Воскресенье, мая 26, 2024
Важное
Мордовиянь эрицятне максыть покш лезкс минек цёратнень туртов, конатне тюрить неонацисттнэнь каршо
спецоперациянть шкасто.
Орданьбуень «сиянь» волонтёртнэ ды ветеранонь советс совицятне рамасть кекшемань
оршамот минек боецтнэнь-снайпертнэнь туртов. Эзизь жаля ярмакост, эдь эрьва истямо кекшемапелесь вансты
ламо эрямот ды техника. Теде башка, пенсионертнэ эрьва чистэ кодыть маскировкань алтымат ды уш ильтясть передовойс ниленьгеменде ламо.

Эзть кадово ве ёнов минек редакциянь сотрудниктнеяк. Аволь
умок минь якинек алтымань (сетень) кодамо Саранск ошсо панжозь «Zа наших» штабонтень, конась ашти Васенко ульцянь 15
кудосонть. Тов лездамо тердевить весе пондельникстэ, середасто ды
пецясто 14 чассто саезь 19 часос ды субутасто 10 чассто саезь 17
часос. Те штабсонть аволь ансяк кодавить кекшемапельть, истя жо
пурныть посылкат ды ильтить эйсэст передовойс. Кода ёвтни штабонь прявтось Юлия Адушкина, неть читнестэ боецтнэ учить кеменде ламо алтымат, секскак штабось учи ламо лездыця кедть.

Зярдо редакциянь сотрудниктне састь лездамо, тосо уш важодсть
Мордовиянь МЧС-нь Прявт управлениясто аватне ды «28 петель»
Саранск ошонь клубонтень якицятне. Алтымась тенек сатотсь покш
ды стака, сетень варятне ульнесть вишкинеть, секскак тевесь мольсь
а шождасто ды аволь эрязасто. Ансяк цёратне передовойсэ пек учить
эйсэст, ды минь вейсэ бажинек прядомс алтыманть чокшнес. Тевесь топавтозель! Арсетяно, тенек лездась вейсэндявомась ды «Катюша» морось, конанть гайгстынек мирём. Кода мерсь Юлия Адушкина кураторонок, неть алтыматне кармить пештязь седеяк паро
энергетикадо. А вана Орданьбуень аватне сеттнень кодамсто аволь ансяк морыть, сынь эрьва кодавксонть крёстнить ды ловить лангсост озномат.

Зярс кодынек сеттнень, штабонтень секе-тев сакшность ломанть, усксть продуктат, оршамопельть, салтозь куяр ды помидор марто
банкат, бензинэнь эли соляркань кирдемс бакт… Мейле сась цёра,
конась весе гуманитарной лезксэнть кармась пештямо эсь машиназонзо. Карминек содамо, сон сеедьстэ ардтни тов ды ускси сталмотнень минек цёратнень туртов. Мезе эряви, сынь сёрмадыть «Zа наших» штабонь куратортнэнень, а сынь мейле пурныть ярмакт сынст рамамс эли вешнить спонсорт мессенджертнэнь ды соцсеттнень вельде.

– Сюкпря неть ломантненень, зяро паро сынь теить минек воинтнэнь туртов, – ёвтни Юлия Адушкина. – Минек группась куроксто топавты вешематнень ды ильти сынст передовойс. Эрьва целковоесь неень
шкане эрявикс! Юлия ды ялганзо пек ламо паро теить ды натой лиясто сюлмить апак урьвакстозь цёратнень, конатне тусть спецоперацияв,
тесэнь апак венча аватнень марто.
Передовойсэяк, госпитальсэяк сыненст пек эрявить лембе, седеень эждиця валт ды сёрмат.

«Zа наших» штабось терди весень лездамс минек алкуксонь цёратненень, масторонь идицятненень-ванстыцятненень.

Илядо юта вакска!
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».