Мордовиясо вана уш 27-цеде ютась «Шумбрат, Мордовия!» раськень шкинемань республикань фестивалень лауреаттнэнь ды изницятнень концертэсь. Пелькстамось кармась региононь эрицятнень вечкевикс проектэкс, истя жо яволявтозь Мордовиянь этнокультурной сюпавчинь вельмевтемань коряс культурань сехте вадря практикатнестэ вейкекс.
Гала-концертсэнть ёвтавить иенть перть республикань весе коллективтнень шкинемань важодемань цётавкстнэ. Те иень фестивалень прявт темась – «С чего начинается Родина?». Самодеятельной коллективтнень участниктне сценанть лангсто ёвтнесть койтненень-кирдатненень, семиянтень, тиринь ёнксонтень, Чачома масторонтень мелень явомадонть; ледстясть Мордовиянь ламот раськетнень койтнень-кирдатнень сюпавчидест.
Педагогонь ды наставникень иестэнть башка мель явозель тонавтыцятненень ды кедьчелькевтненень, весе сетненень, кить трясть-кастсть эрзянь-мокшонь модань алкуксонь цёрат. «Шумбрат, Мордовиясь!» тедеде вейсэндясь малав ниле тёжат ломанть. Дебютантокс кармасть сядодо ламо шкинемань коллективть ды морыцят-киштицят республикань 140 оштнестэ ды велетнестэ. Весемезэ невтезельть 500 ламо номерт, сехте вадрятне совасть Гала-концертэнтень. Сон ютавтовсь декабрянь 23-це чистэ Республикань Культурань дворецсэ.
Артисттнэнень ды ваныцятненень васняяк пшкадекшнесь Мордовиянь Прявтось Артём Здунов. Сон тешкстызе эрзянь-мокшонь раськень койтнень-кирдатнень, культурань сюпавчитнень ванстомань ды минек ине Чачома масторонть марто вейсэндявомань эрявиксчинть. «Шумбрат, Мордовиясь!» – республикань прявт фестиваль. Ансяк оймева одтнэ маштыть невтеме ёрокчист истят мероприятиятнесэ! Весе тынь пачтятадо сы шкантень культурань сюпавчинть, конань кемекстасть ды ванстсть минек покштятне-бабатне!» – мерсь Артём Здунов.
Мордовиянь Прявтось башка тешкстась, ней, кода зярдояк икеле, эряви кирдемс мельсэ эсь ундокстнэнь, Чачома масторонть, тонавтомс тенень эйкакштнень. Сон ёвтась сюкпря весе земляктненень, кить ванстыть минек масторонь мельтнень-вановттнэнь, сынст семиятненень. Те чистэнть залсонть ульнесь Мордовиясо чачозесь, Россиянь Героесь Давид Малыйкин, сон топавтсь ине тев спецоперациянть шкасто. Залось цяпась тензэ стядо, а сонзэ вельде – Чачома масторонь весе ванстыцятненень. Чатьмонемань минутасо ледстязельть маштовозь геройтне.
Региононь Прявтось явшесь государственной наградат культурасо изнявкстнэнь ды фестивальсэ ёрокчинь невтеманть кис. Кочкуровань райононь Раськень культурань, раськень промыслатнень ды ремеслатнень райононь куншкакуронь прявтонтень Юрий Ваньковнень максозь «Заслуженный работник культуры РМ» почётонь лемесь. Сон мерсь: «Мейстэ ушодови Чачома масторось? Те кевкстеманть лангс каршо вал максомс аволь шожда, а вана моронть вельде – мереви! Зярс карматано эрямо – карматано морамо тиринь ёнкстонть ды минек Россиядонть!»
Мордовиянь Прявтось истя жо казинзе эрьва кодамо номинациятнесэ пелькстамонь призёртнэнь ды изницятнень. «Фестивалень панжомакс» кармась Лямбирень райононь Атемарень эйкакшонь искусствань школань «Дедовы внуки» инструментальной ансамблясь, «Фестивалень дебютокс» – Саранскоень 7 № эйдень кужонь «Карамельки» коллективесь. «Хранители традиций» номинациясонть изнясь Торбеевань районсто «Хранители доброй старины» этномодань театрась, «27 лет на Фестивале» номинациясонть – Инсаронь районсто «Поюня» раськень фольклоронь ансамблясь. «Верное служение и преданность традициям народного творчества» дипломось максозь Кочкуровань райононь «Гайги вайгель» ансамблянь художественной руководителентень Мария Бояркинанень, «Лучший наставник коллектива-спутника» – Отяжелень районсто Эйкакшонь искусствань школань гармонистэнь ансамблянь ветицянтень Валерий Кумакшевнень.
Истя жо казезельть «Семьи героев» номинациясонть фестивалень участниктне – сынст малавикстнэ ней аштить минек масторонть кис.
Республикань сеть муниципальной образованиятнень ютксо, косо эрить 10 000 седе аламо ломанть, I степенень лауреатокс кармасть Ташто Шайговань райононь шкинемань коллективтне, фестивалень Гран-принть саизь Теньгушевань райононь артисттнэ. 2-це таркась – Дубёнкань райононь. «Муниципальные образования с численностью населения свыше 10 000 человек» номинациясонть I степенень лауреатокс кармасть Лямбирень райононь шкинемань коллективтне. 3-це таркасо Ромодановань районось. Мордовиянь оштнень ютксо I степенень лауреатокс яволявтозь Ковылкинань райононь артисттнэ, фестивалень Гран-принть саизь Саранск ошонь округонь артисттнэ. А кедьчелькевтнень теевксэст кисэ 1-це тарканть саизе Ицялонь районось, колмоценть – Покш Игнатовань районось.
Эрьва коллективентень ды номинациясо изницянтень максозь питней казне Мордовиянь Прявтонть пельде, эйкакштненень – од иень ламбамо казнеть.
Од иеденть икеле алкуксонь дивакс кармась весероссиянь акциясь – зярыя иетнень перть Од иенть каршо сон ютавтневи Президентэнть ушодксонзо коряс весе масторонть келес. Фестивалень Гала-концертсэнть ульнесть акциянь участниктне – Данил ды Савелий Сысуевтне. Сынст салавачинь мель марто шаронть «Мелень-арсемань топавтыця кузонть» лангсто теде икеле саекшнизе Мордовиянь Прявтось. Цёрынькатне тонавтнить Саранскоень 38 № школасо ды эйдень кужосто саезь явить мель спортонь эрьва кодат ёнкстнэнень. Эрьва недля сынь яксить катоков, ансяк эсест конькаст Данилань ды Савелиень арасть. Те чистэнть сынст мелест топавтовсь – Артём Здунов казсь цёрынькатненень аволь ансяк конькат, истя жо клюшкат, шайбат ды Хоккеень центрав якамонть туртов сертификатт. Ней эйкакштненень мереви варчамс эсь виест спортонь те видсэнтькак. Концерттэнть мейле цёрынькатне сыргасть катоков – од конькатнень варчамо.
Од иеденть икеле весе мельтне-бажамотне топавтовост!