Понедельник, августа 03, 2020
Важное

Государствань уголовной политикань прявт ёнкстнэстэ вейкекс ашти аволь алкуксонь ярмактнень тееманть марто бороцямось. Те ёнкссонть закононь коламотне кандовить стака экономической преступлениятненень, конат кандыть зыян государствантень ды валгстыть масторонь экономиканть.Аволь умок тенень МР-ва МВД-сэ алтавсь брифинг «Борьба с фальшивомонетничеством в Республике Мордовия» теманть коряс.

Талновтыця кевкстематнень лангс каршо вал макссь Мордовия Республикава МВД-нь Экономической преступлениятнень ды коррупциянть каршо бороцямонь коряс Управлениянь отделэнь прявтось, полициянь подполковникесь Борис Адушев. Эсь ловныцятненень минь анокстынек Борис Павлович марто интервью, эдь аволь алкуксонь ярмаконь теемань кевкстемась пшти ды талновтыця.

 – Борис Павлович, кода сеедьстэ аволь алкуксонь ярмактнень тевс нолдамонть коряс закононь коламотне тешкставить минек регионсонть?

– Истят закононь коламотне минек ведомстванть туртов аштить прявттнэнь ютксо. Свалшкань роботанть коряс, конань ютавтыть МР-ва МВД-нь экономической безопасностенть ды коррупциянть каршо бороцямонь коряс подразделениянь важодицятне, улить а берянь невтемат аволь алкуксонь ярмаконь теемань тевтнень кардамосо. 2019 иестэнть тешкстазь 67 тевть аволь алкуксонь ярмактнень тевс нолдамосо, истя уголовной 5 тевть максозь судс, теке марто вейке тев ламо ломантнень (группа) коряс. Кундазь зярыя башка ломанть ды истя жо группа, конат аволь алкуксонь ярмактнень нолдасть минек регионсо. 2020 иестэнть тешкстави аволь алкуксонь ярмактнень (ПДК) сеедьстэ тевс нолдамось, тень тейсть Армениянь эрицятне, конат кундазельть.

– Ёвтнеде седе домкасто неть ломантнень кундамонь коряс ютавтозь мероприятиятнеде?

– 2020 иень даволковонь 25-це чистэ МР-ва МВД-нь экономической безопасностенть ды коррупциянть каршо бороцямонь коряс Управлениянь сотрудниктнень ды МР-ва МВД-нь СЧ СУ-нь важодицятнень вийсэ аволь алкуксонь ярмаконь кирдемань ды тевс нолдамонь коряс Московонь ды Ростовонь ёнкстнэсэ кундавсть Армениянь 1990 ды 1988 иетнестэ чачозетне. Оперативниктнень вийсэ пурназь материалтнэнь коряс кемекстазь, 2020 иень даволковонь 17-це чистэ неть ломантне састь минек республикав ПДК-нь тевс нолдамонь коряс — зярыя таркасто рамасть иредстиця симемапельть, таргамопельть ды ярсамопельть. Теке шкасто вейке рамавксонть питнезэ ульнесь 400 целковойде аволь седе ламо. Неть факттнэнь лувсо панжозь уголовной тевть РФ-нь УК-нь 1-це пельксэнь 186 статьянть коряс (аволь алкуксонь ярмактнень эли питней конёвтнень теемась, кирдемась ды тевс нолдамось). Ёвтазь ломантне кундазь ды пекстазь. Те статьянть коряс олячись саеви 5 иестэ саезь 8 иес. 

– Борис Павлович, кодат стакачить улить аволь алкуксонь ярмаконь теицятнень кундамосо?

– Закононь истят коламотнень панжомась ды ваномась кандови стакатнень юткс сень коряс, што тень, кода сеетьстэ эрси, теить салава роботыця преступникень группатне, тевесь ветяви зярыя регионга, вейке региононь территориясо жо истят ярмактне тевс нолдавить аволь кувать (1-2 чить).

– Закононь коламонь прявт ёнкстнэ?

– Аволь алкуксонь ярмаконь тевс нолдамонь ёнкстнэде тешкставить кавто. Васняяк – те апак арсень тевс нолдамось, зярдо ломанесь а соды, што панды аволь алкуксонь ярмаксо, конась тензэ понгсь зарплатанть марто эли жо полавтозель лия регионтнэсэ (седе сеедьстэ те Московось ды Московонь областесь). Панжомс истямо преступлениянть пек стака, сень коряс, што регионтнэ лият ды истя жо шкань ютамонть коряскак. Истят закононь коламотнеде седе ламо регионсонть весе тешкстазетнень коряс. Омбоце ёнксось – аволь алкуксонь ярмаконть тевс нолдыть сеть ломантне, конат редизь «фальшивканть», ансяк ярмактнень ёмавтомга бажить пандомс эйсэнзэ микшнема таркатнесэ ды а чарькодить ответственностенть истямо тевенть кисэ. Истят ломантне РФ-нь УК-нь 186 статьянть коряс истя жо лововить закононь колыцякс. Эштё вейке категориясь – те зярдо аволь алкуксонь ярмактнень тевс нолдыть весементь арсезь. Те сеть, кие регионсонть эри 1-2 чить. Истят преступлениятнень панжомась аволь покш. Ломантне, конат тевс нолдыть ПДК-нть, седе сеедьстэ эрсить Азиянь мастортнэстэ, Кавказонь регионтнэстэ, цыгантнэ ды сеть, кие уш аштесь кодамояк преступлениянь кис. Регионсто регионс ардомсто тевс нолдыть арендас саезь транспорт, такси, а невтить эсь алкуксонь чачонть (оршнить парикть, сельмукшт, нолдыть сакалот) ды теньсэ стакалгавтыть преступлениянть панжоманзо.

– Кодат ярмактне седе сеедьстэ эрсить аволь алкуксонь?

– Уликс тевтнень ваномась невти, кода икелеяк закононь колыцятнень вановт ало  5000 ды 1000 целковоень покшолмасо ярмактне. Ютазь иестэ истя жо редязель 2000 целковойтнень теемась. Теемань вадрячись пек паро. Ялатеке, внутренней тевень органтнэнь важодеманть лувсо, аволь алкуксонь ярмактне редявить ды максовить экспертизас.

– Косо седе сеедьстэ нолдавить неть ярмактне?

– Седе сеедьстэ истямо ярмаксо пандыть рынкатнесэ, сотовой связень салонтнэсэ, микшнемань павильонтнэсэ ды АЗС-сэ, косо арасть видеокамерат, алкуксчинь ванома аппаратт. Аволь алкуксонь ярмаконь редямонь 30 ламо тевть тешкстазь банконь учреждениятнесэ. Аволь алкуксонь ярмаконть тевс нолдамга рамавить вейкине товарт – налкшке, альбом, журнал, паця, дёшова парфюмерной продукция, ярсамопельть (лимонад, минералка, кши ды седе тов), аволь питней лецямопельть.Тень коряс профилактической робота правоохранительной органтнэ ютавтыть аволь ансяк индивидуальной предпринимательтнень марто, истя жо микшнемань покш сеттнесэ важодицятнень мартояк. Сыненст ёвтневить аволь алкуксонь ярмактнень явовтыця ёнкстнэ ды кода улема сынст редямсто. 

– Борис Павлович, кода ветяма эсь прянть ломанентень аволь алкуксонь ярмаконть редямсто?

– Сеедьстэ ломанесь, кинень понгсь фальшивкась, бажи тевс нолдамс сонзэ рынкасо, магазинасо эли киосксо. Аволь алкуксонь ярмаконть редямсто кодаяк а мереви тень теемс. Бути ломанесь те шкастонть понги, те тевесь карми вановомо, кода аволь алкуксонь ярмаконь тевс нолдамось, мезенть кисэ РФ-нь Уголовной Кодекссэнть ули уголовной ответственность. Бути ломаненть улить талномат ярмаконь алкуксчинть коряс, эли жо ули пачтямо закононь колыцятнень коряс, конат бажить тевс нолдамс фальшивканть, мереви пшкадемс МР-ва МВД-нь дежурной частень телефононть коряс: 8(8342) 47-77-71.

– Борис Павлович, кодат профилактической мероприятият ютавтовить тень коряс?

– Свалшкане регионсонть ютавтовить оперативно-профилактической меропритият аволь алкуксонь ярмактнень теемань, кирдемань ды тевс нолдамонь лоткавтоманть коряс, конатнень юрсо ютазь иестэнть важодсть Мордовия Республикава МВД-нь ОВД-нь тёжадо ламо сотрудникть. Неть мероприятиятнень юрсо ютавтозь инструктажт ды явшевсть памяткат, конатнесэ невтевить 500, 1000 ды 5000 покшолмасо целковойтнень аволь алкуксчинь тешкстнэ. Профилактикань мероприятиятнень ютавтома шкастонть республикань микшнемань объекттнэс рамазь ярмаконь алкуксчинь невтемань приборт, ладявсть ваномань камерат, панжовсть примавиця ярмактнень тешкстамонь тетрадть. Теде башка, микшнема центратнесэ ды рынкатнесэ, кода микшницятненень, истя рамсицятнененьгак ёвтневсь аволь алкуксонь ярмактнень явовтыця тешкстнэде.Ванодо, илянк максо прянк манямс ды илядо манче тынськак! Свал кирдеде мельсэ, аволь алкуксонь ярмаконть тевс нолдамонть кисэ ули уголовной ответственность ды сави кирдемс вал.

Анокстызе Юлия Еремина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».