Понедельник, июля 04, 2022
Важное

ИЗНЯМОНЬ ЧИСТЭНТЬ САРАНСКОЙСЭ ДЫ МОРДОВИЯНЬ ЁНКСТНЭСЭ ЮТАВТОВСТЬ МЕРОПРИЯТИЯТ, КОНАТ АЛТАЗЕЛЬТЬ 1941-1945 ИЕТНЕСТЭ ИНЕ ОТЕЧЕСТВЕННОЙ ВОЙНАСОНТЬ ИЗНЯМОНЬ 77 ИЕТНЕНЬ ТЕШКСТАМОНТЕНЬ. МЕЕЛЬЦЕ КАВТО ИЕТНЕСТЭ ВАСЕНЦЕДЕ, ЭПИДЕМИОЛОГИЯНЬ ТЕВТНЕНЬ МЕЛЬСЭ КИРДЕЗЬ, ВЕСЕ КЕНЯРКСЧИТНЕ ЮТАВТОВСТЬ КЕЛЕЙСТЭ ДЫ ОЧНОЙ ЛУВСО.



Кенярксчинь прявт тевтне ушодовсть Саранскойсэ Изнямонь площадьсэнть, косо ветявсь торжественной митингесь. Сеть иетнень зыянов тевтнень участниктненень ды неицятненень сюконямо, изницятнень поколениянтень сюкпрянь ёвтамо, сетнень ледстямо, кить арасть ютксонок, састь Мордовиянь прявт ошонь эрицятне ды инжетне.
Митингенть-реквиементь ушодовомадо икеле Мордовиянь Прявтось, «Единая Россия» партиянь Мордовиянь региононь отделениянь секретаресь Артём Здунов мольсь ветерантнэнь ды тылсэ важодицятнень ваксс. Сон сювордынзе геройтнень кедест ды ёвтась сюкпрянь валт нацизманть эйстэ идезь масторлангонть, минек Чачома масторонть олячинзэ кисэ.

Мордовиясто 1941 иестэ фронтов тусть 240 тёжадо ламо ломанть, пеледест ламотне эзть велявто. Республикасонть пурназельть ды топавтсть тевест воинской частть, тонавтнемань военной заведеният, 14 госпитальть, строязельть 20 ламо аэродромт. Солдаттнэ ванстсть Тиринь масторонть передовойсэ, сыре ломантне, аватне ды эйкакштне – тылсэ. Весементь, мезенть маштсь, республикась макссь фронтонтень.

Кенярксчинь митингенть панжомсто Мордовиянь Прявтось ёвтась поздоровт пурнавозтненень минек масторонть историясо Ине чинть кувалма: «77 иетнеде икеле минь ванстынек тиринь Отечестванть, олякстомтынек фашизманть эйстэ ламот мастортнэнь ды ломантнень. Минек республикасо чачозтне топавтсть ине тевть весе фронттнэсэ: Брестэнь крепостенть ванстомсто, Московонь, Ленинградонь, Севастополень оборонанть шкасто, Сталинградонть ало ды Курской дугасонть тюрематнесэ, Союзонь республикатнень – Украинанть, Белоруссиянть – ды весе Европанть олякстомсто. Тылэнь важодицятне, нужачинть ды вачочинть лангс апак вано, малавгавтсть Изнямонть станоктнень икеле, паксятнесэ, Сурань рубежсэнть ды госпитальтнесэ. Аватнень ды сыре ломантнень марто вейсэ тылсэ важодсть войнань эйкакштнеяк. Пингеде-пингес палыця толонть вакссо минь комавтсынек прянок сетнень валдо лемест ледстнемга, кить эзть велявто войнасто, кить сонзэ прядовомадонзо мейле вельмевтсть народной хозяйстванть. Весемесь те теезь минек туртов, минек эйкакштнень туртов, изницятнень сы шкань поколениятнень туртов!»
Республикань руководителесь тешкстызе, течи, кода зярдояк икеле, эсенек эйкакштненень ды нуцькатненень эряви ёвтнемс минек тетятнень ды покштятнень ине тевдест, геройтнеде, кить воёвасть Изнямонть кисэ.

«Ламо иетнень ютазь, зярдо нацизмась одс кармась кепедеме прянзо, западонь мастортнэнь мелень а явомаст пингстэ, минь вансттано минек ламо раськень эрицятнень ды масторлангонь весе ломантнень мелест-вановтост. Российской Федерациянь Верховной главнокомандующеесь, Россиянь Президентэсь Владимир Владимирович Путин ёвтынзе героекс Украинань эрицятнень олякстомтомань коряс специальной военной операциянь весе участниктнень. Ды эрьва боецэнтень, сынст малавикстнэнень пек эряви минек лезксэсь-кирдемась», – тешкстызе Мордовиянь Прявтось.
Сон ёвтась сюкпря Мордовиянь эрицятненень се лезксэнть кисэ, конась явови республикань инжетненень, конат састь Донбассто, Луганскойстэ ды Мариупольстэ.

Мордовиясо чачозь воинтнэнень, кить маштовсть 1941-1945 иетнень Ине Отечественной войнасонть, кеврунгонтень путозельть цецят. Торжественной митингтэнть мейле Изнямонь площадьсэнть ютавтовсь кенярксчинь парад. Сонзэ участниктне ютасть ошонь прявт куротнева Мемориальной калмазырентень, тосо ютавтовсь панихида ды путовсть цецят «Скорбящая Мать» кеврунгонтень ды Саранскоень госпитальтнесэ томбавоматнеде кулозь воинтнэнь братской калмотненень.

Ине Изнямонь чистэнть Мордовиясь вейсэндявкшнось «Бессмертный полк» акциянтень. Саранскойсэ тетяст ды покштяст портреттнэнь марто ютамосонть ульнесть Изницятнень эйкакштне, нуцькатне ды праправнуцькатне. Эрьва снимкасонть, конань сынь кандсть кедьсэст, ломантнень, семиятнень ды цела масторонть уцяскатне. Кавто иеть акциясь ютавтовсь онлайн лувсо. Те шкась невтизе, акциясь эряви Россиянь эрицятненень.

Мордовиянь прявт ошсо ютамонть прявтсо ульнесь Артём Здунов. «Бессмертный полк» акциянтень сон сась семиянзо марто. Республикань Прявтось кедьсэнзэ кандынзе сыре покштянзо ды покштянзо фотографиятнень.

Сыре покштязо, Иван Васильевич Лобанов, фронтсо ульнесь старшей сержантокс, 2-це Белорусской фронтонь 65-це армиянь 186-це стрелковой дивизиянь 238-це стрелковой полконть юрсо минометной взводонь командирэнь лездыцякс. Воёвась Белоруссиясо, Польшасо, Германиясо.

Покштязо, Николай Кузьмич Здунов, тусь фронтов 18 иесэ. Сон ютызе весе войнанть, ульнесь сержантокс, мейле – мичманокс. Пачкодсь Кёнигсбергенть видьс, мейле кучозель Японияв. Николай Кузьмич казезь ламо наградасо.

Саранскойсэ ютамось ушодовкшнось 15 чассто чугункань кинь вокзалонть икеле Геройтнень-стратонавттнэнь площадьстэнть. Мордовиянь прявт ошонь эрицятне ды инжетне пурнавсть акциядонть икеле. Эрьванть туртов «Бессмертной полксо» улемась – минек Отчизнанть ванстомсто маштовозь боецтнэнь ледстямо. Участниктнестэ ламотне течинь чис бажить содамс малавиксэст уцяскадост, кить эзть велявто тюремань паксятнестэ.

Саранскойсэ патриотической мероприятиясь прядовсь Изнямонь площадьсэ Свал палыця толонтень цецянь путомасо ды чатьмонемань минутасо. Саранскойсэ «Бессмертной полконь» ютамосонть ульнесть 35 тёжат ломанть, республикасонть – малав 70 тёжат.

Изнямонь чись Саранскойсэ прядовсь фейерверксэ, конась нолдазель ошонь прявт площаденть велькссэ 22 чассто. Салютонь ваномо сакшность тёжат ломанть.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».