Воскресенье, мая 26, 2024
Важное

 

«Ардатовский светотехнический завод» АО-сь республикань сехте умонь предприятиятнестэ вейкесь.

Теке марто сон прявт предприятиятнень ютксо, конат важодить светотехникань ёнкссонть. Течи заводонь продукциясь содавикс аволь ансяк минек республикасо, истя жо Россиянь регионтнэсэ ды томбалень зярыя мастортнэсэ. Неень шкане тосо теевить эрьва кодамо модификациянь 4000 ламо валдомтыця приборт, конат тевс нолдавить Россиянь ды Мордовиянь спорткомплекстнэнь, школатнень, эйдень кужотнень, промышленной ды муниципальной объекттнэнь валдомтомасо, башка мель явови взрывозащищённой прибортнэнь нолдамонтень. Теке марто предприятиясонть ладязь продукциянь нолдамонь весе циклась. Кода тешкстызе «Ардатовский светотехнический завод» АО-нь экономикань коряс прявтось Владимир Александрович Голубев, весе продукциянть лангс улить Россиясо теевть сертификатт ды валдомтыця прибортнэнь седе покш пельксэсь совавтозь Россиянь Минпромторгонь реестрантень. Те весемесь корты седе: продукциясь тееви Россиясо эсенек номенклатуранть тевс нолдазь.

Меельце шкасто вадрясто редяви валдомтомань од, инновационной прибортнэс ютамось. Васняяк те светодиодтнэ. Истя, Орданьбуень светотехнической заводонь миемань покшолматнестэ 70 % седе покш пельксэсь – светодиод марто светильниктне. Ды иестэ иес неть невтематне касыть.
– Нама, минек важодемасояк те ламонть полавты, – корты Владимир Голубев. – Эдь бути икеле минь пурнынек светотехнической арматуранть, лиякс меремс, кшнинтень максылинек форма, артылинек, валдомтомань прибортнэнь ладилинек, ды светильникесь анок. Ней жо тееви ламо ёнкс марто электронной прибор. Ды тень туртов миненек эрявсь ветямс домка важодема. Васняяк, одс тонавтома ютась инженерно-технической персоналось. Од квалификациянть ды содамочитнень максомга, тонавтовсть лия важодицятнеяк. Ды ней эрьва ие минек малав весе цехтнень важодицятне ютыть тонавтома, кастыть эсь квалификациянть. Неень шкане ве таркасо а эряви аштемс, эряви тонавтнемс, келейгавтомс эсь содамочитнень, кастомс нолдавиця продукциянть вадрячинзэ.


Ды те алкукс истя. «АСТЗ» АО-сь виевгады иеде иес. Тесэ покш мель явови инвестиционной проекттнэнь тевс нолдамонтень.
– Неень шкане «СТЗ» компаниятнень группасонть кавто производственной площадкат. Прявтось – «Ардатовский светотехнический завод» АО-сь ды омбоцесь – «Завод Световых Приборов» ООО-сь. Инвестициятне совавтовить кавонест площадкатнень виевгавтомантень, – тешксты Владимир Александрович. – Ютазь иестэ неть производстватнень кастоманть лангс явозельть малав 40 миллионт целковойть. Икеле иестэ инвестициятнень покшолмась ульнесь малав 400 миллионт целковойть. Тедедень васенце кварталсто ютавтозь уш 22 миллионт целковойть. Весе неть ярмактне тусть производстванть виевгавтоманть, теке марто валдомтомань од прибортнэнь тееманть лангс. Меельцесь, мезе нолдазель, – дизайнерской валдомтомань прибортнэ.

Нама, од продукциянь нолдамонть туртов рамазель неень шкань вадря оборудования. Штобу кирдемс неень шкань вешематнень ды теемс светильникть рамицятнень мелест коряс – куш кодамо формань, тюсонь.

Ютазь иенть коряс продукциянь миемань покшолматнень касомась ульнесь 22 %, тедеде уш васень зярыя ковтнень перть – 27 %.
Эряви меремс, предприятиясонть аволь ансяк важодить течинь полавтоматнень марто ве лувсо, истя жо кирдить прявт ды эрявикс ёнкстнэнь. Васенце таркасо ашти важодицятненень вадря условиятнень теемась. Заводонь малав весе цехтнесэ ды отделтнэсэ важодемань-оймсема таркатне витнезь-вадрялгавтозь. Нама, васенцекс полавтозель промышленной валдомтомась, прибортнэнь пурныцятнень ды лия важодицятнень туртов рамазельть неень шкань вадря инструментт ды оборудования. Теезь ярсамонь, оймсемань ды шлямонь туртов таркат.

Теде башка, предприятиясонть вадря социальной пакетэсь. Весе важодицятненень мереви якамс бассейнав, конась панжозель Орданьбуесэ. Заводось панды ярмакт эсь важодицятнень кисэ ды, кинь ули мелезэ, тов якить. Од иенень весе важодицятненень ды сынст эйкакштненень максневить ламбамо казнеть. Истя жо ве ёно эриця важодицятнень питневтеме усксить важодема таркав ды кудов.
Пек сюпав тесэ общественной эрямоськак. Предприятиянь важодицятненень максневить путёвкат санаториятнес, ардтнить концертэв, паломничествав иневанькс таркатнева.
Покш мель явови спортонтень. Ютавтовить кизэнь ды телень спартакиадат. Заводонть улить эсензэ футбольной ды хоккейной команданзо. Роботыцятне налксить волейболсо, тенниссэ, шахматсо. Эсь ёрокчинть невтнить кода райононь, истя республикань пелькстамотнесэ. Предприятиясь ашти кураторокс Орданьбуень Епархиянть теевть иневанькс воинэнть Феодор Ушаков лемсэ спортивной клубонть лангсо. Заводось Клубонтень рамизе весе эрявикс инвентаренть, оршамотнень, лезды пелькстамотнес ардомасонть.

– Спортонь клубонтень якицятнеде седе ламотне – кажовсто эриця семиятнень эйкакштне. Сыненст, минденек башка, кияк а лезды. Секскак те лезксэсь пек эрявикс, – тешкстызе Владимир Голубев.
«Ардатовский светотехнический завод» акционерной обществасонть сехте покш питне путыть важодиця ломанентень, а сындест течи тосо котосядто ламо. Кода корты «АСТЗ»-нь экономикань коряс прявтось В.А. Голубев, кода икелеяк, истя нейгак, неень шкань кодамо оборудования илязо уле, кодат инновациянь од технологият тевс авольть нолдаво, тевест парсте содыця специалисттэме изнявкстнэ а саевить.
– Важодицятнень асатноманть коряс улить мелявкст. Предприятиянтень эрявить оборудованиянь ладсицят, ОТК-нь контролёрт, электрогазосварщикть, фрезеровщикть, токарть, слесарть-ремонтникть, слесарть-инструментальщикть, инженерт-электронщикть, инженерт-проектировщикть, инженерт-технологт, программистт. Зарплататне а берянть, – корты Владимир Голубев. – Тевень содыця специалистт эрявить. Минь анокт важодемс школатнень ды тонавтнемань лия заведениятнень марто. Аноктано пандомс вузсо эйкакштнень тонавтнеманть эли максомс стипендия. Ансяк истя мартонок важодемс анокт зярс аламот. Истя жо ней ветяви кортамо профессионалитетэнь программасонть улемадонть. Те, зярдо ладяви вейсэнь важодема вузтнэнь ды предприятиятнень ютксо. Арсеви, те миненек лезды изнямс кадратнень коряс мелявксонть.
Нама, вадря специалисттнэнь асатномась неень шкане ули ламот сфератнесэ. Ламонь манить покш оштне. Ансяк улить истяткак, кить варчизь Московонь целковоенть питнензэ ды велявтсть мекев тиринь ёнксов, эсь предприятияв.

Истятнэнь ютксо «АСТЗ» АО-нь холодноштамповочной оборудованиянь 6-це разрядонь наладчикесь Олег Сергеевич Прахов. Школадо мейле цёрась прядызе Саранскоень промышленно-экономической колледженть ды велявтсь тиринь Тургенева велев. Кармась роботамо светотехнической заводсо. Васня саизь анок продукциянь складов комплектовщикекс, зярсыя роботась ды ютась заготовительной производствань цехс. Важодсь зярыя иеть ды тусь Московов. Арсесь варчамс эсь прянзо тосо. Вийтне сатотсть а куватьс – роботась ие пель марто ды велявтсь мекев эсь заводов. Корты, ярмаконь коряс зарплататне пек а явовить, а ней свал кудосо.


Московсо эсь вийтнень истя жо варчнинзе электрооборудованиянь витнемань ды обслуживаниянь коряс электромонтёрось Василий Николаевич Казаков. Эрзянь цёрась (чачсь-кассь Пиксяси велесэ) тиринь предприятияв одс велявтсь недлядо икеле, семс кемень иеть роботась Московсо.
– Мон светотехнической заводсо роботынь кемнилее иеть, мейле туинь Московов. Ламот ардыть, монгак варчия, – корты Василий Николаевич. – Ды ардтнинь тов кемень иень перть. Ульнинь седе од, вийтне сатность. Меельце шкастонть кармась марявомо стака, мелеськак мольсь ардтнемадонть, покш ошонь шалттонть ды велявтынь мекев «АСТЗ» АО-в. Секс мерян од ломантненень: илядо капша оргодеме покш ошов, варчинк эсь вийтнень теске. Минек заводсонть ней ули весемесь – вадря зарплатат, важодемань условият, профессиясо касома.

Юлия ЕРЕМИНА
Фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».