Воскресенье, мая 26, 2024
Важное

 

Кода эрязасто юты шкась! Маряви, эштё исяк эйкакшолить, а течи вана теть уш кавксоньгеменде ламо иеть. Стака пингень печтямстояк а фатят, кода юты эрямось, парсте эрязь жо седеяк куроксто!


Войнань шкань эйкакшт. Те валрисьмесэнть весе ёвтазь, кодат стакачить несть се шкань эйкакштне. Ули мелем ёвтнемс эйстэдест вейкеденть – Покш Березникень райононь Шугурова велень эрицядонть Мария Сергеевна Мужиковадо (Кунаевадо).

Мария Сергеевна чачсь Шугурова велесэ ниле эйкакшонь триця семиясо. Ней бу меревельть – ламо эйкакшонь триця семиясо, конасонть сон колмоцель. Тетязо-авазо важодемань вечкицяльть. Кардаз потмост пешксель ракшадо, пирест – эмежде. Сергей Ефимович ды Анастасия Никифоровна важодсть колхозсо. Эрясть парсте.
Ансяк те весементь калавтызе войнась, конась ушодовсь 1941 иень кизна. Кода велень ламот цёратнень, Мария Сергеевнань тетянзояк саизь войнав. Авазо кадовсь ниле вишка эйкакш марто. Сехте покшонтень, Алексейнень, ульнесть вейксэ иеть, омбоцентень, Танянень – кото, Маньканень, истя кольневтезь мерильть тензэ тетязо ды авазо, аламодо эзть топодекшне колмо иеть. Меельцесь, Аня, чачсь 1941 иень войнань ушодовома чистэнть. Войнасо Сергей Ефимович стакасто ранявкшнось, контузявкшнось, тень кувалма сонензэ макссть эрямо тарка Московсто. Семиянзояк саиксэлизе эрямо тов. Ансяк Анастасия Никифоровнань мелезэ арасель туемс тиринь велестэ. Сергей Ефимовичнень жо ранявомадо мейле эрявсь свал ютнемс реабилитация, шумбрачинзэ витнеме ардтнемс санаторияв. Сон эрясь ормаменькс лангсо. Покш мелезэль самс тиринь велев, семиянзо ваксс, ансяк врачтне тензэ тень теемс эзть мере. Ялатеке семиянзо содавтомо свал сакшныль, куш шумбрачинть кувалма тень теемс тензэ ульнесь пек стака. Тетяст сыненст свал лездась. Пек ламо стакачить несть эйкакштне. Аваст марто савсь важодемс кода паксясо, истя кудоютксояк. Уш вишкинестэ саезь кармасть содамо кшисускомонть питнензэ. Шкатне пек стакальть. Ламот кирдсть вачочи, пенгетькак арасельть, штобу уштомс кудотнень. Сынст мельга тельня, цят якшамоне, салазке марто якильть вирев, пурныльть тарадт ды уштыльть кудотнень.

Мария Сергеевна чова рунголь, чамаумарензэ свал ульнесть ашназа-якстереть, черензэ пек кувакат, тустот, мизолксозо чевте. Вейке валсо – пек мазый ды важодеме вечкиця тейтерель. Семён Иванович истя жо пек мазый цёраль. Сынь тусть вейкест-вейкест мельс. Ды сайсть мель урьвакстомс-венчамс. 1961 иестэ налксесть свадьба. Анна Владимировна, Семён Ивановичень авазо, пек вечкиль аволь нузякс ды мазый ломанть. Секс, эряви меремс, урьвась эрьва ёндо тусь мелезэнзэ.

Семён Иванович истя жо ламо эйкакшонь триця семиястоль. Эйкакштнеде семиясонть ульнесть сисем – колмо тейтерть ды ниле цёрат. Сёма котоце эйкакшоль. Анна Владимировна се шкастонть эштё кастсь уроз нуцькинензэ, Ольгань, кона кадовсь ававтомо пельиесэ. Кода Мария Сергеевна совась те семиянтень, Ольганень ульнесть вете иеть. Атявтозо, Иван Михайлович, Ине Отечественной войнань участникель, се шкастонть уш туекшнесь эрямосто.

Свадьбадо мейле мирдезэ, Семён Иванович, мерекшнесь рамамс эстест кудо ды эрямс башка. Ансяк Мария Сергеевна эзизе шна те меленть. Сон мерсь: «Кода кадсынек сыре авать вишка эйкакш марто? Сыненст эряви лездамс ды ломандеяк аволь вадря».
Истя сынь кадовстькак эрямо мирдензэ аванть марто. Вейке-омбоце мельга чачсть колмо тейтерест: Тамара, Аня ды Галя. Тень лангс апак вано, сон Ольганьгак мейсэяк эзь яво. Шкань ютазь тейтересь прядсь медучилища. Прядомадонзо мейле важодсь Саранскоень 4 № больницясо медсестракс. Зярыя шкань ютазь тусь эрямо ды важодеме Тольятти ошов, тосо лиссь мирденень. Пенсияв туемс важодсь теке профессиянть коряс. Сон зярдояк а стувтни уряжонзо. Куш эстензэяк ней уш ламо иеть, ды шумбрачиськак аволь истямо, кодамо ульнесь икеле, ялатеке иезэнзэ кавксть-колмоксть сакшны сонзэ варчамо. Свал мельсэ кирди се паронть, мезе тейсь тензэ уряжось, ды ёвты тень кис покш сюкпря.

Мария Сергеевна ды Семён Иванович колмонест эйкакшост туртов макссть высшей образования. Тамара прядызе МГУ-нь омбо масторонь келень факультетэнть, Аня – МГУ-нь СИС-нть, Галя – Кооперативной институтонть.

Комсь иеть эрясь Мария ававтонзо марто вейсэ. Эрямонь перть ульнесть эрьва мезть. Кода кортыть эрзятне: «Ве таркасо аштемстэ пенчтне-вакантнэяк калдордозевить». Ансяк сынст эрямодост, сындест башка, кияк мезеяк эзь сода. Весе ульнесь паро!

Кода уш вере тешкстынек, Мария Сергеевна важодемань вечкиця. Васня сон роботась тувонь андыцякс (свинаркакс) ды теке шкане лиснесь колхозонь паксявгак роботамо. Шкань ютазь велесэ панжсть пекарня (кшинь панемань цех). Тосо важодсь кшинь паницякс, ансяк паксянь роботантькак эзизе кадно. Семён Иванович, кода се шкань ламо цёратне, истя жо важодсь колхозсо. Теде башка, кудоютконь тевтнедеяк а ёвтавияк зярольть! Кардаз потмост свал пешксель ракшадо: кирдсть аволь вейке скал, реветь, тувот, конатнень эйсэ левксыявтсть ды левкскетнень микшнесть, штобу седе мазыйстэ оршневтемс ды седе парсте андомс эйкакштнень. Кить эрить ды эрясть велесэ, пек парсте содыть, зяро вийть эряви путомс ракшань трямсто. Тельняяк роботась а маштни. Кизэде уш кортамскак а мезть. Роботадо икеле, валскень пиже зорят якиль тикшень ледеме. Тосто сы, кудоютконь тевтнень эрявить теемс, семиянтень пидемс-панемс. Сонстензэ ярсамс шкаяк эзь кадновкшно. Каподилизе кшисускомонть ды чиезь пекарняв эли паксяв важодеме.

А эштё эдь цела пире модамарть путозь, эрьва кодат эмежть, покш садпире. Сынст мельга истя жо эрявсь якамс. Зярс ульнесь ававтозо, неть тевтнень теемс лездыль сон, куломадонзо мейле жо весе прасть Мария Сергеевнань лавтовтнень лангс. Кода сон цидярдыль, ансяк Пазось соды. Нама, мирдезэяк, эйкакштнеяк лездыльть тензэ, ансяк ялатеке седе ламонть эрявсь теемс эстензэ эрзянь авантень.

Ризксэнтень, Семён Иванович кодгемень иесэ пек ормалгадсь. Васня керизь вейке пильгензэ, мейле омбоцентькак. Стакачитне эштёяк ламолгадсть. Кудоютконь тевтнеде башка, савсь мирдензэ мельгаяк якамс. Эйкакштне истя жо лездасть аваст туртов, эрьва оймсема чистэ ардыльть велев. Кода маштсть, шождалгавтсть аваст стакачитнень. Кодгемень вете иесэ Семён Иванович кулось.

Иетнень лангс апак вано (июлень 7-це чистэ сонензэ топодить 85 иеть), Мария Сергеевна нейгак весе вийсэнзэ важоди. Те шкас кирди саразт, пиресэнзэ апак путо мода панкскеяк эзь кадово. Касты пек ламо эмежть-мезть. Озадо аштемстэ зярдояк а несак. А кодамо паро сонзэ кудозо, кодамо ваньксчи кудопотсонть ды кудонть перька, зярдояк а мерят, тесэ эри сыре ломань. Од ломантнененьгак аволь весенень кирдеви истямо ваньксчи. Те теезь весе сонзэ вийсэ ды превсэ.
Мария Сергеевна свал мельспаросо васты аволь ансяк эсензэ эйкакштнень, истя жо эсензэ ды мирде ёндо роднятнень-раськетнень. Весенень арси паро, путы покш мель, весень кевкстнесынзе, кинь кодат тевензэ, ды весень кисэ озны Пазонтень. Сон вечки пеедькшнеме ды чарькоди пеедькшнематнень.

Нама, тейтертне а кадныть эйсэнзэ, меремс, свал мартонзот. Ули мелест теле лангс сайнемс ошов, ансяк Манька патясь а кунсолыяк неть кортамотнень, арась мелезэ кадомс кудонзо.
Сон покш каштанчисэ ашти весе тейтерензэ, колмо нуцьканзо ды кавто правнуцьканзо кувалма. Сыньгак пек вечксызь аваст ды бабаст. Нуцькатнеяк эсест эйкакшост марто свал сакшныть вечкевикс бабаст содавтомо. Сон жо сынст свал васты тантей каванямопельсэ. Мельспаросо пани эрьва кодамо топо марто тантей прякат.
Вана истямо кеме обуця, чевте седей ава эри Шугурова велесэ!

Мария ЯКСЯРГИНА

Чачома чи марто!

Вечкевикс авай! Весе седейстэ ёвтатано теть поздоровт тонь юбилееть кувалма. Тондеть малавикс минек кияк арась. Эдь зярс тон ютксонок, семс ули чачома кудонок, косо эждят эйсэнек эсеть лембечисэть ды вечкемасот, максат эрямонь вийть, максат тенек превс путомат.
Арасть истят валт, штобу ёвтамс теть сюкпря весе сень кисэ, мезе теить ды теят минек туртов. Тон свал вакссонок, вечкевикс авай, эрьва кодат эрямонь стакачитнестэ ды кенярксчитнестэ – мартонок. Минек туртов масторлангсонть сехте паро ава! Тон неженек, ванстыцянок. Минь певтеме вечктядызь.

Арсетяно теть кеме шумбрачи, кувака эрямо, парочи ды лембечи, кисэнек седе аламо ризнэмат. Кадык эрьва чись канды теть ансяк кеняркст. Минь жо, тонь вечкевиксэть ды малавиксэть, свал карматано мелень явомо. Сюконятано теть модас!

Тонь эйкакшот, нуцькат, правнуцькат.

Уряж, чачома чи марто! Арсетяно теть кеме шумбрачи, оймеёжонь сэтьмечи, уцяска. Эряк седе кувать, эдь зярс тон эрят, зярс тонь вальматнесэ палы толось, эйкакшот свал кадовить эйкакшокс. Кадовт свал истямокс: чевте седеекс, ломанень вечкицякс!

Паронь арсезь, роднят-раськеть.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».