Понедельник, октября 19, 2020
Важное

Июнень 8-це чистэ тешкставсь Социальной роботникень чись. Неть ломантнень лангс икелеяк, а неень шкасто, зярдо масторлангонтень сась апаро коронавирусонь ормась, седеяк, каязь покш канст – максомс лезкс кажовсто, стакасто эрицятнень туртов ды топавтомс весе вешематнень стака эпидемиологической ситуациянть шкасто.

Меельце ковтнестэ покш тев теить кода минек масторонь, истя жо Мордовиянь Пенсионной фондонь сотрудниктне, конатне истя жо совить социальной услугань максомань сферантень. Важодема лувост сынст пек стакалгадсь сеть читнестэ саезь, зярдо Россиянь Президентэсь В.В.Путин яволявтсь эйкакшонь триця семиятненень башка ярмаконь явомадо. Пенсионной фондонь отделениятне кармасть аволь ансяк пенсиятнень, авань капиталонть ловомо ды пандомо, истя жо омбоце чистэнть саезь примамо ды ванкшномо весе тетятнень-аватнень пельде яволявтоматнень. Тевесь тееви течинь чис ды карми топавтовомо октября ковонть самс.

Аволь умок вастовинек МР-ва Пенсионной фондонь сотрудниктнень: социальной пандоматнень коряс отделэнь прявтонть Елена Страдымова ды сонзэ полавтыцянть Ольга Кечаева марто. Сынь ёвтнесть тенек, кода молить тевтне эйкакш марто семиятненень пандоматнень коряс. Тешкстама, Россиянь Президентэнть Указонзо коряс, 3 иес эйкакштненень пандоматне молить колмо ковонь перть ды сонзэ покшолмась – 5 тёжат целковойть, 3 иестэ саезь 16 иес эйкакштненень максови 10 тёжат целковоень покшолмасо вейкине пандома. Сехте ламо яволявтомат меельце ковстонть састь Госуслуги порталонть вельде, ней жо ушодызь роботаст Пенсионной фондонь территориальной отделениятнень клиентской службатне ды МФЦ-тне. Мордовиясо 3 иестэ саезь 16 иес эйкакштнеде лововить 100 тёжадо ламо ды сынст тетяст-аваст пельде уш примазь малав 78 тежат яволявтомат, конатнень коряс пандоматне ушодовсть июнень 1-це чистэ саезь ды поладовить седе тов. 3 иес эйкакштнень коряс тетятнень-аватнень пельде учовить 18 тёжат 600 яволявтомат. Июнень 3-це чистэ ПФР-нь отделениясь кучсь сынст счётнэс 83 миллиондо ламо целковойть. Сынь кучозельть 15 тёжадо ламо семиянень июненть кис. Весемезэ жо апрелень 16-це чистэнть саезь июнень 3-це чис пандоматне кучозельть 16 тёжадо ламо семиятненень ды суммась ловови 260 миллионт 330 тёжат целковойть. Чарькодтядо, кодашка стакачи неть читнестэ сынст лавтов лангсост?!

Нама, аволь весе яволявтоматне анокставить видестэ, улить ильведевкст ды кой-конатне велявтозь мекев. Кода видестэ сёрмадомс сынст ды кучомс – кевкстематнеде Пенсионной фондов сыть пек ламо. Тень кувалма Мордовиянь отделениясь пек парсте важоди МР-нь Профсоюзонь федерациянть ды сонзэ прявтонть С.В.Борисов марто. Трудовой коллективтнесэ профкомтне лездыть эйкакш марто роботыцятненень анокстамс яволявтоматнень седе видестэ, куроксто ды ильведьксэнь апак нолда.
Пенсионной фондонь сотрудниктне весе виест максыть сенень, штобу топавтомс тевест шкастонзо. Сынст кенярксчист кувалма арсетяно тенст ламо вийть, шумбрачи ды уцяскав эрямо!
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».