Пятница, апреля 19, 2024
Важное

Октябрянь 3-це чистэ Саранскоень Культурань кудосо панжовсь «Традиций непрерванная нить» декоративно-прикладной искусствань выставка, косо невтневить С.П. Гагаринань ды сонзэ тонавтницянзо важодевкстнэ. Выставкась алтазь Тонавтыцянь иентень. Панжомстонзо сакшность ламо инжеть, ламотне эйстэст эйкакшт – художественной школань тонавтницят.



Светлана Петровна важоди тонавтыцякс 2-це № Эйкакшонь художественной школасо. Сон ламо тонавтни эрзятнень ды мокшотнень коест-кирдаст ды весе вийсэ бажи сынст ванстомо. Тень кувалма ютавтни викшнемань коряс мастер-класст, сёрмады проектт, методической разработкат, аноксты кортамот тонавтыцянь семинарс. Парсте важодеманзо кис ламоксть казневсь эрьва кодамо казнесэ. Светлана Петровна раськень творчестванть лови мазыекс, сельмес каявицякс, лия ёнов а молицякс, секскак эйкакштнеяк сонзэ уроксо покш мельспаросо тонавтнить раськень викшневкстнэнень, човалясто мазылгавтомапелень теемантень, кодамонтень. Светлана Петровнань тонавтницянзо свал сайнить васенце таркат эрьва кодамо пелькстамосо. Секскак сонзэ пек вечксызь эйкакштне, тетятне-аватне ды важодема таркасо ялгатне.

Зярдо кевкстинек Светлана Петровнань, кода неень мобильной телефонтнэнь шкасто тыненк озавтови эйкакшось викшнема экшс, сон апак кавтолдо мизолдозь ёвтась: «Эряви вечкемс эйкакштнень ды парсте содамс эсь теветь, мелень кепедезь ёвтнемс эсь раськедеть, сестэ неть валдо сяткотне пачкодить эйкакшонть седейскак, ды мейле уш сон сонсь карми бажамо эсь кедьсэ мазычинь тееме ды дивавтомо тонавтыцянзо. Теке марто минь мольтяно шканть марто велувсо: совавттано раськень тешкст неень вешематнень коряс. Истя лисить эрьва кодат мазылгавтомапельть, конат маштовить кандтнемс кирьгасо од ломантненень».

Кода ёвтнесь Светлана Петровнань васолдонь патязо Ольга Фёдоровна Асатрян, М.Е. Евсевьев лемсэ МГПУ-нь педагогической ды художественной образованиянь факультетэнь деканось, сынст Оля бабаст ульнесь эрямонь парезэ, косо таштазельть эсь кедьсэ теезь оршамопельть. Куломадонзо икеле сырькаест энялдсь калмамс сонзэ раськень оршамосо. Ды калмамонзо, келя, сакшнось весе велесь: эрьвась варштыксэль эрзянь мазый оршамопеленть лангс… «Тонь туртов, сазоркам, сатотсть минек бабанок маштомачинзэ, секскак шождасто теят сень, мезе таштась минек раськесь ламо пингень перть. Тон культурной кодонь алкуксонь кандыця», – мерсь сазоронстэнь Ольга Фёдоровна.

Сакшнось ваставкань панжомантень Светлана Петровнань васенце тонавтыцязояк. Мордовиянь искусствань заслуженной важодицясь, СССР-нь Художникень союзонтень совицясь Людмила Михайловна Острась-Демяшкина пшкадсь икелень тонавтницянзо туртов: «Косо се тейтерькась, кона сась монень 3-це классос? Неян, минек важодеманок эзь юта стяко. Мон пек кенярдан, тон молят монь киява! Ды улить сеть, кить нейке поладыть тонь кинть…»

Ламо лембе валт те чокшнестэнть ёвтасть Светлана Гагаринань малавиксэнзэ ды искусствасо содавикс важодицятне ды преподавательтне. Истя жо Культурань кудонь артисттнэ анокстакшность мельстуиця концерт.

Садо выставкас, кить эштё эзизь нее те мазычинть, конань теизь Светлана Петровна марто сонзэ тонавтницятне. Ваннынк эрзянь оршамопельтнень, човалясто кирьгакштнень, сюлгамотнень, викшнезь пацятнень ды нардамотнень – те покштояк покш важодеманть, конань теизь ёроков кедтне ды палыця седейтне. Выставкась карми важодеме кавто ковт Саранскоень Культурань кудонь фойесэ.

Марина Агафонова
Фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».