Вторник, марта 19, 2024
Важное

Те мазый таркась пезназь пезнась седеентень ды пряудементень. Пандопрясо умонь церьковань стенатне манязь тердить те таркантень ломантнень. Ды куш сонсь церьковась умок уш арась, кадовсть ансяк баягань башнясь ды пельскаладозь стенатне, ламотне тей ялатеке сакшныть. Бути кизэнь чине варштамс церькованть эйстэ таргавиця кинть лангс, сон теке асфальтонь, конань валакавтызь тей ардыця автомашинатне. Тей сакшныть эрьва мезе марто.

Кие озны стенатнесэ кадовозь пазаватнеде мейле таркатненень, кие, потмонзо чамдомадо мейле, кады вишка пазавине. Умок уш тусь кулясь, те таркась ломантненень лезды, леци. Кортамось моли Отяжелень райононь Троицкие Дубровки велень калавтозь церьковадонть. Эйкакшпорасто минь тов яксилинек сеедьстэ. Минек Андреледенть сон ашти ветешка вайгельпень тарка, пандопрясо. Пертьпельксэнь велетнестэ а муят истямо ломань, кона бу вестькак а улевель тесэ.

Ломанень кедть, мезть сынь ансяк а теить, теемадонть башка маштыть яжамояк-калавтомояк. Эсь шкасто Культурань министерствась мекс-бути эзизе сёрмадо Италиянь мастертнэнь кедьсэ теезь мазый церькованть минек культурань наследиянь объекттнэнь юткс ды ней эсь сельмесэ можна неемс ломанень кедтнень роботанть.

Зярдо-бути Троицкие Дубровки велесь ульнесь покш. Велесь рузонь. 1883 иестэ саезь тесэ роботась церковно-приходской школа. Тесэ эрясть важодемань вечкиця ломанть. Революциядонть икеле велесэнть ульнесть ламо кеме хозяйстват. Эрицятнень туртов сехте покш мельспарокс ульнесь тесэнь церьковась. Сон аштесь пандопрясо, ды баяганзо гайтесь марявсь мик Орданьбуес. Эряви тешкстамс, республикасонок те храмось сехте умонсетнестэ вейкесь. Иеде умонь ансяк Саранскойсэ Иоанно-Богословонь церьковась. Сон строязь 1695 иестэ. Ярмактнень тень туртов максокшнынзе С.Г.Чирков помещикесь. Церьковась теезь кавто престолсто: Живоначальной Троицянь ды Пресвятой Богородицань чачомань. Пертьпельксэнь велетнестэ тей сакшныцятнеде ламольть: Керамсуркасто, Каменкасто, Чамзинкасто, Ушаковкасто, Макалейкасто. Троицкие Дубровки велесь Орданьбуень райононь велетнень маласо. Тостояк Дубровкань церьковантень ламот сакшныльть: Мадышкасто, Кеченбиестэ, Колазь велестэ. Строясть церькованть Италиясто тердезь мастертнэ тескень материалтнэстэ. Кирьпецтнень ды растворонть теемстэ сёвоненть човорильть сараз алтнэнь марто. Самай секс сынь пек кемельть. Стенатне аштить нейгак. Строямось мольсь сисем иеть. Церьковась лиссь пек мазыекс ды ламо фреска марто. Сон роботась кавто пингень перть. Эштё икеле марсинь сыре ломантнень пельде, те таркасонть те омбоце церькова. Васенцесь ульнесь чувтонь. Алганзо священнослужительтне чувнокшность модапотмова ламо кить. Вейке чистэ службань молемань шкасто церьковась тусь мода алов озныцятнень марто. Теде мейле эштё кувать модапотсто марявсть моравтомат. XX пингестэ велень эрямо лувонть колакшнызе революциясь ды мельганзо коллективизациясь. Седе тов тевтнеде марякшнынь тетянь пельде, сонензэ тень ёвтнекшнизе сонзэ тетязо, монь покштям. Дубровки велев, кода лиятнененьгак, састь Советской властень представительть. Пурнызь эрицятнень промксов. Чинь повесткасонть ульнесь вейке кевкстема, эряви теемс ды совамс колхозс. Тень топавтомга велень эрицятненень эрявсь ветямс весе кудонь ракшатнень колхозс. Зярдо кармасть те меленть кисэ вайгелень максомо, каршо кияк эзь моле, весе согласясть. Омбоце чистэ вельсоветэнть икеле ульнесь теке мекшень кудо. Эрицятне ветизь ракшаст, содызь маласо чувтотненень ды пирявкстнэнень ды велявтсть кудо ёнов. Колхозс совамодо яволявтомань сёрмадомо аламот кить мольсть. Теке чинь вестэнть Троицкие Дубровки велестэ  чугункань кинь Бобоедово ды Отяжеле станциятненень баул марто кармасть пуромомо ламо ломанть. Седе ламотне ульнесть Троицкие Дубровки велень эрицят. Сынст арасель мелест роботамс коллективной хозяйствасо. Арсезь-теезь, салавине кучнесть ломанть таркань варчнеме лия ёнксов. Зярдо колхозонь бригадирэсь кармась кудова тердтнеме роботамо, седе ламотнень кенкшсэ понгавтозельть амбаронь пекстамонь покш панжомат. Ломантне каднызь кудосткак, истямо лувсо роботамодонть. Зярдо властень органтнэ састь ёжос, туицятне уш пачколесть Челяба ёнксов. Ламот мусть эрямо таркат Карталы а покш ошкесэнть, косо муевсь роботаяк.

Теде мейле велес кадовицятнеде ульнесть аволь пек ламо. Колхоз ялатеке теезель. 1960 иес сон кандтнесь XVI-це партсъездэнь лементь. Войнань шкасто цёратнестэ ламотне эзть велявто фронтсто. Войнадо мейле веленть лемдизь аволь перспективнойкс. 1977 иестэ тесэ кадовкшность кеветее кудот. Эштё колмо иень ютазь, 1980 иестэ, – вейкеяк. Ней те икелень покш велесь картасояк арась.

Ломантне тусть, церьковась кадовсь, кода иля корта, маштсть сестэ строямо. Церьковань историясь истя жо сюлмавозь шкатнень марто. Ютазь пингень колоньгеменце иетнестэ церьковатнень кармасть пекстнеме. Те уцяскась эзь юта Троицкие Дубровки велень церькованть вакскаяк. Сыретнень ёвтнемаст коряс, пек стака ульнесь ёртомс тесэнь баяганть. Зярдо сон прась верде алов, лазовсь мик кавтов. Истя саизьгак солавтомонзо. Мейле шкатне састь седеяк берянть. Ламо иень перть церьковасонть теезель колхозонь склад. 1937 иестэ церьковатнень уставасть овсе яжамо. Пазнэнь кемицятне кодаяк эзть чарькоде, мейсэ ломантнень истя уш пек ацирьгавтынзе церьковась. Калавтсть кувать, эзь калавтово. Войнадонть мейле ломантне кармасть кудонь стявтомо. Стяконь кирьпецень материалтнэ манязь манясть истятнэнь. Ламот снартнесть калавтомс стенатнень, те а свал удалакшнось. Эсензэ тевенть теизе техникаськак, кой-кить уставакшность калавтомо виев трактортнэнь вельде. Кудонь строицятнень, неяви, превсэсткак арасель, карми-арась уцяска истямо кирьпецьстэ теезь кудосонть. Эдь церьковань эрьва кирьпецесь эсь пачканзо нолдась ломанень апаро, сэредькс. Неяви, тень лангсо кияк эзь арсе.

Истят таркатнес уракалить аволь ансяк строицятне, сюпавчинь вешницятнеяк. Икеле иетнестэ тей сакшныльть ламо чувныцяткак. Церькованть перька таркасонть ламо лушмот, чувнозь таркат. Мезть тува вешнесть? Ансяк сынсь содыльть «раужо» чувныцятне. Ёвтнематнень коряс, церькованть алга модапотмова чувозь салавань ламо кить. Истятнэнь Рузонь православной церьковатнесэ свал чувность, штобу зыянонь шкатнестэ ванстомс церьковань сюпавчинть ды эсь прянть. Истят модапотмонь салава кить муезельть тесэяк. Сындест ульнесть аволь вейке. Кой-кить мик валгонесть тов, ансяк метрань ютазь кирвазтезь толось мадиль, ды валгицянть оймеёжозо апаркстомиль. Лисни, церьковань сэтьмечинть а эряви токшемс.

Вана истямо, зярдо-бути мазый, церькованть уцясказо. Веенсттнэ сонзэ строизь, омбонсттнэ калавтызь. Аволь умок кармась марявомо паро куля. Троицкие Дубровки велень церькованть кармить теемензэ, седе видестэ меремс, тесэ арсеви теемс монастырь. Муевсь истямо ломань, кона сайсь мель витнемс ташто церькованть. Те – «Талина» Агрохолдингень генеральной директорось В.С.Бирюков. Васенце эскелькст уш теезь. Бути истямо кулясь виде, паряк, зярыя иень ютазь тесэнь велетнень эрицятне таго марясызь те церьковань баягатнень гайтест, а туристтнэнь туртов панжови од туристической маршрут.

Николай Евдокимов

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».