Среда, августа 05, 2020
Важное

 

Шумбрат, вишка ловныця! «Эрзянь правда» газетань нолдыцятне умок уш арсить панжомс од лопа ды алтамс сонзэ тонеть ды тонь ялгатненень. Эйсэнзэ меленек ули кортнемс мартот, содамс, мезес бажат, мезе вечкат, мезенть ловат парокс эли берянекс. Нурькинестэ, весе седе, мезесь эйсэть талновты, кармавты арсеме.

Ломанесь чачомстонзо саезь бажи седе ламо содамс, мезе моли сонзэ перька. Косто саеви чивалдось, мекс эрси чопода, косо эрить коткудавтне, кода лемезэ се-тона тикшенть? Истят кевкстемат, содан, тонгак макснить ды макснят седе покш ломантненень. Сынь, кода маштыть, толковить, путыть превс эйсэть, тонавтыть чарькодеме. Минекак васенце бажамонок – панжомс икелеть содамочинь масторонть. Ков седе ламо соды ломанесь, тов сон седе карми превеекс ды ёроковокс. 

Течи кортамонок карматано ветямо истямо кевкстеманть перька: «Мезе истямось пертьпельксэсь ды мекс эряви ванстомс сонзэ?»


Велькссэнек лембень максыця маней чипай; паксянть велькска ливтниця нимилявнеть, вирьсэ чоледиця нармунть; веть чопода менельсэ цитниця тештеть; лейтнесэ укшныця калнэть; ки соды зяро вайгельпень тарка таргавиця иневедть; тикше потсо эриця эрьва кодат унжинеть ды эсест пизэсэст свал котьмиця коткудавт… Весе те пертьпельксэсь. Сон – минек кудонок. 



Пертьпельксэнть  сюпавчизэ дивавтни ломантнень. Теке марто ломаненть туртов сонзэ питнезэ пек покш. Содазь, масторлангсо эрямонть туртов ломанентень эряви кошт, ведь, ярсамопель. Сынст максы тенек пертьпельксэсь. Теде башка, пертьпельксэсь вансты шумбрачинек. Кемекстыть шумбрачинть, мертяно, ушосо налксематне, лейсэ экшелямось, телень  вирьга сокссо яксематне. Секс эряви ванстомс пертьпельксэнть, а кандомс тензэ зыян. Лиякс, зыянс понги ломанеськак.

Кода тень теемс? Кода эряви ветямс прянть эстеть ды а кандомс зыян пертьпельксэнтень? Кодамо тонь путовксот пертьпельксэнь ванстома тевсэнть?

Иля тейне берянь тевть

Парынестэ ловнык «Озязт»  валморонть ды ёвтык, видестэ-аволь тейсть цёрынетне.

Озязт 

Эрясть-аштесть кавто озязт,

Чинь-чоп тевсэ котьмасть-озясть.

Левкстнэнь туртов сукскеть

                               кандтнесть,

Пизэнь варятнень сынь

                               «пандтнесть».

    

Тестэ, вант, кандыльть 

                               олгинеть,

Лия таркасто –  толгинеть,

Коське лопинеть, тикшинеть,

Цеця нетькст, пеште

                               лукшинеть.

 

Тунь эзть аштекшне тевтеме.

Весть сынь таго тусть ливтнеме…

Якасть малава се шкастонть

Кавто ялгат Петят-Пашкат.

 

Берянь мель вачкодсь превезэст:

Сайсть ологат сынь кедезэст,

Пейдезь-раксезь  пизэнть

                               правтызь,

Олгонь-олго сонзэ сравтызь.

 

Левкстнэнь ёртнизь куракш алга

Ды тусть кудов кавто ялгат…

Зярдо озязт мекев велявтсть,

Пизэнь вешнезь 

                пижнесть-мелявтсть.

 

Кувать ливтнесть, сёлмот тапасть,

Вешнесть левксэст сынь,

                               пиштякат,

Тей ёртовить, тов каявить…

Левксэнь вайгельть тенст 

                               марявить!

 

Кода нармушкатне кецясть!

Куракш потс сынь сеске эцесть.

Левксэст-тякаст тосто неизь,

Сёлмост алов кекшизь-теизь…

 

Вана мезе, эйкакшт, мерян:

Тапсемс пизэть  –  тевесь берянь.

Илядо уле истямокс,

Кавто ялгатнень кондямокс.  

 (Р.Щанкина)

Арсян, чарькодить: истямо ладсо прянь ветязь, пертьпельксэнтень кандтано ансяк зыян. Карми-арась пертьпельксэнтень берянь, пештень кочкамсто синдиндерян зярыя тарадт, сезиндерян зярыя цецинеть, кундындерян вейке-кавто нимилявнеть? Тень каршо мертяно истя: пертьпельксэнтень карми берянь! Теваразде синдезь эрьва тарадкесь, сезезь эрьва цецинесь, кундазь эрьва нимилявнесь – те вишка керявкс, конань тон тейсак пертьпельксэнтень. Ды бути вейке истямо керявкс теят тон, омбоценть – тонь ялгат, колмоценть, нилеценть, ветеценть – кияк лия, мезе карми пертьпельксэнть марто? Арсян, тонгак, вишка ловныця,  чарькодить ды зярдояк а теят истямо берянь тев. 

Мезес пачтить апак арсе тевтне

Ёвтнема седе, мезе лиссь сеськетнень ды псакатнень марто вейке усиясо (островсо).

Вейке васоло усиясо (островсо) ломантне арсесть куловтомс сеськетнень. Тень туртов сайсть  мор (ядохимикат). Сеськетне алкукскак ёмасть. Зярыя шкань ютазь усиясонть кармасть ламолгадомо крысатне. Сынь стадасо кайсевсть тосонь эрицятнень паксяст ды кардост, утомост лангс, пекест пештясть сень эйсэ, мезе понгонесь кист лангс. Ломантне кодаяк эзть чарькоде, косто састь зняро крысатне.

Лиссь жо вана мезе. Ядонь морось, конасонть куловтсть сеськетнень, понгсь тикшенть, цецятнень, лия касовкстнэнь лангс. Неть касовкстнэде ярсасть унжатне (сындест ламо ульнесть усиясонть, ды эрясть сынь аволь кудотнесэ – пертьпелькссэ). Унжатне эзть куло моронть эйстэ. Ансяк морось таштавсь сынст потсо. Унжатнень кундсесть ды сэвсть метьказтнэ. Моронть эйстэ сынь лавшомсть, секс эйсэст шождасто кундсесть псакатне. Эсь ёндо псакатне, конат ярсасть метьказдо, кармасть кулсеме. Курок сындест овсе эзть кадово усиясонть. Крысатнень кундсемс ульнесь а кинень. Истя сынь кармасть ламолгадомо ды апак пеле чийнеме усияванть. 

Курок те усиянтень савсь ускомс лия псакат. Истя изнявсть крысатне. Крысатне ломантненень кандсть покштояк покш зыян. Кие чумось? Сонсь ломанесь. Апак сода ды апак чарькоде кармась морямо сеськетнень. Ды вана мезес пачтизе.

Мезде майси

 Модамасторось?

Умонь шкасто саезь Моданть лангсо эриця ломантне ветить эрьва кодат тевть: стявтыть ошт, теить кить, сокить мода... Весе те эряви. Ансяк тень туртов савкшны керямс виртнень. Чувтотнень правтыть чочкокс – сынь эрявить ломантненень. Вана мекс иестэ иес Моданть лангсо кадовить яла седе аламо ды аламо вирть.

Покш заводтнэнь ды фабрикатнень эйстэ коштонтень понгонить качамо, пуль, лейтнес ды эрькетнес – зыянов ды рудазов ведь.  Истя  рудазкавтовить  коштось, ведесь, весе се, мезесь эряви касовкстнэнь, ракшатнень ды ломаненть туртов. Лиякс мерезь, тень кувалма майсить весе, кить эрить модамасторонть лангсо. Покш зыян канды, кода уш меринек, сонсь ломанеськак. Теваразде сезнить мазый касовкстнэнь, чавныть ракшатнень сынст понаст ды сывелест кисэ. Тень кувалма ламо касовкстнэ ды ракшатне ёмасть.

Ней масторлангонь весе ломантне чарькодсть, кодамо зыянс понгсь пертьпельксэсь. Секс седе покш мель кармасть явомо сонзэ ванстомантень. Заводтнэсэ ды фабрикатнесэ ней кармавтыть одс полавтомс оборудованиянть, кона а истя пек рудазкавты пертьпельксэнть. Керязь виртнень таркас озавтнить од вирть. А мереви сезнемс чуросто вастневиця касовкстнэнь ды леднемс чуросто вастневиця ракшатнень. Эрьва косо ней улить заповедникть – истят таркат, косо пштистэ ваныть пертьпельксэнть ванстоманзо мельга.

Берянь се, мекс аволь весень ули мелест ды бажамост ванстомс пертьпельксэнть. Секс тердтяно тынкак, вишка ловныцят, эрямс пертьпельксэнтень зыянонь апак кандо. Ансяк сестэ минек перька модась карми свал сюпав ды мазый. Лангсонзо кармить шольнеме ванькс лейть, ливтнеме нимилявт, морамо нармунть. Сестэ миненек а карми визькс сынст икеле эсенек кисэ.

Кода ванстсть пертьпельксэнть минек покштятне-бабатне?

Умоктояк умонь шкасто саезь, зярс эри минек раськесь, покштянок-бабанок пек ванстсть весе сень, мезесь сюлмавозь пертьпельксэнть марто. Пенге мельга вирев якильть ды чувтот керильть ансяк зняро, зяро эрявсть кудонь уштомс. Кудонь стявтомстояк чочкокс чувтот керильть сатомшка. Тень пингстэ сынь васня сюконильть вирень азоравантень – Вирявантень энялдома марто: илязо кежиявто лангозост чувтонь керямонть кисэ.

Седеяк пек ванстсть веденть. Ведесь – те эрямо. Сонтемензэ а кода. Ведте апак симе весемесь коськи. Кулыть ракшатне, нармунтне ды, чарькодеви, ломантнеяк. Секс седикелень ломантне ванстсть  веденть эйсэ, кода эсест эрямост. Лейсэ экшелямсто аволь тосо рудазкавтомс, пельсть натой сельгемс ведентень. Илязо нее Ведявась. Сон весементь несы. Ды бути мезеяк теят а истя, секень вант, савтсыть кежензэ. Ды сон зярдо-а зярдо ливтнесынзе эйстэть берянь тевтнень.

Весенень! Весенень! Весенень!

Пшкадема

Ули меленек пшкадемс истямо энялдома марто. Зярдо ловносынк, мезе течи сёрмадынек минек газетань од лопасонть, тееде, кие мезе машты. Кие вечки артомо, сень пельде учотано пертьпелькс марто артовкс. Кие, паряк, сёрмали валморот, ёвтнемат. Учотано пельденк эсенк сёрмадовксонк, конат алтазь пертьпельксэнтень. Минь сынст мейле печатасынек эсенек газетасо.

Анокстызе Раиса Щанкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».