Вторник, марта 19, 2024
Важное

 

Ожоковонь 18-це чистэ Саранск ошонь Культурань кудосо ютась «Кода эри эрзянь морось?» фильмань невтема. Сонзэ снимизе В.И.Ромашкин лемсэ «Торама» фольклорной коллективесь. Сценариенть анокстызь ансамблянь морыцятне А.Учеваткин, А.Кузнецов ды Нацтеатрань актёрось П.Михайлов. Ули минек вандынь чинек? Те кевкстеманть марто цёратне сыргасть Отяжеле ёнксонь Сабанцелев. Сынь кортасть велень эрицятнень марто, башка мель явсть «Комолькай» велень фольклорной ансамблянтень. Эрьва ёндо невтизь Сабанцелень мазый таркатнень ды кудотнень. Паро валт ёвтавлинек фильмасо кортыцядонть-ветицядонть Павел Михайловдо. Сон тевень содазь ды мельстуезь вети кортамонть, максни кевкстемат, кирди эрявикс лув. Кода а шнамс операторонть А.Гущинэнь, кона тейсь мазый съёмкат.

Фильманть ваномо сакшность Сабанцелень эрицятнеяк. Сынст ютксо «Комолькай» фольклорной ансамблясь, кона кецявтымизь морамосост.

– Темась, конань панжить цёратне, монень чарькодеви. Кавто иеде икеле минь ютавтынек Вирь ало Тавласо моронь фестиваль. Бути ёмить эрзянь морось, велесь – ёматано миньгак. Свал ансяк велесь макснесь минек масторонть туртов ине ломанть: писательть, морыцят, артыцят, военачальникть, превей ды оймев ломанть. Меельце шкане ламот од ломантне кармасть арсеме, косто сынь лиссть. Те кецявты. В.И.Ромашкин кармась кинонь снимамо 80-це иетнестэ. Те ульнесь «Мордва-каратаи» фильмась. Уш сестэ сон мелявтсь минек культуранть ёмамонть кисэ, – кортась В.И.Ромашкинэнь паро ялгась, музыкантонть лемсэ Этнокудонь прявтось П.В.Рябов.

Н.Н.Пиксин сакшнось ваномо Московсто. Чачсь сон Пенза ёнксонь мокшонь велесэ. «Тораманть» марто теевсь содавиксэкс аволь умок, зярдо минек морыцятне якасть «ДаншиноFEST» историко-культурной покш фестивалев. Валонзо коряс, весе пурнавозтне абунгадсть ды кецязевсть «Торамань» морыцятненень. Сынст велесь чамсь, весе тукшность, киненьгак а эряви келесь ды койтне-кирдатне. Тесэ жо сцена лангс лиссть алкуксонь морыцят, кинь пельде эряви саемс пример.

Прасковья Сергеевна Учеваткинанень 71 ие. Сонзэ снимизь те фильмасонть. Нама, сакшнось Саранскоев фильманть ваномо. Оршась-наряжась мазый кофтат-юбкат, истят, кодат кандтнить Сабанцелень аватне.

– Монень кудос якасть фильмань снимамо. Пек мелезэнь тусь. Ней морамо весе правтыть. Кить морамо а маштытькак, сетнеяк эцить. Ламо иеть морсинь «Комолькайсэ». Нейгак тердить морамо ды, мерян, сырединь уш, саты. Ледстнян, кода сакшнынек морамо Саранскоев «Россия – это мы!» конкурсов. Минь морылинек кезэрень лувсо, аламодо лиякс. Кодамо сехте вечкевикс мором? «Ах, тынь, ялгат, паро ялгат, кунсоломизь монь, рамадояк серой бука, ветинк Московов...». Те моронть эрьва косо свал васенцекс морылинек. Сабанцелень, эсенек морось. Минь эштё моракшнынек Сергей Брилёвонь икелеяк. Сакшнось тенек. Морынек тензэ ды андынек пецякадо, пизёлдо, таган пидинек. Снимасть ламо, невтсть ансяк пелькске. Сазором Питерстэ ялатеке неимим ды содымим.

Эрямом перть свал морсинь. Вете иесэ уш киштинь а содан кодаяк. Минек семиясо весе музыкальнойть. Ялаксом сонсь тонавтнесь, эрьва мезе машты седямо! Авань ульнесь пек паро вайгелезэ! Сазорон ды ялаксон эрить васолга, кодамояк покш чистэ, саемга, Троицясто, свал пурнавтано вейс ды морсетяно. Ней ансамблясо а морсян, кемгавтово иеть церьковасо моравтан ды якан лемень кундамсто ловномо. Сюкпря Пазонтень, кавто эйкакшон, вете нуцькан, колмо правнукон. Тевтеме а аштян, кирдян ниле тулякат, кавто сеят, саразт. Сабанцелень ломантне вадрят, паронь арсицят. Мон пек кецян, од ломантне якить велетнева, морыть ды натой снимить фильма. Те пек паро тевесь.

Вана кодат мельть-арсемат фильмань ваномадо мейле ёвтась Людмила Ломшина:

– Мон течи сынь тей покш мельспаросо. Ульнесь мелем содамс, кода алкукскак эри неень шкане минек велесэ кезэрень морось, мезе сынь ёвтыть те кевкстеманть коряс, неемс, кода эрить ломантне. Ульнесь мелем марямс, кода сынь неень шкане кортыть эрзякс.

Мельспаросо аштян сень кувалма, мекс морось эри. Улить ванстыцянзо, вечкицянзо, улить сыця пингес кандыцянзо. Эйкакштне велесэ бажить кортамс эрзякс. Чарькодеви, ламот эйстэст рузыязь. Келенть чарькодить ды потсост ули истямо мель – тонадомс кортамояк.

Мелем аламодо колызе се, кода велесэяк рузыясь минек келесь, ломантнень кортамосо марсевить пек ламо рузонь валт. Велесэ келесь эри истямокс, кодамокс сон алкукс ули. Кецян, цёратне кепедсть истямо покш кевкстема, топавтсть покш тев. Кеман, те сынст аволь меельце арсевксэст. Арсян тенст икелев молемань ки, сэрей тёкшт ды седе ламо лездыцят.

 

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».