Вторник, ноября 28, 2023
Важное

Потребкооперация 2

Апрелень 12-це чистэ минек республикасо ютавтовсь регионъютконь покш промкс – «Кооперация: новые форматы межрегионального взаимодействия» форумось.

Покш инжекс кармасть Центросоюзонь Советэнь председателесь Дмитрий Зубов, Россиянь Федерациянь Федеральной Собраниянь Государственной Думань Аграрной кевкстематнень коряс комитетэнь председателень полавтыцясь Юлия Оглоблина, истя жо Равчирень вете регионтнэстэ кооператортнэ, штобу ёвтнемс потребительской кооперациянь сехте вадря практикатнеде. Истя лиссь, Мордовиясо потребкооперациянь системась малав целанек яжазь, теке шкане ламот регионтнэсэ сон эри ды виензы. Мордовиянь Прявтось Артём Здунов пшкадсь Россиянь Центросоюзонь руководствантень: явомс республикантень лезкс веленть туртов те эрявикс ёнксонть вельмевтемасо. Ды Центросоюзось маризе те энялдоманть.

Мордовия Республикасо потребительской кооперациянь виевгавтомань коряс регионъютконь форумось ютавтовсь Технопарксо. Равчирень федеральной округонь потребительтнень обществатнень регионтнэва вейсэндявкстнэ анокстасть выставкат, конатнесэ невтизь изнявксост ды эсь производствань сехте вадря продукциянть.

Татпотребсоюзонь Правлениянь Председателесь Рашат Шаймарданов содавтызе Мордовиянь Прявтонть «Сельский магазин» ды «Автолавка» региононь проекттнэнь марто, истя жо ёвтнесь Татарстанонь кооператортнэнь эсь производствань продукциянь нолдамонь кастоманть коряс свалшкань важодемадонть. Республикань кооператортнэ эсь экспозициясонть невтизь кооперативной продукциянть, паневкстнэнь ды раськень ярсамопельтнень.

Нижегородской кооператортнэ форумонтень пурнавозтненень ёвтнесть «Автолавка в село» областень проекттэнть, истя жо дивавтызь инжетнень кшисэ-прякасо, ламбамопельсэ, сывелень ды колбасань теевкстнэсэ, полуфабрикаттнэсэ, салтозь ды коптязь калтнэсэ, аволь иредстиця симемапельтнесэ (лимонад, поза ды лият).

Ульяновской облпотребсоюзонь площадкасонть инжетне теевсть содавиксэкс кшитнень-прякатнень марто, конатнень панить Новомалыклинской райпонь кооператортнэ. Выставкань башка ёнксокс кармасть колобоктне ды колебяткатне, конатнень панить райпонь хлебозаводсонть.

Чувашиянь кооператортнэ Мордовия Республикань руководствантень невтизь рамамотнень централизациянь коряс свалшкань важодеманть ды башка-башка микшнеманть туртов продукциянь ассортиментэнть коряс оперативной важодеманть. Выставкантень сынь ускокшность «Ядринский мясокомбинат Чувашпотребсоюза» ООО-нь «Шартан Чувашский» раськень колбасанть, те республикань бренд, истя жо эсь производствань эмежень консервань продукциянть ды соктнень.

Марпотребсоюзось выставкасонть невтсь ламбамо ярсамопельть, макаронань, колбасань теевкстнэнь, аволь иредстиця симемапельтнень, соустнэнь, сюкоротнень, вешенка панготнень, конатнень кастыть Моркинской райпосонть. Маринь кооператортнэ невтизь кооперативной стамонь цехень теевкстнэнь: халатт, майкат, удомапельть, оршамопельть. Мордовия Республикань Прявтонть каванизь Кравец горномарийской раськень ярсамопельде – сывелень кругловой прякадо, конань маритне панить семиянь эрямосо покш тевтнес.

Мордовиянь кооператортнэ нолдыть продукциянь 300 ламо видт, сон явови вадрячисэ ды экологичной. Сынь анокт ванномс регионъютконь вейсэнь важодемань эрьва кодат ёнкстнэнь. Выставкасонть сынь невтизь Ельникень райпонь крестьянско-фермерской хозяйствань ловсонь продукциянть, тантей лимонадтнэнь ды кшитнень-прякатнень, истя жо раськень ярсамопельтнень, конат пидезь-панезь кезэрень рецепттнэнь коряс.

Россиянь Центросоюзонь прявт специалисттнэ пачтясть проекттнэде, конат топавтовить масторонь ламот регионтнэсэ: «Автолавка», «КООП-маркет», «Клуб РАЙПО», «КООП-народные промыслы», «Цифровая кооперация» ды лият.

Саранскоень кооперативной институтось содавтынзе инжетнень региононь экономиканть туртов эрявикс специальносттнень коряс анокстамонть туртов бакалавриатонь, магистратурань ды аспирантурань программатнень марто. «Единение» студентэнь педагогической отрядонь боецтнэ ёвтнесть эсь отрядонть виевгавтомадо. 2022 иень невтевкстнэнь коряс «Единение» СПО-сь кармась Мордовия Республикань студентэнь сехте вадря отрядокс.

«Покш сюкпря весенень, кить минек масторсо ванстызь потребительской кооперациянть, – тешкстась Артём Здунов форумонь пленарной промкссонть. – Шабра регионтнэсэ потребкооперациясь важоди, ули чарькодема, Мордовиясо важодемась зярс а сатышка. Учан невтевкст минек Минсельхозонть ды Минэкономиканть пельде. Ламот регионтнэ тусть васов икелев, нолдыть тевс од оборудования, технологической од ёнкст. Те некеть жо автолавкатне, тосо улить банконь блок-модульть, невтемакс, Сберэсь эрязасто прими участия, сон минек стратегической партнёр. XXI-це пингестэнть минек улить велеть, косо питнейстэ сти лавкань кирдемась, ансяк ломантне тосо эрить. Тесэ сехте вадря лисемань кись – пачтямс тов товарт, ды аволь ансяк велень хозяйствань продукция. Секскак минь а явтано велень хозяйствань кооперациянть ды потребкооперациянть. Эрявиксэсь – производительтнень вейсэндявомась, вадрячинть кастомась, вейсэнь рамамотне. Минек истят хозяйстватнеде ламо, кой-конатне пек покшт. Те ломантненень сехте малавикс ёнкс, конанень карматано лездамо».

«Течи максынек ушодкс Мордовиясо кооперациянь вельмевтемантень, – мерсь Дмитрий Зубов. – Те вейсэнь покш важодемань ушодкс, кооператортнэнень покш лезкс. Сынь неизь, сыненст мереви важодемс, получамс вадря ярмакт, миненек мереви теемс вадря продукция. Ды течинь форумсонть невтьсынек, мезе миненек тееви вейсэ. Минь а ёвтатано вейке ёнкс весе регионтнэнь туртов. Эрьва субъектсэнть эрявить лездамонь башка ёнкст. Вадряль бу, иень ютазь кортамс Мордовиянь кооперациянь изнявкстнэде, штобу лисевельть од лидерт, од кооперативть, ды штобу уш тыненк сакшновольть тонавтнеме лия регионтнэстэ».

«Ней минек масторось печти аволь шожда шка, АПК-нь важодеманть редявиксстэ стакалгавтызь кемекстазь санкциятне, – тешкстызе Юлия Оглоблина. – Вейке ёндо – кассть питнетне велень хозяйствань техниканть, витнемапельтнень, тикшетнень ванстоманть туртов средстватнень, видьметнень лангс. Лия ёндо – валгсь питнесь велень хозяйствань продукциянть лангс, седе пек сюронть лангс, меельце кавто ковтнестэ кармась пек валгомо питнесь ловсонть лангс. Истямо стака шкасто эряви вейсэндявомс, важодемс вейсэ, эдь течинь форумонь темантень максови покш смусть. Артём Алексеевич васенце чистэнть саезь яви покш мель велетнень виевгавтомантень, велень эрицятненень важодема таркатнень максомантень, истя жо кооперациянь виевгавтомантень. Россиянь велень од ломантне ёвтакшность мель кооперациянь школанть коряс – сон сеске минек кирдимизь: тонавтынек ломантнень, панжинек велень хозяйствань колмо кооперативть ды те ансяк ушодкс. Мордовиясо Артём Алексеевичень лезксэнзэ вельде теевить агрокласст. Те системантень карматано совавтомо кооперациянь коряс ёнкст, эйкакштне вишка шкасто саезь вейсэндявольть, чарькодевельть, кооперациянь кодат лувт улить, содавольть, мезекс те эряви. Кооперациявтомо стака важодемс велетнень ванстоманть ды виевгавтоманть коряс».

«Республикань кооперациянть туртов течи редявикс тев – максозь ушодкс виевгавтоманть туртов, кедьстэнек кевкстить невтевкстнэде, ды мон кеман, карми возможностенек невтемс тень, – тешкстызе Мордовиянь вице-премьерэсь Раиса Цыбизова. – Неень шкань экономикань условиятнесэ велень хозяйствань товаронь вишка производительтненень карми пек стака важодемс кооперациявтомо. Секскак  кооперативной вейсэндявкстнэнь лувсо мереви аволь ансяк киртямс эрьва хозяйствань ютавтовкстнэнь, истя жо седе лезэвстэ важодемс логистиканть марто, добовамс седе покш питне продукциянь миеманть лангс, прявтось – теемс товаронть доходонь кандыцякс. Те кастсы минек аграрийтнень питнест, истя жо потребительской кооперациянть марто вейсэ теи продуктанть седе рамавицякс минек эрицятнень туртов. Эдь кооперациянть тевесь – аволь ансяк виевгавтомс производстванть, истя жо вадрялгавтомс велень ломантнень эрямост, теемс вадря продуктанть рамавицякс минек масторонь, республикань эрьва ёнкссонть».

Промкссонть тешкстазь вейсэнь важодемадо вейсладямот РФ-нь Потребителень обществатнень центральной союзонть ды Мордовия Республиканть ютксо, РФ-нь Центросоюзонть, Россиянь велень од ломантнень вейсэндявксонть ды Россиянь кооперациянь университетэнть ютксо.

Мордовиясо важодемань группась ушодызе эсь важодеманть кооперациянь прявт лувтнень коряс, конатнень мереви нолдамс тевс республикасонть.

Мероприятиянть лувсо истя жо казевсть потребкооперациянь системань ветерантнэ, предпринимательтне ды СВО-нь участниктнень семиятне.

Юлия Еремина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».