Четверг, июля 09, 2020
Важное


Коммунальной сферанть марто эрямонок сюлмавозь пек кеместэ. Ансяк вана эрицятненень мекс-бути аволь свал неяви коммунальщиктнень важодемаст.
Зярдо куротне, ютамо таркатне ды киланготне урядазь, эрямо кудотнень подъездтнэ шлязь-нардазь, весе ошось ваясь цецянь мазычис – тень кияк а реди. Бути жо ловось аламодо валинзе китнень эли тия-тува апак уряда шукшось – сёвномань-сюдомань валт ёвты малав эрьвась.

Течи эсь ловныцятненень минь ёвтнетяно жилищно-коммунальной отраслянь сеть важодицятнеде, кить аволь ансяк вадрялгавтыть эрямонок, сынь эсь тевсэст кастыть мельёжонть ды кемекстыть ёвтамонть: коммунальщиктнень ютксояк улить ёроков, эсь тевенть вадрясто теиця профессионалт. Истятнэ важодить «Домоуправление № 41» ООО-сонть. Сынст вановт ало малав 60 ламо этажсо кудот Химмашсо ды ТЭЦ-сэ. Сынст перька ваньксчинть ды эйсэст тапавкстнэнь мельга ваныть домоуправлениянь малав сядо важодицят: слесарть, мастерт, дворникть, шлицят-нардыцят, бухгалтерт ды седе тов.


ДВОРНИКЕКС улемс а визькс
Эрьва ломанесь чарькоди, кудотнень перька ловонть ды шукшонть урядамс киненьгак эряви. Тевесь те покш ды эрявикс. Лиси жо истя: дворникень профессиясь эрявикс, ансяк вана овсе аволь престижной.
Валентина Васильевна Журавлёва Саранск ошонь 41-це домоуправлениясонть важоди дворникекс вана уш 27 иеть. Те профессиянтень самодо икеле ламо иень перть важодсь Саранскоень точной приборонь заводсонть. Ды, эряви меремс, тень весементь топавтсь ве шкасто.

– Ташто Шайговань райононь Новая Фёдоровка велень школанть прядомадо мейле зярыя шкань ютазь лисинь мирденень ды сынек эрямо Саранскоев. Молинь роботамо «Завод точных приборов» предприятияв. Ульнесь те уш умок, 33 иеде икеле. Заводсо важодемань кинть ушодыя складсо, мейле ламо иень перть ульнинь 1-це категориянь контролёрокс, – ёвтни Валентина Васильевна. – Эрямосонть эдь эрьва мезе эрси. Ульнесть стакачить ды заводсо роботамонь теке шкастонть молинь домоуправленияс дворникекс. Ды истя комсьветее иетнень перть ве роботасто омбоцев чийнинь.

Валске марто ниле частнэяк а топодить, Валентина Журавлёва уш роботасо, ванськавты-уряды сонензэ кандовиця кудотнень перька таркатнень, шли-тенси подъездтнэнь. Кавксо частнэнь топодемс сонзэ весе тевензэ уш анокт ды седе куроксто капши лия роботас – заводов. Истямо лувсо авась роботась комсьветее иень перть, кавто иеде икеле заводсто тусь ды ней весе шканзо максы дворникень тевентень.

– Дворникекс роботамо молеме кияк а капши, секскак ломантнеде а сатыть ды савкшны урядамс кавто-колмо кудотнень перька территориянть. Лиясто кияк ормалгады, сонзэ участкантькак макссызь. Теке марто топавтан подъездэнь шлицянь-урядыцянь тевентькак. Нама, стака роботадонть минек тевсэнть ламо. Ды сехте а вечкевикс шкась, монь койсэ, телесь. Ловдонть лиясто эрси истя ламо, кода валске пиже пелеветь лисят, чинь-чоп сонзэ урядат. Сатныть тевтне лия шкатнестэяк. Дворникенть роботазо а прялевкшни кизэнек-теленек. Тунда, ловонть соламодо мейле, пурнатано шукшонть, урядатано кудо бокатнень, керсетяно куракштнень ды чувтотнень. Кизэнть перть вансттано кудотнень перька теезь мазычинть. Сёксня эрьва дворникенть прябезарьксэкс аштить лопатне. Ве таркасто урядасыть, лияв туеме а кенерят, прасть уш лият. Ды истя чиде-чис, свал тевсат, свал эрявиксат. Теке марто улить минек тевсэнть вадря ёнксткак – тон свал ломань ютксат, – корты Валентина Васильевна.

Теке марто авась тешкстызе, дворникекс улемс а визькс. Эдь те тевесь эрямосонть пек эрявикс. Эрьва дворникесь теи покш тев – вадрялгавты ломантнень эрямост.
 Юлия Еремина
Фотось Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».