сыненст савкшны эсест ярмак лангс. Икеле тевтне ладязельть лиякс. Кемекстазель государственной программа, конанть коряс од сёрмадыцятнень кучность тонавтнеме натой Московов, А. М. Горький лемсэ Литературной институтов. Сонзэ прядомадо мейле ламот теевсть паро сёрмадыцякс ды эсест книгатнесэ сюпалгавтызь минек литературанть.

Седе тов Александра Михайловна ловнось покш лекция, конанть вельде минек литературанть касоманзо панжизе ушодксстонзо саезь неень шкантень молемс.
«Мордовиянь од вайгельть» теварсевксэсь поладови седе тов.

Раиса Щанкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».