«Мир, подаренный тобой. Посвящается матери» – истямо лем ало выставка неть читнестэ панжовсь С.Д. Эрьзя лемсэ республикань изобразительной искусствань музейсэнть. Сон алтави Мордовиянь народной артыцянть Анатолий Барговонь 65 иетненень.

Панжи экспозициянть Нина Ивановна Барговань портретэсь, кона сёрмадозь покш вечкема марто. Превей, виев, виде ды, теке шкасто, чарькодиця ды вечкиця – сон васенцесь, кие редизе эштё овсе вишка Толянь ёрокчинзэ ды баславизе шкинемань кинть лангс. Сон вечкилизе искусстванть, ульнесь цёранзо весе невтематнесэ, ды аштесь каштанчисэ сонзэ изнямотнень кувалма. Нина Ивановна эрямостонть тусь те иестэнть.

«Зярдо монень ульнесть 15 иеть, авам кучимим тонавтнеме Ицялонь художественной училищав, мейле – Чебоксаронь институтов. Сюкпря сонензэ, карминь народной артыцякс», – ёвтни Анатолий Баргов.
Выставкань экспозициянтень совасть содавикс роботатне, конат сёрмадозь Анатолий Барговонь шкинемань весе шканть перть. Ансяк седе покш пельксэсь сынст эйстэ артозь меельце колмо иетнень перть.

Ды, эряви меремс, Нина Ивановна неинзе сынст малав весе.
Артыцянть ламот важодевкстнэ панжить эрзянь ды мокшонь раськетнень койтнень-кирдатнень, культурань мазычитнень. Сынь пештязь тиринь ёнксонтень вечкемадо. Истя жо невтевить артовкст, конат алтазь Крыментень, Северной Кавказонтень ды Черногориянтень.
Невтемасонть одокс кармасть этюдтнэ – а покшке роботат, конат сёрмадозь пленэрсэ эли жо мастерскойсэ. Сынст эйстэ юты а пачтявикс лембечи ды сэтьмечи. Весементь жо эряви неемс эсь сельмсэ.
Выставкась карми важодеме сундерьковонь 2-це чинть самс.

Юлия Еремина