Эрзянь ды мокшонь национальной драматической театрасо панжовсь Театрань иесь. Тедеде лия театратнень ютксто сынь васенцекс панжизь кенкшест ваныцятнень туртов. Артисттнэ анокстасть невтемс «Масторава» спектаклянть. Сонзэ путызе Московонь режиссёрось Анна-Ксения Вишневская. Авась ламо важодсь финнэнь-угрань регионтнэсэ, косо путнесь мифологиянь коряс мельстуиця спектаклят.

Кода пачтясь театрань прявтось С. И. Дорогайкина, «Мастораванть» сынь бажасть теемс туристтнэнь туртов вишка залсо невтемакс. Ушодсть тееме декорацият ды редизь, а кельгить. Путовксось лиссь мазый, покш, мекс а невтемс покш сцена лангсо?

– Спектаклянть теинек лия ёнов а молицякс. Васняяк, те артисттнэ ды ваныцятне аштить вейсэ сцена лангсо, карадо-каршо. Чуди ведь, пиземе моли… Артисттнэ сынсь морыть, налксить музыкальной седямопельсэ. Кортыть эрзякс ды мокшокс, кортамост сеске ютавтови рузонь кельс. Ошонь инжетнень туртов уш невтнинек эрзянь ды мокшонь свадьбанть, тейнинек Од иенень Якшаматянь резиденция. Ломантне мельспаросо тень вастызь, – ёвтни Светлана Ивановна.

Павел Михайлов актёрось налксесь Виряванть. Эрявсь сэрей ломань. Кой-кодамо кедьёнкстнэнь лангс стязь, сон кармась седеяк сэрей. Чамазо кекшезь маскасо. Ды сеске а содавияк, кие те, цёра эли ава. Вирявась лиссь алкуксонь. Юты вакскат ды соракадат.

«Масторава» путовксось лиссь аволь покш, моли малав часонь перть. Тесэ ваныцятне содавтовить, кода теевсь эрзятнень ды мокшотнень модамасторось, кодат пазт ульнесть, кода тенст кемсть ды вешсть паро эрямо. Кемтяно, сон туи мельс весе инжетненень, кить понгить Мордовияв ды сыть ваномо те спектаклянть.

Татьяна Маторкина