Понедельник, августа 03, 2020
Важное


ИЕСТЭ ИЕС ВИЕНЗЫ «КОМБИНАТ ТЕПЛОИЗОЛЯЦИОННЫХ ИЗДЕЛИЙ» ПРЕДПРИЯТИЯСЬ, КОНАНЬ ПРЯВТСО В.С.БОЧКИН.
ТЕ ПРЕДПРИЯТИЯНТЬ ПРОДУКЦИЯНЗО ЭРЯМО КУДОНЬ, ПРОМЫШЛЕННОЙ ПРЕДПРИЯТИЯНЬ, СКАЛОНЬ ФЕРМАНЬ ДЫ ЛИЯНЬ-МЕЗЕНЬ СТРОЯМС РАМИТЬ АВОЛЬ АНСЯК МИНЕК РЕСПУБЛИКАСО, СОНЗЭ ТОМБАЛЕЯК – НИЖНЕЙ НОВГОРОДСО, УЛЬЯНОВСКОЙСЭ, МОСКОВСО, ПЕНЗАСО, КАЗАНЬСЭ, БЕЛОРУССИЯСО, КАЗАХСТАНСО. 2019 ИЕСТЭ «КОМБИНАТ ТЕПЛОИЗОЛЯЦИОННЫХ ИЗДЕЛИЙ» ПРЕДПРИЯТИЯСЬ НОЛДАСЬ ПРОДУКЦИЯ 33,5 ТЁЖАТ КУБОМЕТРАТ, МЕЗЕСЬ СЕДЕ ЛАМО МАНЫНЬ КОРЯС. ПРЕДПРИЯТИЯНЬ ПРЯВТОНТЬ В.С.БОЧКИНЭНЬ ВАЛОНЗО КОРЯС, ТЕНЬСЭ ПОКШ ТАЛИКАСТ ВЕСЕНЬ, КИТЬ ВАЖОДИТЬ ПРЕДПРИЯТИЯНЬ ЦЕХТНЕСЭ. ВИКТОР СЕМЁНОВИЧ ВИДЬКСТАСЬ, ПРЕДПРИЯТИЯНТЬ СЮПАВЧИЗЭ – ВАЖОДИЦЯ ЛОМАНТНЕ.
НЕТЬ ЧИТНЕСТЭ МИНЬ ВАСТНЕВИНЕК СЫНСТ МАРТО.
«СТАКАЧИТНЕДЕ ЭЗИНЬ ТАНДАДО»

Александр Сергеевич СТАРКИН чачсь-кассь Кочкуровань райононь Ташто Мурза эрзянь велесэ. Мельсэнзэ зярдояк арасель улемс промышленной предприятиясо важодицякс. Истя уш лиссь, тиринь велень средней школанть прядомадо мейле документэнзэ марто сыргась Саранскоев. Мольсь Полежаев лемсэ электроникань, экономикань ды правань колледжс ды кадовсь тозонь тонавтнеме.

– Тонавтнемань иетне ливтязь ливтясть, – ёвтни А.С.Старкин. – Эзинь фатяяк, кода карминь специалистэкс. Ансяк важодемс «Комбинат теплоизоляционных изделий» предприятиясонть кувать тень эзь саво. Саимизь армияв. Служинь кавто иеть ды сынь мекев вечкевикс предприятиянтень. Васня важодинь съёмщикекс.

Алкукскак, А.С.Старкин эштё студентэкс улемстэ важодсь те тевсэнть. Тевесь тензэ мельс пек тукшнось. Аравтлувонзо свал топавтнесь велькска. Цехень прявтось Нина Александровна Земцова редизе Александр Старкинэнь важодемантень покш мелень явоманть ды аравтызе цехень прявтонь полавтыцякс. Те тевсэнть цёрась важодсь вейке ие.
А.С.Старкин свал шкинемань вешнемасо. Производстванть виевгавтомасо тевс нолды од мельть-арсемат, конатнень шныть предприятиянь прявттнэ.

2014 иестэ Александр Сергеевичень аравтызь минеральной ватань ды эйстэнзэ изделиянь нолдамонь коряс цехень прявтокс.
– А сёпса, тевтне седеяк ламолгадсть, – корты А.С.Старкин. – Ансяк стакачитнеде эзинь тандадо. Мекевлангт, седеяк виевгадынь.
А.С.Старкинэнь валонзо коряс, сонензэ кеме нежекс теевсть оборудованиянь коряс прявт специалистэсь В.В.Горбунов, прявт механикесь А.В.Рябышев, мастертнэ В.А.Гуляев, Н.В.Цынайкин, М.М.Муковсеев.

Тешкстасынек, 1 № цехсэнть, конань прявтсо А.С.Старкин, важодить кодгеменде ламо ломанть. Александр Сергеевич весень содасынзе парсте. Важодицятне – Ицялонь, Отяжелень, Саранскоень, Орданьбуень, Кочкуровань ёнкстнэстэ сыцят. Сынь тевест содасызь вадрясто, мезесь а чарькодеви, Александр Сергеевич толковасы семс, зярс те эряви.
– Александр Сергеевичень содаса умок, – ёвтни «Комбинат теплоизоляционных изделий» предприятиянь прявтонь полавтыцясь В.М.Рангаев. – Сон козонь а кунды, тевенть топавтсы педе-пес. Покш мель яви аволь ансяк изоляционной материалонь нолдамонтень, истя жо ломантнень важодемань условиятнень вадрялгавтомантень. Те ёнксось, нама, пек вадря.
Эрямось таркасонзо а ашти. Промышленной производствас, лияс-козонь совавтовить од технологият. Эрявить, нама, кеме содамочить. Тень парсте чарькоди А.С.Старкин. Сон заочна тонавтни Н.П.Огарёв лемсэ МГУ-нь Механикань ды энергетикань институтсо.
– Февралень куншкавидьстэ карман идеме дипломонь роботам, – видькстась Александр Сергеевич.
Арсетяно А.С.Старкиннэнь кеме шумбрачи, важодемасо од изнявкст ды парсте идемс дипломонзо.

«МОН ОВСЕ А ЯНКСЯН…»

Максим Александрович МАМЛЯСОВ «Комбинат теплоизоляционных изделий» предприятиясонть важоди уш кавксо иеть. Тей сась важодеме Н.П.Огарёв лемсэ МГУ-нь электронной техникань факультетэнть прядомадо мейле.
– Предприятиясонть топавтан наладчикень тевенть. Пштистэ ванан линиянть мельга, косо анокстави минеральной ватась.
– Сон тееви кокссто, шлаксто ды перефиритстэ, – полады Максим Александрович. – Продукциянть нолдамс сырьясь свал ули. Шлаконть тенек пачтить Липецкойстэ. Мон овсе а янксян, мекс кочкия те предприятиянть. Тесэ муинь ламо од ялгат, тесэ муия вечкевикс тевем.


Наладчикенть М.А.Мамлясовонь валонзо коряс, предприятиясонть важодить колмо сменасо. Эрьва сменасонть улить линиянть мельга ваныцят. Бути мезеяк лиси, наладчиктне куроксто витнесызь яжавксонть. Запасной пельксэнь коряс тесэнь наладчиктне а талныть. Сынь улить ды сатышка.
Тешкстасынек, М.А.Мамлясов чачсь 1983 иестэ Саранскойсэ. Тонавтнесь Саранскоень 37 № средней школасо.

АНОК ПРОДУКЦИЯНЬ УСКСИЦЯ

– Мон Саранскоев сынь эрямо Кочкуровань райононь Вирь ало Тавласто, – ёвтни автопогрузчикень ветицясь Александр Викторович РАЗАДЕЕВ. – Зярыя иеть важодинь Саранскоень базатнестэ вейкесэнть. Складс усксинь анок продукциянть. Теке тевенть 2013 иестэ саезь топавтан «Комбинат теплоизоляционных изделий» предприятиясонть. Тевем вечкса ды мелем арась лияв туемс.


А.В.Разадеевень автопогрузчикесь свал тевсэ. Александр Викторович пек ваны машинанть мельга. Те корты седе, анок продукциянь складс усксемкантень Александр Викторович яви покш мель.

ВЕСЕМЕСЬ ВАНОВТОНЗО АЛО

Ольга Васильевна ЕГОРОВА эйкакшпоранзо ютавтызе Отяжелень райононь Сосуновка велесэ.
Тиринь велень средней школань вейксэ класстнэнь прядомадо мейле паро эрямонь вешнеме сыргась Саранск ошов. Кочкизе 29 № профессионально-технической училищанть. Покш мелезэль тонавтнемс парикмахерэнь тевенть. Ды тонавтнизе. Ансяк специальностень коряс Ольганень эзь саво важодемс. 2008 иестэ тейтересь сась важодеме «Комбинат теплоизоляционных изделий» предприятияв. Тесэ тонавтнизе автоматизированной линиянь операторонь тевенть. Васень шкасто Ольга Васильевнанень лездась Н.А.Авдоничева.
– Наталья Алексеевна – эсь тевень алкуксонь специалист, – ёвтни О.В.Егорова операторось. – Мон операторонь тевенть топавтан кемгавтово иеть, ванан линиянть мельга, косо анокстави продукциясь. Бути лиси яжавкс – сеске пачтян наладчикентень.


Теде башка, автоматизированной линиянь операторось ваны сэнь уштомапелень невтематнень мельга.
Течи 1 № цехсэнть важодить колмо операторт. Ольга Егоровадо башка, М.В.Томилина ды Н.М.Авдоничева.
Цехень прявтось А.С.Старкин оператортнэнь пек шны. Сынь, келя, кармавтомат а учнить, тевест топавтыть вадрясто.

Пётр ЗИНОВЬЕВ
Фототне Эдуард Ретунскоень
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».