Вторник, марта 19, 2024
Важное


Течи «Ардатовский светотехнический завод» акционерной обществань продукциясь содавикс аволь ансяк минек республикасо, истя жо сонзэ парсте содасызь Россиясо ды омбо мастортнэсэ. Неень шкане тосо теевить эрьва кодамо модификациянь 3000 ламо валдомтыця приборт, конат тевс нолдавить республикасо ды масторонь лия регионтнэсэ. Те заводсонть нолдазь лампатне неень шкане валдомтыть Россиянь ды Мордовиянь спорткомплекстнэнь, школатнень, эйдень кужотнень, промышленной ды муниципальной объекттнэнь.



«Ардатовский светотехнический завод» акционерной обществасонть сехте покш питне путыть важодиця ломанентень, а сындест течи тосо ветесядто ламо. Кода корты «АСТЗ»-нь генеральной директорось Г.В.Аверьянов, кода икелеяк, истя нейгак, тевест парсте содыця специалисттэме, неень шкань кодамо оборудования илязо уле, кодат инновациянь од технологият тевс авольть нолдаво, изнявкстнэ а саевить. Нама, васень таркасо ашти ломанесь, сонзэ содамочитне, опытэсь ды оймесь, конань путы вейсэнь тевс.
Те предприятиясонть улить трудонь ламо династият, истят важодицят, кить пингест алтызь вечкевикс заводонтень. Сынь зярдояк эзть вешне шожда кить. Заводонть васенце эскелькстнэнь теемстэ, стака 90-це иетнестэ ды нейгак, ламо иетнень лангс апак вано, весе виест, содамочист казить тиринь предприятиянтень. Истятнэнь юткс, нама, сови трудонь ветеранось, тевензэ алкукс содыцясь, одтнэнь тонавтомо бажицясь Анатолий Алексеевич ФОМИН.

…Орданьбуень Тургенева посёлкантень пачкодинек обед малав, сеске ютынек Светозаводонтень – истя тесэнь эрицятне лемдить Ардатовской светотехнической заводонть. Тесэ минек учось кенярксов вастовома: паро ломаненть – Анатолий Алексеевич Фомин марто. Учома шкастонть кенеринек варштамо сонзэ трудовой книжканть, косто сеске рединек истят сёрмадовкст: максозь премия «Рациональной предложениятнень кисэ»; ламо иень перть заводсо седейшкава важодеманть кисэ – «Трудонь ветеран» почетонь лем ды эштё ламо лия казнеть… Кадрань отделсэ важодицятне мерсть, эштё эзть кенере тей совавтомо МР-нь Госсобраниянь Почетонь грамотанть.
Вана вастовинек аволь пек сэрей, чевте варштавкс, ёлганя рунго цёранть марто, кие пенсияв лисемадо мейлеяк полады важодеманзо тиринь предприятиясонть. Кода карминек содамо, А.А.Фомин тей сась 43 иеде икеле.

– Монь чачома-касома таркась – Орданьбуень райононь Баеньбуе велесь. Эсь шкасто тонавтнинь ды прядыя Тургеневань средней школанть, – стамбарнэстэ кортазь, пачтясь тенек Анатолий Алексеевич. – Касынь ламо эйкакшонь семиясо, эйкакштнеде эйстэнек ниле цёрат, кавтотне, кода монгак, важодсть те заводсонть. Ней сынь пенсиясот, ды монгак колмо ковдо икеле официальна лисинь пенсияс.
Кевкстеманок лангс, кода весемесь ушодовсь, сон ёвтнесь: «1976 иестэ, школанть прядомадо мейле, сеске сынь заводов строгальщикекс тонавтницякс, иень ютазь саимизь армияв. Служинь погранвойскатнесэ. Виде, васня савсь тонавтнемс ды прядомс сержантонь составонь Брестэнь школанть, теде мейле ильтимизь Польшанть марто границянть малав КПП-нь ванстомо. Армиясто самодо мейле строгальщикень тевентень вакансия арасель, мерсть тень улемс слесарекс-ремонтникекс. Шкань ютазь аравтымизь бригадирэкс. Теде мейле – старшей мастерэкс, мартон сестэ важодсть 40-50 иесэ цёрат, кинь опытэст ков седе покш ульнесь, те тевенть жо монень максызь».
Анатолий Алексеевич те шкас мельспаросо ледстни тонавтыцянзо – комплексной бригадань бригадирэнть Сергей Григорьевич Сахматовонь, конась ней уш арась ютксонок. Сестэ, сонзэ старшей мастерэкс путомсто, Сахматов каясь кисэнзэ вал. Весень пингстэ мерсь: «Цехесь тензэ кирдеви». Неть валтнэсэ ёвтазель весемесь.
– Кемгавтово иень перть важодинь старшей мастерэкс. Нама, сестэ пек ламо ломанть роботасть цехтнесэ, секс улемс бригадирэкс – те пек ответственной тев. Те эдь ней витницятнеде эйстэнек вейксэ ломанть, – кортась Анатолий Алексеевич.

Те шкас а стувтови, кода сестэ сынь весе вийсэ важодсть. Эрьва ломаненть марто эрявсь маштомс кель-вал муемс, а сындест ульнесть сядодо ламо. Лиясто эрявсь кармавтомс ломаненть лисемс важодеме оймсема чистэ эли омбоце сменас кадовомс. Эрьванть эсензэ обуцязо, аволь весе сеске анокт топавтомс тевенть. Сынсткак чарькодемат: улить семияст, икелепелев арсемаст-тевест… Теке кевкстеманть лангс лия ёндояк варштават, бути ломанесь лиси важодеме субутасто, тень кисэ ялатеке тензэ максыть эштё вейке оймсема чи. Сёрмадт яволявтома се шкастонть, зярдо тонеть эряви. Весе тень эрявсь маштозь пачтямс ялгатненень, штобу сынь чарькодевельть, авольть кежиявто ды седейшкава топавтовлизь эрявикс тевенть шкастонзо.
Масторонь келес тевтнень одс ладямонь шканть (перестройканть) пингстэ аволь весе вейкетьстэ маризь апак учо празь стакачитнень. Кода пачтясь тенек А.А.Фомин, сынь тунь лиякс цидярдызь 90-це иетнень. Анатолий Алексеевичень валонзо коряс, овсе аволь вейкеть эрямонь ёнкстнэ веленть ды ошонть ютксо. Виде, велесэ, кода свал, стакачить ульнесть, ансяк сынь цехтнесэ сэтьместэ топавтсть тевест. Обуцяст эзть невтне сестэяк, зярдо эзть пандо, лиясто важодеманть кисэ пандсть ашо винасо. Тень лангс апак вано, ломантне важодсть оймень путозь. Весе тевтне ветявсть парсте, эрьва чинь важодемась шкастонзо топавтозель.

– Кудоютксо жо ракшат-мезть ульнесть, вазт кирдинек, тулевксэнек нейгак улить хозяйствасонок. Сестэ козяйкам марто эрьва чистэ вейке сменас якинек важодеме ды весементь кенеринек тееме, – полады кортамонзо А.А.Фомин.
Анатолий Алексеевич эрямонь уцясканзо лангс а пеняци. Весемесь сонзэ сась шкастонзо. Армиясто самодо мейле, 1980 иестэ, урьвакстсь, кавто тейтерест чачсть. Вейкесь тусь тетянзо киява, тонавтнемадо мейле сась важодеме Ардатовской светотехнической заводов, омбоцесь – правань ванстыця органонь сотрудник, максозь тензэ лейтенантонь званиясь.
Заводсо династиятнеде ледстнемстэ А.А.Фомин тешкстась, эштё вейке малавикс ломанезэ – крёстной тетязо, тетянзо ялаксось Яков Алексеевич Фомин, кавксоньгеменце иетнестэ важодсь сонзэ бригадасо. Сестэ кавонест бригадатне кавто сменасо роботасть. 2005 иестэ весе вейсэ ютасть од корпусос. Сень лангс апак вано, Анатолий Алексеевичень арась высшей образованиязо, слесарень тевенть пек парсте содасы, а стяко аволь вейке ломань тенень тонавтсь.
– Важодема таркасо эрямонок поладови, весе тевтнень оймень пачк ютавттано. Бажатано одонть содамо, сонзэ видестэ тевс нолдамо, – корты Анатолий Алексеевич.
Икелепелев аравтлувдонть кортамсто сон тенек мерсь:

– Неень шкане анокстатано суликатнень од лувсо нолдамонтень. Ванкшносынек весе асатыкстнэнь, обед шкась сы, обедтэ мейле таго вансынек, кода установкась невтьсы прянзо тевсэ. Невтемакс, эрявить тенек форматт, рамамс – сынь пек питнейть. Усксть тенек материал. Паро, цехсэнть улить ЧПУ станоконок, весементь эйсэст тейтяно. Течи эрямос совавтовить од технологият, ламось тееви инновациянь лувсо, цехтне полавтовить од линиясо.

Анатолий Алексеевичень валонзо коряс, ломаненть туртов свал карми улеме тев. Невтемакс, сон ёвтызе аволь умок лия производствас од станоконь аравтоманть. Тень коряс савсь пшкадемс лия специалистнэнь. Эдь чарькодиця ломантеме ялатеке неть од тевтне а топавтовить.

– Течи ули мелем ёвтамс сюкпрянь валт минек прявтонтень Григорий Васильевич Аверьяновнень. Аволь пек умок Культурань кудосо казнень максомсто мерсь: «Ули мелеть икелепелев важодемс? Истят специалистт тенек эрявить». Видькстан, истят валтнэ седей эждить, икелепелев важодемс вийть максыть, – мерсь А.А.Фомин. – Одтнэнень бу меревлинь: а пелемс стакачиде, бажамс седе домка содамочинь пурнамо ды сынст эрязасто тевс нолдамо, сестэ разрядонкак седе покш ули, зарплатанкак курок касы!

Валентина ЮДИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».