Четверг, апреля 18, 2024
Важное

 

Эрзянь Сурвелесь Кочкуровань районсо сехте покштнестэ, ней тосо эрить малав 800 ломанть. Кизна те цифрась седеяк покшолгали.

Ошонь эрицятнень ды тесэ чачозтнень туртов, конатне сакшныть сынсь ды усксить мартост эйкакшост-нуцькаст, велесь оймсеманть туртов вечкевикс тарка. Секскак кизна велень фельдшерэнть, медицинань пунктонь прявтонть Валентина Фёдоровна Ромашкинань тевензэ седеяк ламолгадыть. Покштятнень-сырькайтнень пиретнесэ важодемадонть сыргить «хондрозтнэ», пси читнестэ кепеди давлениясь, эйкакштне сеедьстэ томбасызь-керясызь пильгест-кедест… Лиясто 10–15 пиштякат сакшныть, диспансеризациянь ютамо шкасто седеяк ламо. Весень васты-леци велень медичкась од ФАП-сонть, конась панжозель «Здравоохранение» нацпроектэнть лувсо 2020 иестэ веленть куншкакуросо. Мезе парось, Сурвелесэ весе инфраструктурась пурназь ве таркасо, эрицятненень те пек тукшны мельс. Ве ульцясонть аштить клубось, школась, лавкатне, почтась.
Медпунктось пек эрявкшнось, таштось уш пельс каладокшнось. Зярдо-бути велесэнть ульнесь участковой больницяяк, ансяк сондензэ ней кадовсть ледстнемат. Сестэ сэредицятнень туртов тосо панжозельть 25 койкат, роботасть зярыя врачт. Те больницянтень саськак роботамо фельдшерэкс Ромашкина 33 иеде теде икеле Саранскоень медучилищанть прядомадо мейле. Валентина Фёдоровна эсест, Сурвелень, сон мельспаросо кундась вечкевикс тевезэнзэ. Тешкстама, лангозонзо ванозь, сонзэ киява тусть патянзо тейтерезэ (сон ней Перинатальной центрань реанимациянь прявт медсестра) ды сонсензэ тейтерезэ, кона прядсь Медицинской институт ды ней роботы фармацевтэкс.


Ромашкина тешксты, медпунктось аволь ансяк сонсь од, тесэ ули весе эрявикс ды неень шкань оборудования, конанть лангс ошонь поликлиникатнесэ важодицятненьгак сявадыть сельмест. ФАП-сонть колмо нупальть. Васенцесэнть молияк сыцятнень вастомась-ванкшномась. Валентина Фёдоровна ёвтни, сонензэ самга прянть мереви сёрмадстомс «Медпойнт» платформанть коряс Кочкуровань поликлиниканть вельде, ансяк истят тевть чуросто эрсить. Од технологиятнень сэредицятне вечкить ансяк медосмотрань теемстэ. Медпунктсонть ули сэрень онкстамка, тевелявтнень ванкшноманть туртов спиротест, сельмепотмонь давлениянть содамга тонометра, кислородонь онкстамонть туртов пульсоксиметр, ЭКГ, дефибриллятор, пильгень-кедень синдемстэ шинат, кельмемстэ эждиця лангакс.
Валентина Фёдоровна сонсь вети гинекологической ванномат, теи эрявикс процедурат: уколт, капельницат, максы врачонь самодо икеле эряза (экстренной) лезкс. Медпунктось пештязь весе эрявикс надобиятнеде, конатне ванстовить специальной экшендиця камерасо. Сэредицятненень лексемс максови небулайзер, улить сахаронь ды холестеринэнь онкстамкат. ФАП-нь весе инструменттнэ ютыть паро стерилизация коське псисэ, тапариця материалтнэ ванськавтовить автоклавсо.

Сонсензэ фельдшерэнть туртовгак тесэ условиятне парт: тельня медпунктось уштневи, ули душевой кабина, туалет, оршамопелень кирдема шкафт.

Валентина Фёдоровнань кедьстэ туемстэ арсинек тензэ кеме шумбрачи, эдь сон велесэнть фельдшерэсь ськамонзо, ды седе аламо сэредицят, кадык весе сакшныть ансяк профилактической ванкшноматнень кисэ!

Марина Девятова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».