Августонь 18-це чистэ Саранскойсэ ютась «Минь вейсэ!» раськень культурань од ломанень весероссиянь фестивалесь. Тей сакшность инжеть Россиянь ведьгеменде ламо ёнкссто. Кенярксчись мольсь ошонь зярыя таркава ды омбоце чистэнть – мордовиянь районтнэва.
«Тев» раськень промыслань ды ремеслань регионъютконь выставканть ваннызь ламо ломанть. Мезе тесэ ансяк арасель! Эрьва кодат теевкст эсенек республикань кедьчелькев ломантнень пельде, истя жо – лия ёнксонь. Марина Литяйкина сась Ивановань областень Шуйской райононь Васильевское велестэ. Пшкадинек тензэ, фамилиязо сеедьстэ вастневи республикасонок. Истя лисськак, валонзо коряс, атявтозо Александр Степанович ульнесь эрзя.
– Мон важодян ремеслань кудосо методистэкс. Эйкакштнень содавттано раськень промыслатнень ды ремеслатнень марто. Тонавттано кодамо, стамо, панкссто стамо, тейнеме някат. Кадык содыть, мезе тейнесть ды кода важодсть покштяст-бабаст. Тей ускинь мартон стазь эрьва кодат някат, налкшкеть, сувенирт, пацят, сумкинеть, тейтертненень мазылгавтомапельть. Шуя ошонок ней содавикс Россиянь келес. Сон яволявтозь рузонь Роштовань прявт ошокс. Роштовань кенярксчитнестэ ошось мазылгавтови, ютыть концертт ды эрьва кодат вастовомат. Ивановасто Шуяв тукшны ретропоезд. Инжетнень каванить рузонь раськень ярсамопельде. Чокшне менельсэнть невтить лазерной шоу. Менельсэнть апак учне кирвази теште – Роштовань салавачись. Зярыя минутат ансяк палы, сонзэ лангс ваномо сакшныть ламо инжеть. Шуясь содавикс Россиянь келес коцттнэнь коряс, тесэ Шуянь ситецтнэ. Эштё ули Шуянь сапонь, сонзэ пидеме-тейнеме кармасть 1829 иестэ саезь. Содавикс земляконок – Вячеслав Зайцев модельерэсь. Сон ламо лездась региононтень, нейгак совавтовить эрямос проектэнзэ. Минек кедьсэ снимавсь «Непослушник» фильмась.
Кавто чинь перть микшнинь эрьва мезть. Пек тусь мелезэнь Саранскоесь. А чокшне кодамо мазычи! Фонтантнэ палыть эрьва кодамо тюссо, ведесь шольни. Ломантнеяк паронь арсицят, – пачтясь Марина.
Торбеевань районсто Наталья Ширяева важоди джут марто. Тейни налкшкеть, част, светильникть, сувенирт. Весе, мезе ули кудосо – банкат, паргинеть – нолды тевс, мезеяк а ёмавты ды а ёрты. Джутонть рамси. Авась роботы Дракина велень Культурань кудосо художественной руководителекс. Тонавты эйкакштнень важодеме джут марто ды човалясто кодамо, морсияк. Эсензэ важодематнень аволь весть невтнинзе эрьва кодамо выставкатнесэ. Ломантне сеедьстэ пшкалить тензэ теемс казнекс кодамояк сувенир: част, картинат эли светильникть.
Ольга Гришуткина сась Ковылкинасто. Сон ды Карина тейтерезэ явить мель керамикантень. Валост коряс, сынь ансяк ушодыця керамистт. Тень лангс апак вано, теевксэст дивавтыть эрьванть. Неть: декоративной паннот, баягинеть, вешкемкат, кедьгеть. Меельце шкасто кармасть тейнеме чаень ды кофень симемань наборт. Ольга Владимировна прядынзе Саранскоень Ф. В. Сычков лемсэ художественной училищанть, М. Е. Евсевьев лемсэ МГПИ-нть (ней – МГПУ). Важоди Ковылкинань эйкакшонь искусствань школань прявтокс. 2020 иестэ «Культура» нацпроектэнть вельде школасонть теезь одкстомтома. Ней ули керамикань отделенияст. Рамазь од оборудования: каштомне, гончаронь круг. Эйкакштнень тонавтыть те аволь шожда тевентень.
«Ламо раськень Мордовия» районтнэнь брендтнэнь невтемасо ульнесь аёвтавикс мазычи. Тесэ эрьва районось пелькстась-невтсь сень, мезест ули ансяк сынст. Теньгушевань районсто кедьчелькев аватне усксть сисем тюссо кодазь варьгат ды эрзянь, мокшонь матрёшкат, Дубёнкань районсто – зярыя лисьмапрясто (Сиянь лисьмасто, Иневанькс лисьмасто) лезэнь кандыця ведь, тантей медь, эмежть, Кочкурбуестэ – Тавлань налкшкеть.
– Течи бажинек невтемс минек райононь кавто брендтнэнь: Орозбиень кемтнень ды скульпторонть С.Д. Эрьзянь творчестванзо. Баеньбуесэ ули С.Д. Эрьзя лемсэ республикань музеенть филиалось, тосто макссть тенек важодевксэнзэ 3D копият. Велень музеентень свал сакшныть инжеть, васоло эрицятнеяк бажить содамс скульпторонть творчествадонзо. Райононь библиотекась анокстась Эрьзядо сюпав материалт. Орозбиень кемтнень невттяно кавтонь таркава: тесэ ды «Тев» выставкасонть. Састь мастертнэ Н. М. Аксенова, Ю. А. Аксенов, В. П. Кудашев. Теинек «Валенки желаний» сёрмадовкс марто покш баннер, ладинек якстере покш кемть, сынст мереви тонгомс пильгес ды теемс фотография. Выставкань инжетненень пек вечкевсть! Истя жо ускинек эрьва кодат ярсамопельть: прякат, пачалксеть, кем ёнов молиця сюкорот. Ули самоваронок ды эмеж марто крандазонок, – пачтясь Орданьбуень культурань кудонь прявтось Е. Н. Юртанова.
Весе неть покш выставкатне важодсть чинь перть. Ошонь эрицятне ды инжетне мельспаросо ванкшность, теевсть содавиксэкс мастертнэнь марто, кевкстнесть творчествадост. Чокшне ёнов «Мордовия многонациональная» раськень подворьятнень ды брендтнэнь выставканть ваннызе Мордовиянь Прявтось Артём Здунов. Эрьва районось бажась мейсэяк дивавтомс, кецявтомс. Косто а косто гайгсты гармония, серьгедить моро. Зяро пидесть-пансть раськень ярсамопельть! Ицялбуесь невтсь колмо брендт-сюпавчить: Кирилл Патриархонть кудось-музеесь, Алашань заводось, «Смольный» национальной паркось. Ды минек газетань лопатнеяк а сатыть, бути сёрмадомс эрьва райононть ланга.
Те шкане Советской площадьсэ мольсь покш концерт. Творчестваст Россиянь кевейкее регионсто невтизь государственной коллективтне. Фестиваленть панжизе МР-нь Прявтось Артём Здунов.
– Кодамо сюпав Россиянть историясь, кодат улить кезэрень коенек-кирданок! Арсян, минек масторонь раськетнень мазычись пурнавсь течи Саранскойсэ. Тынь муиде шка ды сыде минек ванькс, вадря ды мельстуиця ошонтень. Кинень пек туи мельс – кадоводо теске эрямо, эрьвантень муеви важодема тарка. Сюкпря РФ-нь Президентэнтень В. В. Путиннэнь те кенярксчинть кисэ. Эдь фестивалесь юты Культурань инициативань Президентэнь фондонть лезксэнзэ вельде, – пшкадсь фестивалень инжетненень МР-нь Прявтось.
Театральной искусствасо изнявкстнэнь ды творческой тевтнень кисэ «МР-нь народной артист» лемсэ казевсь А. П. Чехов лемсэ Московонь художественной академической театрань артистэсь, минек республикасо чачозесь Станислав Дужников. «МР-нь заслуженной артист» лемсэ – «САДко» группань морыцятне Александр Лихацкий ды Владимир Макаров.
Сцена лангсо невтевсть «Масторланга» Мордовиясо эриця раськетнень оршамопелест. Истя жо киштсть, морасть ды седясть истят коллективтне: Краснодарской краень «Скрыня» казаконь моронь ансамблясь, Владимир ошонь «Владимирские рожечники» государственной ансамблясь, Удмуртиянь «Айкай» киштемань ды морамонь государственной театрась, Казанень «Агидель» киштемань ды морамонь ансамблясь, Дагестанонь «Гергебиль» вокально-хореографической народной ансамблясь, Северная Алания Республикань «Ритмы гор» ды «Сармат» ансамблятне, Башкортостанонь «Аманат» раськень киштемань народной ансамблясь, Донецкой Народной Республикань «Донбасс» морамонь ды киштемань заслуженной государственной академической ансамблясь, «САДко» группась ды «Партизан FM» фолк-группась.
Теке жо чистэнть ютасть «За победу» патриотической интерактивной проектэсь ды «Мы вместе встанем» Весероссиянь од ломанень акциясь. «Ледстясынек сетнень лемест, кить чавовсть минек масторонть ванстозь, ледстясынек сетнень, кить ней тюрить, яжить фашизманть, конась сась Россиянть малас», – кортась Мордовиянь Прявтось. Фестивалев сазь творческой весе коллективтне ды инжетне морызь «Встанем» моронть.
Татьяна Маторкина