Ремезенка велесь, кона Чаунзань районсо, советской шкасто пек покшоль. Тесэ ульнесь средней школа, косо эйкакштне тонавтнесть аволь ансяк тешкстазь программань коряс предметтнэнь, истя жо тиринь ёнксонть, тиринь келенть вечкеме. Тень кувалма школань прядыцятнестэ ламотне паро эрямонь вешнеме ве ёнов эзть тукшно. Се, кие тонавтнеманзо поладокшнызе вузсо, техникумсо, лиясо, велявтыльть важодеме тиринь ёнксов.

Тесэ эсь шкасто важодсь колхоз, конань лемезэль «Победа». Сонзэ прявтсо кувать важодсь А.Г.Рябов.

– Тиринь велень средней школанть прядомадо мейле мон тонавтнинь шофёрокс Чаунзань ДОСААФ-со, – ёвтни Н.В.Наумкин. – Тонавтнеме кучокшнымим райвоенкоматось. Зярдо прядыя тонавтнеманть, сынь важодеме тиринь велень колхозов. Анатолий Герасимович вастымим мельспаросо. Ансяк важодемс кувать тень эзь саво, саимизь армияв. Служинь кавто иеть. Ветнинь автомашина.

Николай Васильевич армиясо служамодо мейле велявтсь тиринь велев. Колхозонь прявтось А.Г.Рябов явсь тензэ «ГАЗ-53» автомашина.
– Эйсэнзэ важодинь кувать, – ёвтни Н.В.Наумкин. – Видема шкасто паксяв усксинь видьмекст, сёксня – комбайна алдо тинге лангов сюро. Ды истя важодинь пенсияс туемазон.

– Мон тевтеме зярдояк эзинь аште, – видькстась Николай Васильевич. – Важодинь сеть автомашинатнесэ, конатнень течи хозяйствастонть а вастсыть – «ГАЗ-53», «Зил». Истя жо важодинь «КамАЗ»-сояк.
Н.В.Наумкин пенсиясо, ансяк сонзэ обуцязо аволь истямо, аштемс тевтеме кудосо. Течи Николай Васильевич топавты "РЕМЕЗЕНСКОЕ" ООО-со плотникень, тингелангонь прявтонь ды лия тевтькак. Сон свал тосо, косо эряви эсь тевень алкуксонь ды ёроков специалист.
Тешкстасынек, Н.В.Наумкин лезэвстэ ютавтни юткошканзо. Сон тиринь кельсэ ловны книгат, журналт, «Эрзянь правда» газетанть.

Пётр ЗИНОВЬЕВ.
Чаунзань район