Среда, августа 05, 2020
Важное

 

Покш Березникень муниципальной райононь сехте мазый таркасо аштиця велетнестэ вейкесь – Пермезесь. Сон кенярдовты тов сыця инжетнень иень эрьва кодамо шкасто, кизна пиже оршамопельсэнзэ, сёксня эрьва кодамо тюсонь лопасонзо, тельня покш ды сэрей ловонь шушмосонзо, теке ёвксонь мастор шержев сувсонзо. Алкукскак меельце иетнестэ телетне а пек лововт ульнесть, ялатеке тесэнь эрицятне эште эзизь стувто алкуксонь цят якшамонь шкатнень, зярдо аволь ансяк ломантне, лишметнеяк стакасто ютавсть.

 

Виде, ламось тесэ полавтовсь советской шкатнестэ саезь. Икеле ульнесь кеме хозяйства, ламо техника ды эйкакшто пешксе школа. Нама, полавтоматне токизь аволь ансяк те веленть, ков течи совить эште Нерлеесь, Специальной поселкась, Михайловкась ды Од Пермезесь. Масторонь келес ламо велеть ёмасть, кадовсть ансяк ломантнень ледстнематнес. Куш течи Михайловкасо эзь кадово вейкеяк эриця, ялатеке сонзэ эзизь нарда республикань картастонть. Тов секе тев сакшныть сеть, кинь ютась те таркасонть  эйкакш пингезэ, кинь кеместэ сюлми тиринь модась. Сехте пек ломантне тов ардтнить ягудань-пангонь кочкамо. Те шкас кадовсть тантей кстыень куротне, конат кенярдовтыть кода ошсто сыцятнень, истя маласо велетнесэ эрицятнень.

Масторонь ламо лия велетнень коряс, Пермезесь ашти паро таркасо, васняяк тов ацазь вадря ки, иень эрьва кодамо шкасто стакачивтеме тов пачкодят.

Кода тосонь икелень эрицятнень, истя жо ошсто-косто сыця инжетненьгак иень эрьва кодамо шкасто терди республикасонок сехте мазый ды сехте сэрей Инерка эрькесь, косо ванстовить чуросто вастневиця цецятне-тикшетне ды эзть ёма, нама, калтнэ.

Виде, велень ломантне эрьва чинь тевсэ-мелявкссо лиясто мик стувтыть кодамо мазый паро таркасо прась уцяска тенст эрямс. Эдь эрьва чинь кудоютконь тевтне саить пек ламо шка, сехте пек тундосто саезь сёксес.

Кода течи эрить ломантне кезэрень Пермезь велесэнть, неть читнестэ минь кортнинек велень поселениянь прявтонть Раиса Яковлевна Артюшкина марто. Тешкстасынек, Раиса Яковлевнань чачома велесь – теке ёнксонь Кузымесь. Эсь шкастонзо сон парсте прядызе Косогоронь средней школанть.

Косо поладомс тонавтнеманть, Раиса Юртайкинань (тейтерьксэнь фамилиязо) кавтолдоманзо арасельть секс, мекс вишка порасто сон пек вечкилизе математиканть. Тень кувалма документэнзэ максынзе М.Е.Евсевьев лемсэ МГПИ-нь физико-математической факультетс. Сонзэ прядомадо мейле ильтизь важодеме Покш Березникень Пермезень средней школав. Тесэ сон вастызе эрямонь ялганзо, лиссь мирденень. Эште мертяно, тесэ чачсть кавто эйкакшонзо – тейтерезэ Екатерина ды цёразо Александр. Кавонест сынь прядсть вейке вуз – Н.П.Огарев лемсэ МГУ-нть. Александр – Механикань ды энергетикань институтонть, Екатерина – экономической факультетэнть. Кавонест эйкакштне казсть тенст нуцькинеть. Покш мельспаросот вишкине Викториянь ды Ксюшань кувалма. Койсэнек, пек паро, зярдо тетянть-аванть улить поладыцяст, сырестэ кисэст мелявтыцяст, раськень  лементь кандыцяст. Течи Р.Я.Артюшкина минек редакциянь инже.

Раиса Яковлевна, те иесь масторонь ды республикань историяс сови кода Ине Изнямонь 75 иетнень тешкстамонь ледстневиця датакс. Инескеть, пачтядо, зяро ломанть велестэнк тусть войнань стака иетнестэ масторонть идеме, ятонть каршо тюреме?

– Алкукскак, те иесь, кода минек велень, истя весе Покш Березникень ёнксонь ды масторонь эрицятнень ледстнематнесэ пек домкасто сокардынзе седейтнень малавикстнэнь-содавикстнэнь лемест ледстямга, маштовозтненень седе покш мелень явомга. Минь эсенек велень поселениясо калмолангонь совамо таркантень теинек од ортат, седе товгак поладсынек сонзэ территориянть паролгавтомань тевтнень, эдь тосо калмазь ине идицянок. Истя жо аволь вишкине мель явинек Ине Отечественной войнасо маштовозтненень алтазь кеврунгонтень.

Сон минек историянок, сон миненек ледстни сеть умонь стака шкатнеде, зярдо малав эрьва кудосто тусть фронтов тетятне-покштятне. Зяро салов сельведть кандсь малав эрьва семиянтень малавикстнэнь маштовомаст, овсе одсто довакс кадовомаст, тетяст-леляст, покштяст куломаст коряс.

Раиса Яковлевна, неень а шожда шкастонть ошонь квартиратнестэ ламот бажить куш аламошкас туемс велев, течи Пермезев сыцятнеде ламо?

– Койсэнь, ней аволь ансяк минек Пермезь велесь пешкедсь ошсто сыця эйкакшто ды покш ломанде. Масторонь келес те тевесь поладовсь. Видьстэ ёвтамс, минек велестэ течи аламо чаво юрт эрямо таркань путомс ды кудотнеяк ков седе пек питнейгадсть икелень шканть коряс. Васняяк, велев юты паро ки, аштетяно мазый таркасо, эйстэнек а васоло чуди лей ды мазыйка Инерка эрькесь... Паряк, секс, кода эсенек велень икелень эрицятне, истя минек ёнкссо эмеж пирень таркань рамицятне тундосто сёксес весе шкаст ютавтыть тесэ.

Инескеть пачтядо, мезесь кадовсь тынк велес перестройкань стака иетнеде мейле, ули-арась течи важодема тарка Пермезь велесэ эрицятненень?

– Ёвтаса видьстэ: течи минек пек идить Инерка эрькенть чиресэ аштиця оймсема базатне. Эрицятнень ютксто кой-кить муить эстест тосто важодема тарка. Текенень поладса, социальной объекттнэстэ ванстовсь лавканок, почтанок, фельдшерэнь-акушерэнь пунктонок. Стявтови Пазонь Авань Покровонть лемсэ церькова.

Теке шкасто сави видькстамс, веленек иестэ иес сыреди се тувталонть коряс, што арасть од чачицят, школав якицят. Кода эйкакштнеде кадовсть пек аламо, сестэ сынст карминек усксеме эсенек райононь Марьяновка велев. Паряк, седе стака ульнесь тов ильтямост коряс те вейке ёндо, омбоце ёндо, кода тонавтыця ды школань прявт, мон парсте чарькодинь, эйстэст аламо ды седе паро тонавтнема шканть  ютавтомс покш классо, вастомс од ялгат, ды  саемс седе ламо содамочить.

Раиса Яковлевна, зяро ломанть эрить велесэнк, кода течи топавтовить налогтнень пурнамотне, лия аравтлувтне?

– Неень шкане Пермезь велесэ сёрмадстозь колмосядто ламо ломанть, кода вере ледстинь, тундосто сёксес эрицятне ков седе ламо. Ансяк ютазь иестэ велесэнек эрямо таркатнеде теезь 1050 кавонзазь метрат, малав весе сынст строизь дачниктне. Теке шкасто улить покш стакачить налогонь средстватнень пурнамост коряс. Куш сеть ломантнень, кинь модаст рамазь минек территориясо, мукшнотано,  гайневтяно тенст, ялатеке сынь таштыть покш долкт.

Кой-кить юткстост алтыть, пандомо жо ялатеке а капшить. Ламот пеняцить ярмаконь а сатноманть лангс…

Кодат эште лия стакачить течи печтить Пермезь велень эрицятне?

– Койсэнь, минек велень эрицятнень течи сехте пек талновты фельдшерэнь-акушерэнь пунктсо важодицянь аразьчись.  Тешкстаса, икеле медицинской сестра сакшнось Покш Березникстэ, весе ломаненек ульнесть теде мельспаросо. Куш кодамо кевкстема, мелявкс марто сонензэ пшкадильть однэк-сыренек.

Мон чарькодян, ней шкась а шожда, медицинасо важодицятнень лангс путозь покш ответственность ды пек ламо тевть, а сатыть врачт, медсестрат. Теке шкасто, кизна минек велесь пешкели эйкакшто, Паз илязо мере лисемс кодамояк берянь тев, сестэ косто тенек учома лезкс. Мереде тынк газетанк вельде пшкадемс республикасонок средней медицинской образования марто важодицятненень эли медицинской колледжень прядыцятненень, бути тынк ули меленк эрямс велесэ, мазый ды экологиянь коряс ванькс таркасо, садо миненек, мезе вийсэнек, весементь тейсынек эрямонк шождалгавтомга.

 

Валентина Юдина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».