Кочкуровань муниципальной районсо вельмесь экологиянь туризмань од ёнкс – глэмпинг.

Булгакова велень эрицясь Станислав Петряев колмо иеде икеле сайсь арендас 20 гектарт мода ды арсесь ушодомс эсь тев. Иеде икеле сон пурнась крестьянонь-фермерэнь хозяйства, кундась экологиянь туризмань од ёнксонь тееме.

– Мон свал ульнинь ошонь эрицякс, тень лангс апак вано, монь покш мелем ульнесь эрямс велесэ ды кундамс фермерэнь тевентень, – корты Станислав. – Ней мон трян эрьва кодат кудонь нармунть. Васня эйстэст ульнесть а пек ламо, ансяк эсь семиянть туртов. Те ульнесь васень опытэсь, ды а свал вадряль – ламо нармунть кулость. Неень шкасто минь трятано саразт, мацейть, куркат, истя жо улить фазанонок, куропатканок, цесарканок. Нама, хозяйстванок седе келейгадсь.
Те иень июньстэ Станислав Петряев арсесь варчамс тевтеемань од ёнкс – экотуризма, седе видестэ ёвтамс, истямо ёнкс, кода глэмпингесь.

Те оймсемань од лув, зярдо туристэсь, вейке ёндо, оймси идем пертьпелькссэ, омбоце ёндо – сонзэ туртов ули эрявиксэсь, мезе эряви парсте эрямонть туртов. Истямо оймсеманть шкасто туристэсь эри пертьпелькссэ а покш кудынесэ, конаньсэ ули весе эрявиксэсь.

– Минек проектэсь лезды виевгавтомс регионсонть экотуризманть, тонавты пертьпельксэнть вечкеме, панжи од важодема таркат. Штобу мезе-бути теемс, эряви важодемс ды важодемс. Ды а эряви кортамс: «Зярдо карми улеме седе ламо юткошкам, мон, окойники, кундан кодамояк тевс». Ды зярдояк сон, юткошкась, а карми. Эряви вечкемс сень, мезе тон теят, ды сестэ весе удалы, – мерсь Станислав Петряев.