Вторник, марта 19, 2024
Важное

Течи сехте пшти кевкстемась, конась талновты масторлангонь весе эрицятненень: кода ванстомс прянть коронавирусонь инфекциянть эйстэ. Те зыянось сравтовсь масторлангонть келес, сонзэ эйстэ майсить ламо масторонь эрицятне.

Россиянь келес кемекстазь зярыя тевть, конат аравтозь коронавирусонь инфекциянь профилактикантень. Васняяк, эряви аштемс кудосо, ушов лиснемс ансяк покш тувталонь коряс: больницяв эли лавкав. Ды те, васняяк, тееви сень кисэ: ванстомс минек шумбрачинек ды эрямонок. Нама, аволь весе аштить кудосо, ламонень эряви якамс важодема таркав. Врачтне кортыть: те орманть эйстэ прянть ванстомга эряви кандтнемс медицинской маска (полавтнемс эрьва 2-3 часонь ютазь), сеедьстэ шлямс кедтнень сапоньсэ, антисептиксэ нардтнемс телефонтнэнь, ноутбуктнень. Ансяк вана зыянось: косояк арасть медицинской маскат. Зярыя аптекань кенкштнень лангсо понгавтозь яволявтомат: «Маскат арасть». Кедьчелькев тейтерь-аватне эзть кадово ве ёнов те тевенть эйстэ: ушодсть стамо маскат, кудосо, хлопоконь коцтонть эйстэ. Кие-бути микшни эйсэст, а улить истят чевте седей ломанть, кить явшить эйсэст питневтеме. Меельцетнень юткс кандови Светлана Миганова.

– Маскать стамс эряви ютавтомс 30 минутат. Сынь аволь весть тевс нолдавить, ламоксть, ансяк кавто часонь ютазь сонзэ эряви полавтомс, мейле муськемс ды гладямс утюгсо. Теде мейле сонзэ мереви оршамс одс, – толкови тейтересь. – Масторлангонть келес молиця зыянов тевтнень лангс ванозь, монень аволь жаль ютавтомс те шканть маскатнень стамс. Кеняркс сайсамам ды мелень витема, зярдо чарькодян: теян кодамо-бути талика вирусонь орматнень седе тов а нолдамонтень.

Светлана мирдензэ ды вишка тейтерьканзо марто эрить Саранскойсэ. Чачсь-кассь Рузаевка ёнксонь Перхляй велесэ. Видькстась, стамонтень вечкеманть казизе тензэ авазо, Лидия Аршинова. Эйкакшпорань прявт ледстнемакс Светланань туртов кадовсь, кода авазо стась. Сонзэ ульнесь стамонь машинказо.

Светлана прядызе Н.П.Огарев лемсэ МГУ-нь экономикань факультетэнть, мейле тонавтнесь раськень культурань институсо «Реклама» специальностенть коряс. Университетэнть прядомадо мейле тусь уцяскань вешнеме Московов, тосо мусь важодемань вадря тарка, важодсь маркетологокс. Ансяк вана арасель мелень витемань тевезэ, покшоль мелезэ стамс, эсензэ ды малавиксэнзэ туртов. Светлана рамась стамонь аволь покш машинка ды кундась вечкевикс тевентень.

– Ниле иеть ютасть уш се шкастонть. Московсолинь эштё, раминь Икея покш лавкастонть коцт ды стынь эйкакшонь вишка вельтявкс. Монь васенце вельтявксом! Ледстнеса, стынь сонзэ ды арсезевинь: зярдояк карми эйдинем, карман вельтнеме эйсэнзэ. Сюкпря Пазонтень, мелень-бажамон топавтовсть. Ней Ксения тейтерькам сеедьстэ уды те вельтявксонть ало, – ёвтни Светлана.

Кедьчелькев тейтересь ушодсь малавиксэнзэ туртов, кить анокстасть кармамс од тетякс-авакс, эйкакшонь вельтявксонь, тодовонь стамо. Эрьвантень пусть весе оймензэ. Курок ламот марясть сонзэ тевдеемадонзо, Светлананень пачтясть кармавтомаст: стамс вишка мазый вельтявкс чачтомань кудосто эйкакшонть саемс, стамс эйдень удома таркантень бортикть, вишкинесь илязо вачкодеве, эли стамс кокон ды истя седе тов. Кармавтоматне яла ламолгадсть. Малавиксэнзэ макссть превть: тейтерентень эряви панжомс эсензэ тев, конань мейле лемдизь «МедведицаМама». Аволь умок сынь ютасть сертификация. Светлана Мигановань ставксонзо рамсить аволь ансяк эсенек республикасо, истя жо сыть кармавтомат масторонь ламот регионтнэстэ ды мик омбо масторстояк! Тенень лезды, нама, Интернетэсь.

– Стан эйкакшонь текстиль ды кенярдан. Кенярдан уцяскав эйкакштнень коряс, конат тапарязь лембе вельтявкс потс, аватнень коряс, конат учить од эрямонь чачоманть, ды семиятнень коряс, конат пурныть эсест пизынест, – видькстась тейтересь.

Светлана ёвтнесь, малавиксэнзэ пеняцясть: аптекатнесэ арасть маскат, Интернетсэ эйсэст микшнить пек питнейстэ. Сестэ тейтерентень сась мель стамс хлопоконь маскат ды явшемс эйсэст питневтеме. Яволявтсь те тевенть коряс инстаграмсо. Ды зяро пшкадемат састь тензэ! Авазо, Лидия Викторовна, сты маскат Перхляйсэ, Светлана – Саранскойсэ.

– Неть читнестэ вейке содавиксэм лемдимем аволь превеекс. Мерсь: зяро ярмак ёмавтан пандемиянть пингстэ маскатнень питневтеме явшемстэ. Чарькодян, монень а идеви весе ошось, ды маскаськак 100 процентс а вансты вирусонть эйстэ. Ялатеке чарькодян, те кадык вишкине, ялатеке лезкс ды путовкс те орманть седе тов а нолдамонтень, прянь ванстомантень. Неть ярмактнень эйстэ мон а сюпалгадан. Пшкадян весенень, кинь улить стамонь машинкаст: стадо маскат, лездадо ломантненень, те аволь стака, ванодо тонавтомань мастер-класст Интернетсэ. Течи миненек эряви улемс вейсэ, лездамс вейке-вейкенень.

Татьяна Иконникова

 

 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».