Четверг, декабря 03, 2020
Важное


Мордовия Республикань (икеле Мордовской АССР-нь) Ромодановань районось теезель 1928 иень июлень 16-це чистэ. Сонзэ покшолмазо -777,305 кавонзазь метрань вайгельпеть. Велень хозяйствань модатнеде - 60252 гектарт. Ютксост соксевить-видневить - 49115 гектарт.


Районсонть эрицятнеде - 19469 ломанть. Эйзэнзэ совить 13 велень поселеният, конат вейсэндить 49 эрямо таркат. Те муниципальной райононть прявт тевензэ - велень хозяйстванть ды перерабатывающей про-мышленностенть виевгавтомась. Тесэ улить кавто покш перерабатывающей предприятият - «Ромодановосахар» ООО-сь, косо нолдави сахар ды «Элеком» АПО-нь ОАО-сь, тосо яжавтыть васенце ды омбоце сортонь товт ды ракшань трямс эрьва кодамо рецептэнь коряс комбикоромт.

Ютазь иень декабрянь 25-це чистэ Мордовия Республикань Ромодановань муниципальной райононь администрациянь прявтокс ладязель Сергей Валентинович Ведяшкин. Теде икеле, райадминистрациянь прявтонть Анатолий Алексеевич Гурьяновонь туемадо мейле, Сергей Валентинович ковонь перть ульнесь прявтонь тевень топавтыцякс.

Видьстэ меремс, те ломанесь администрациянь тевентень сась аволь косто-бути ве ёндо, лия сферасто. С.В.Ведяшкин, кода кортыть, сеть ломантнень ютксто, кие административной тевсэнть ютынзе служебной весе кузтематнень.

Масторонть ды республиканть туртов стака вейксэньгеменце иетнестэ Н.П.Огарев лемсэ МГУ-нь юридической факультетэнь колмоце курссо, ялгатнень ютксто, ловт, ськамонзо, ютась башка (индивидуальной) тонавтнемас ды сась важодеме тиринь Ромодановань райадминистрацияв. Виде, се шкантень сонзэ ульнесь среднепрофессиональной образованиязо. Ромодановань 1-це номер средней школань кавксо класстнэнь парсте прядомадо мейле сон кармась тонавтнеме Саранскоень электронной приборонь техникумсо. Куш, эштё вишка пингстэ покш мелезэль улемс юристэкс... Иетнень ютазь, Сергей Валентинович чарькодсь, видестэ сестэ тейсь. Ды аволь ансяк сень коряс, электрониканть содамось эрявикс тев весе шкатнестэ, кода икеле, ней жо седеяк пек. Цёраломанентень эсеть кедьсэ ламо мезень теемань маштомась пек эрявикс тев эрямосонть.

С.В.Ведяшкин администрацияв важодеме сась аволь ансяк вейке апак прядо высшей образования марто, сонзэ ульнесь колледжсэ идезь дипломозо техник-электронщик специальностень коряс ды теке шкасто поладсь тонавтнеманзо вузсо. Тень ловозь, Сергей Валентиновичень ладизь эрицятнень социальной ванстомань ды трудонь коряс отделэнь прявтокс. Се шкане райадминистрациянь прявтокс ульнесь А.С.Калинин. Аламо шкань ютазь сонзэ полавтызе С.В.Чалов. Сергей Валерьевичень пингстэ, 2004 иенть ушодовомсто, Сергей Валентиновичень ладизь Ромодановань муниципальной райадминистрациянь управляющеень тевтнень топавтыцякс, 2015 иень кизна, зярдо райононь прявтокс ульнесь Анатолий Алексеевич Гурьянов, кода тевензэ парсте содыцянть, Сергей Валентиновичень аравтызь Ромодановань муниципальной райононь администрациянь прявтонь васенце полавтыцякс.

Паряк, ловныцятнестэ кияк тешксты, мезень кисэ сёрмадыцясь мельга-мельцек ёвтни неень шкань прявтонть важодевкстнэде. Толковаса, те ломанесь райононть прявтокс сась аволь кодамояк покш производствасто, эли лия тевстэ... Сон парсте содасынзе райононь административной роботанть, райононть, ломантнень, течинь чине талновтыця кевкстематнень. А стяко ледстиник, кить меельце шкасто сондезэ икеле топавтсть те а шожда тевенть. Эрьванть пельде сон тонавтнесь, эрьвась макссь тензэ эсь содамочинзэ. Нама, сехте виев ды паро тонавтыцякс неень райононь прявтонтень ульнесть малавиксэнзэ, тетязо-авазо.

Ледстясынек, авазо, Галина Павловна Ведяшкина, эсь шкасто Чувашиясо Канашонь финансонь институтонть прядомадо мейле, пингень перть важодсь васня Ромодановань райисполкомонь, мейле райадминистрациянь финансонь отделтнэсэ. Тетязо, Валентин Николаевич, специальностень коряс зоотехникель, вузонь прядомадо мейле ламо иень перть ульнесь агропунктонь прявтокс, райисполкомсо ветясь животноводствань кевкстематнень.

Виде, Сергей Валентинович ней полады сынст ды райононь икелень прявттнэнь ушодксост ды теке шкасто совавты ламо од неень а шожда эрямонтень. Теи весементь, мезе вийсэнзэ, штобу тиринь ёнкссонзо эрицятне апак учонь орманть марто сюлмавозь стакачитнень цидярдовлизь ды седе курок шождасто лисевельть, кода рузокс мерить, пандемиянь шкастонть.

Теде ды ламо лиядо минь карминек содамо аволь умок Ромодановань ёнкссо улемстэ ды райадминистрациянь прявтонть марто кортамсто.
- Сергей Валентинович, инескеть, пачтядо, кода течи аштить тевтне Ромодановань ёнкссо апак учонь орманть эрямозонок самонзо марто. Ули меленек содамс се лезкстэнть, конань течи Тынь тейтядо вишка ды средней бизнесэнть ванстомга ды лия сферасо важодицятненень лезксэнь максомга?

- Алкукскак, те иень тунда ламось полавтовсь эрямосонок. Пандемиянь шкастонть администрациянь важодицятне кеместэ вансть сень мельга, кодат нормативной документт кемекстасть масторонь прявттнэ вишка ды средней бизнесэнтень лезксэнь максомга ды теде пачтясть минек предпринимательтненень. Истя жо льготат теевсть эсенек муниципальной территориясо арендас саезь помещениятнесэ безнесэнь ветицятненень. Койсэнь, те шкасто стака ульнесь весенень, аволь ансяк минек райононь бюджетэнть пештямонзо коряс. Кемтяно, аламонь-аламонь карматано лисеме стакачитнестэ, вельмевтевить микшнемань-рамамонь, общепитэнь (кафетнень-ресторантнэнь) важодемаст. Кода содатадо, зярс панжовсть ансяк ушонь веранда марто кафетне. Сеть лавкатнесэ, косо микшневи сехте эрявиксэсь - минь эзинек пекстакшно. Содазь, вишка ды средней бизнесэсь - райононть социально-экономической эрявикс ёнкстнэстэ вейкесь. Сонзэ вельде топавтовить социальной кевкстематне ды виевгавтови экономикась.



- Сергей Валентинович, те иесь ламо ёнксонь коряс лиятнень ёнов а молиця. Сехте ледстневицякс кадови Ине Отечественной войнань Изнямонь 75 иетень тешкстамось. Кода сон ютавтовсь Ромодановань муниципальной районсонть?

- Виде, Ине Изнямонь юбилеень датантень ульнесь ютазь иестэ покш анокстамо. Ульнесь арсема сонзэ ютавтомс келейстэ, мазыйстэ ды ламо ломань марто. Алкукс жо шкась совавтсь эрямос ламо полавтомат. Тень лангс апак вано, районсонок ламо вийть путозельть те покш событиянть ледстневицякс теемга, историяс сонзэ совавтомга. Койсэнек, Ромоданова ёнксонь малав весе эрицятне седеест пачк ютавтызь Ине Изнямонь кенярксчинть, эдь ловт, эрьва кудосто ульнесть фронтов туицят.

Апаро ормадонть прянь ванстомга кадык минь эзинек пурнаво ушосо вейс, Ине Отечественной войнасо маштовозтненень кеврунгонтень каштазтнэнь путынек овсе аламоненек, кода тень веши неень шкась, ялатеке эрьвась эсензэ кудосо ледстинзе малавикстнэнь, войнасо маштовозтнень лемест. Ризксэнтень, иестэ-иес аламолгадыть Ине Отечественной войнань участниктне, тылэнь тружениктне. Те покшчистэнть вановтомо кияк эзь кадово, эрьвантень пачтязельть казнеть Мордовиянь Прявтонть ды Ромодановань райадминистрациянть пельде. Неень шканть лангс апак вано, районсонть теезельть ламо ледстневиця тевть. «Культура» национальной проектэнть коряс одс теезель ульцясо сценась, конась сы шкане пек карми маштовомо покш мероприятиятнень ютавтомсто.

Теинек тензэ паро ютамо тарка, калгодо вельтявкс (брусчатка) марто паро ки, штобу иень эрьва шкасто авольть уле стакачить. Филатовонь лемсэ одкстомтозь парксонть озавтынек ламо чувтт, конатнень ютксо улить минек таркатнесэ чуросто вастневицят (каштант, туят). Витинек Ине Отечественной войнасо маштовозтненень кеврунгонть, свал палыця толонтень теинек гранитстэ теште.

- Сергей Валентинович, республикасонок эрязасто нолдавить тевс национальной проекттнэ. Кода аштить течи тевтне районсонок сынст эрямос совавтомга?

- Минек райцентрань эрицятне, сехте пек эйкакшонь триця семиятне, течи ламо сюкпрянь валт ёвтыть эйдень од кужонть «Демография» проектэнть коряс аволь пек умок строямонзо кисэ. Неень шкане тетятне-аватне а кирдить стакачить эйдень кужосо таркань сатомань коряс.
Теде башка, минек ёнксонь Белозерье велесэ «Демография» национальной проектэнть лувсо истя жо стявтови эйдень кужо. Текенень поладса, те велесэнть пек ламо эйкакшт. Неень шкане школасо тонавтницятнеде - 370, эйкакштне иестэ иес яла седе ламолгадыть, секс ули технической заданиянок - келейгавтомс тонавтнемань площадканть. Эйдень кужонть прядомадо мейле, кемтяно, сы иестэ карматано арсеме, кода седе парсте топавтомс те тевенть. Теде башка, райцентрасонок «Общественная территория, городская среда» национальной проектэнть коряс одкстомтынек Филатовонь лемсэ парконть. «Благоустройство территорий» проектэсь лездась паролгавтомс кудо икелькстнэнь, мазылгавтомс эйдень налксемань куншкакуротнень, теинек озамо таркат, валдомгавтынек сынст. Колмо иес паролгавтынек вейксэ кудо икелькст. Койсэнек, национальной проекттнэнь вельде удалась теемс ламо од ды паро тевть минек ёнксонь эрицятнень лезэс.

- Кода течи аштить тевтне важодемань таркатнень ламолгавтомаст коряс?

- Минек ёнкссо ули икелев молиця «Европак» предприятия, косо тевс нолдави а маштовикс калгодо конёвось. Сонзэ эйстэ теевить алонь путомань ячейкат ды лия изделият. Течи тосо важодить аволь ансяк Ромоданова поселкань эрицят, истя жо райононь велетнестэяк.

Аволь умок «Европак» ООО-нь прявтонть Р.А.Абдулловонь ушодксонзо коряс арсезель ламолгавтомс продукциянть нолдамонзо ды теемс важодемань од таркат. Од линиянть панжомадо мейле важодеме саевить эштё 65 ломанть. Те од тевесь коронавирусонть кувалма зярс кирдеви. Кемтяно, сонгак маласо шкасто изняви, «Европаксо» жо ушодозь тевтне поладовить.

- Неень шкане республикасонок поладови теле лангс тикшень анокстамось, ушодови сюронь урядамось. Кода ютыть тевтне велень хозяйствасо?

- Алкукскак, те иесь пертьпельксэнь коряс явови икеленсетнеде. Целанек урожаесь кастовсь паро. Минек велень хозяйствань предприятиятне прядызь ламо иень тикшетнень ледемаст, ней анокстыть вейке иенсетнень ледемантень. Июлень 24-це чинтень анокстазь 36907 т. сенаж, 4298 т. тикше. Ракшатненень коромось анокстазь сатышка. Тешкстаса, ёнксонок лиятнеде явови пиже кснавонь ды ламбамо якстерькаень кастомасо. Васенценть ушодсть пачтямо сонзэ тевс нолдамга.

Течи райононь экономикань аграрной секторсонть велень хозяйствань 7 предприятиям сынст ютксо колмо ООО-т, кавто - на вере товариществат 1 - велень хозяйствань производственной кооператив ды крестьянонь-фермерэнь 18 хозяйстват.

Велень хозяйствань техникась умок уш анок паксяв лисеме, весе кастозенть пурнамо. Икелепелень ванкшноматнень коряс, арсетяно саемс паро урожай, невтевксэнек а алкиньгавтомс икелень коряс.

- Сергей Валентинович, кодамо сехте покш ды эрявикс тев арсетядо топавтомс Ромодановань муниципальной райононь прявтонь тевенть топавтомсто?

- Ромодановань посёлкань эрицятне неень шкане кирдить покш стакачить вейкине (единой) канализациянь аразьчинть кувалма. Прявтокс тевень топавтомо ушодомсто васняяк аравтынь эсень икелев истямо вешема: витемс те асатыксэнть. Ушодкс путозь, сонзэ туртов проектно-сметной документациянть анокстамось кирдеви ансяк вейке тувталонть - пандемиянть коряс. Арсеманок истят, те тевенть топавтомга 2021 иес совамс «Современный облик сельских территорий» целевой программантень. Эштё вейке тев арсян топавтомс - паролгавтомс китнень.

Неень шкане Ромодановань муниципальной районсонть ули весемесь парсте эрямга: вадря школат, сатышка таркат эйдень кужосо, рунгонь шумбралгавтомга Эень дворец, стадион, Культурань кудо, историко-краеведениянь музей ды эйкакшонь искусствань школа. Неть объекттнэ течи пек эрявикст ломантнень мелест топавтомга, эрямост паролгавтомга.

- Кадык весе арсезесь топавтови!

Валентина ЮДИНА, Ромодановань район
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».