Среда, августа 05, 2020
Важное

Саранскойсэ эриця ламо эйкакшонь триця Адушкинтнэнь семиянть содаса умок. Вейке-вейкенек эйстэ эрятано а васоло. Икеле малав эрьва оймсема ды кенярксчитнестэ мартост вейсэ яксинек Казанень Пазонь Аванть лемсэ вейке храмов. Мельспаросо сеедьстэ мельгаст ванынь ушова якамсто, лавкав совамсто. Свал сельмс каявсь те кото эйкакшонь триця семиясонть вейке-вейкень чарькодемась ды вейке-вейкеде мелявтомась.

 

Неень а шожда шкастонть, зярдо эрямозонок кеместэ совась «самоизоляция» валось, ламот юткстонок важодсть кудосо, эйкакштне тонавтнесть дистанционна.

Василий Васильевич ды Людмила Геннадьевна Адушкинтнэнь эрямост-оймсемаст мельга ванынь социальной сеттнень вельде. Покш семиянть лангс апак вано, Людмилань сатнось шказо тосо невтемс эрьва чинь тевест.

Кодашка покш мельспаро седеем пештясь, кода сынст эйкакштне сайсть изнявкст Саранск ошсо ды республикасонок ютавтовиця эрьва кодат пелькстамотнесэ.

Алкуксонь кенярксонок теевсь «Иень семия» («Семья года») Весероссиянь региононь этапонь пелькстамосонть, косо сынь саизь васенце тарканть «Ламо эйкакшонь семия» номинациясонть. Тешкстасынек, те пелькстамосонть истя жо изницякс лиссть Саранскойстэ Сайфутдиловтне «Од семия» ды Отяжелень районсто Сорокинтнэ «Койтнень-кирдатнень ванстомань кисэ» номинациятнень коряс.

Ледстясынек, те пелькстамось зярс ютавтовсь эсенек республикасо. Седе тов сон поладови масторонь келес, кизна кочкавить Россиянь весе регионтнэстэ сехте партнэ, изницятненень казнетне максовить сёксня. Течи минек редакциянь инжетне – Адушкинтнэнь семиясь.

Ламо эйкакшонь триця семиясонть мирденть ды нинть Адушкинтнэнь ламо вейкетьксчист. Васняяк,  чачома таркась. Сынь кавонест Орданьбуень районсто. Василий Адушкин чачсь-кассь Жаренкасо, Людмила Адушкина (тейтерьксэнь фамилиязо Карпушкина) – Чукалосо. Теевсть содавиксэкс, зярдо од ломантне кармасть тонавтнеме Чукалонь средней школасо, кавонест невтсть домка содамочить, парсте прядызь школаст. Нать, а стяко поладызь тонавтнемаст Саранскоень вузсо, максызь документэст Н.П.Огарёв лемсэ Мордовской государственной университетс: Василий – электронной техникань факультетс, Людмила – Историко-социологической институтс. Истя лиссь, эли сынсь одтнэ икелепелев арсизь, тонавтнемань корпусосткак аштесть рядсек.

Эштё студентэкс улемстэ, зярдо тенст топодсть комсень комсь иеть, одтнэ сайсть мель урьвакстомс-венчамс. Кодамо мазый ды валдо ульнесь венчамост-урьвакстомаст, теде течи ёвтнить эрьва кодат фотографиятне ды пингень перть а стувтовиця ледстнематне, конат кадовсть одтнэнь ды сыненст сыця инжетнень мельс.

Виде, студентэкс урьвакстомсто-венчамсто неень шкане одтнэстэ ламотне эйкакшонь чачтомань кевкстеманть кадыть мейлес. Ламот арсить васня тонавтнеманть прядомадо, кой-кить эрямо таркань рамамодо. Ансяк Адушкинтнэ аволь истятнэнь ютксто. Эштё студентэкс улемстэ сынст чачсь Марина тейтернест, лементь кочкизь Людмилань аванзо коряс. Нать, а стяко обуцянь ламо ёнкстнэ тензэ ютасть бабанзо пельде: тевтеме а аштемась, ламо ды парсте тееме бажамось.

Студентэнь семиясь эзь кекшне стакачитнеде, мекевлангт, бажась тонавтнемс ялгатнеде седе парсте, куш эйкакшось сайсь ламо шка. Малавиксэст ды эсест мельспарос, вузонть кавонест прядызь якстере диплом марто. Тешкстасынек, электронной техникань факультетэсь аволь шождатнестэ. Ансяк од тетясь мусь шка кода тонавтнемс, истя нинзэ туртовгак ламо лездамс. Ансяк алкуксонь вечкеманть пингстэ цидярдовить весе стакачитне.

Мирденть ды нинть ютксо покш вечкемась лездась теемс ояксчисэ эриця покш семия, косо эрьва эйкакшось содасы эсь тевензэ, эрьвась юткстост анок лездамс сондензэ вишкинентень.

 

Весемесь тееви эсест кедьсэ

– Ломанть кортыть: монень прась уцяска вастомс паро мирде! Те алкукс истя! Тенень бу эштё поладовлинь, уцясканть ванстомга эсеть лангсояк эряви ламо важодемс. Сон свал монень корты, мон сехте вадрян (куш истя а ловангак). Эрьва тевсэ бажи лездамс. Эйкакштне, тень неезь, бажить улемс истямокс жо. Бути тетясь рангозь ильтясынзе уроконь тееме, а сонсь се шкастонть озы телевизор икелев пия цярка марто, кодамо пример сон невти тенст.

Койсэнь, ламось тень сась эсень семиясто. Сеедьстэ неинь, кода тетям-авам вейкест-вейкест ванстсть ды казсть кенярксчи, кортасть ансяк сыненст чарькодевиця валсо, – ёвтни Людмила Геннадьевна.

Эйкакштненень неема, кода тетясь-авась ванстыть вейкест-вейкест, кутмордазь паро валт ёвтыть. Невтемакс, тетясь мери авантень: «Тон сизить, азё оймсек, мон тарказот тевенть тейса». Сестэ цёрынесь, вишкинестэ тень редязь, истя жо карми ванстомо нинзэ.

 

Ялгатнеде

Людмила Адушкинань валонзо коряс, одсто минек эрсить ламо ялганок. Веенсттнэнь марто тонавтнинек, омбонсттнэнь – вейсэ важодинек, оймсинек. Виде, сехте кемевикстнэ свал кармить улеме эрямосонок.

Сонзэ туртов алкуксонь ялгакс свал кармить тетянзо-аванзо, сазоронзо семияст ды мирдезэ. Комсь иень перть сон тонавтызе пек ламос. Василий Людмилань туртов весе: мирде, ялга, вечкевикс ломань. Ялгатне – те Пазонть ёндо кисэнек покш мелявкс. Сон невти тенек, минь аволь ськамонок масторлангсонть. Алкуксонь ояксчись – те покш сюпавчи. Тень ловозь, сонзэ эряви пек ванстомс.

 

Эйкакштнеде

Кода уш вере ледстинек, васенце эйкакшост – Марина, мельганзо чачсть Серёжа, Валентина, Василий, Варвара, Настенька. Покшсто вишкинес весе кунсолыть тетяст-аваст, пек чуросто эрсить те семиясонть аладямот. Маринанень 11 ие, общеобразовательной школадонть башка сон яки музыкальной школав ды вечксынзе бальной киштематнень, Сергей сови хоккеень командас, Валентинань парт невтевксэнзэ спортивной гимнастикань коряс, тензэ максозь юношеской II разрядось. Василий истя жо ламос тонадсь патянзо пельде. Варвара ды Настенька куш эштё вишкинеть, ялатеке бажить улемс леляст-патяст ёнов молицякс.

Покштне ванськавтыть кудопотмонть, бути эряви, пидить ярсамопель. Вишкинетне тенст лездыть. Ды мезесь сехте паро, сынст а эряви кармавтомс те эли тона тевенть топавтомо.

Теить седейшкава ды парсте. Виде, сехте покш стакачись пры кудазораванть лангс: пидемась-панемась, муськемась-гладямось, эйкакштнень мазыйстэ оршамось. Теке шкасто сонзэ сатыть виензэ парсте якамс эсензэ мельга, свал улемс мельстуицякс, мазыекс ды кенярдыцякс! Виде, теньсэ тагояк покш путовксозо эриялганть – мирденть. Карантинэнть самодо икеле Людмила сонсь ильтясь-вастсь эйкакштнень школасто ды спортивной секциятнестэ. Юткошкасто тензэ свал лездась Василий мирдезэ.

Неень шкань апаро орманть пингстэ вейке-кавто эйкакшонь трицятнеяк пеняцясть-майсесть социальной сеттнень вельде тонавтнеманть коряс. Адушкинтнэнь ламо эйкакшонь триця семиясонть жо эрьва мезень тееме кенерсть. Аволь весть ваныя Инстаграмонть вельде, кода Валентина тейтерест апак кармавто кудосо ютавтсь тренировкат художественной гимнастикань коряс. Ёлганя рунго, мазый чачо тейтерькась апак лотксе менчевсь ды комсесь се шкас, зярс эзь тееве тензэ упражнениясь истя, кода мерсь тензэ теемс тренерэсь. Нать, а стяко те тештиненть улить ламо казнензэ, конат кенярдовтыть аволь ансяк малавиксэнзэ, истя жо тонавтыцянзояк. Неть шнамонь валтнэ ладить Адушкинтнэнь котонест эйкакштненень, кить лововить те ламо эйкакшонь семиясонть алкуксонь сюпавчикс.

Кадык Пазось сынст ванстсынзе те а шожда шкастонть апаро орматнеде ды лезды тенст лисемс изницякс масторонь келес яволявтозь пелькстамосонть. Минь сыненст кемтяно!

Валентина Юдина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».