Понедельник, июля 04, 2022
Важное

Миграционной службань инспекторонь тевесь – сехте стака тевтнестэ вейкесь. Ансяк тень лангс апак вано, УМВД-нь те структурасонть седе ламот важодицятне – тейтерь-ават.

Ды истя ладявсь эштё советэнь шкатнестэ. Цёратне уш сестэ те роботанть эзть кочка – зарплататне аволь покшт, а вана конёвтнеде, отчёттнэде ды ответственносттенть пек ламо. Ды, эряви меремс, течи аламо мезе полавтовсь. Те парсте неяви, саты ансяк совамс миграционной пунктс. Тейтерь-аватне – эрьва кабинетсэ. Сэтьметь, свалшкане анокт зярдояк а прядовиця конёвтнень марто важодемантень. Те сынст тевсэст прявт ёнкс.

Те профессиянть эсь эрямонь тевекс кочкизе минек течинь героинясь, Россиянь МВД-нь «Ичалковский» ММО-нь миграционной пунктонь старшей инспекторось Марина Петровна Ляляцкова. Сон парсте содась, мезе марто сюлми эсь эрямонть, зярдо кемень иеде икеле эскельдясь Ицялонь районсо сестэ эштё Россиянь УФМС-нь межрайонной отделениянь поровтонть трокс.

– Россиянь МВД-нь «Ичалковский» ММО-нь миграционной пунктсо важодема ким ушодовсь 2011 иень июль ковсто. Ансяк сестэ сон лемдевсь Ицялонь районсо Россиянь УФМС-нь межрайонной отделениякс. Важодеманть ушодыя старшей инспекторонь тевстэ. Мейле, 2015 иестэ, монень максызь государственной советникень 3-це классонь чинэнть ды аравтымизь миграционной отделэнь прявтокс. 2016 иестэ минек службанть вейсэндизь полициянтень ды мекев ютынь старшей инспекторонь таркантень. Те лиссь сень коряс, што аттестациянть ютамсто иень коряс эзинь ладя. Миграционной пунктонь старшей инспекторонь таркасо важодян неень шкас.

– Эряви чарькодема, кемечи ды пек ламо вийть, штобу важодемс миграционной пунктонь инспекторокс, – тешксты Марина Ляляцкова. – Седе башка, инспекторонтень эряви содамс Конституциянть, ламот федеральной законтнэнь, подзаконной акттнэнь ды нормативтнень, сонензэ эряви маштомс муемс кель-вал ломантнень марто. Ды, а мезть сёпомс, улемс кемекс. Эдь эрьва чистэ вастневемс савкшны ламо ломань марто, конатнень ютксо улить рузонь келенть асодыцят, минь мигранттнэнь марто важодтяно. Вастневить истят, кинь мель-ёжост аволь вадря. Ды тонеть, васняяк, эряви ладямс те ломаненть марто кортамонть, лездамс тензэ. Эдь минь важодтяно ломантнень туртов. Теке марто минек важодемань явовтыця ёнксось сеньсэ, весементь тейтяно законодательстванть юрсо.

Марина Ляляцкова нейгак ледстни важодемань васенце чинть. Кода тешксты авась, ульнесь мелявтома, ульнесь талнома, кода сонзэ вастсызь, кода кунды зярс эштё а содавикс тевентень, сатыть-арась содамочинзэ, виензэ. Ансяк весе талноматне стувтовсть малав сеске, кода ушодсь важодеме.

– Мон пек куроксто весементень тонадынь ды важодемась сеске кармась тень мелень коряс. Тень кисэ покш сюкпря ёвтан монь тонавтыцянтень, превс путыцянтень Алевтина Вячеславовна Малованень. Сон роботась минек отделениясо ды тонавтымим пек ламос. Алевтина Вячеславовна васенце чистэ жо сайсь лангсон, кода кортыть, «шефства». Весементь тень ёвтнесь, толковась, кода теема сень, кода тонань, кода карми седе виде. Те сон тонавтымим документтнэнь марто важодеме, регистрациянь учётонть ветямо. Сехте прявтось жо, тонавтымим ломантнень марто важодеме. Минек тевсэнть те эрявикс ёнкс.

Теке марто Марина Ляляцкова тешксты, неть иетнень перть важодемасонть ламо мезе полавтовсь. Ней пек ламо услугатне максовить Госуслугань порталонть вельде. Те аламодо седе шождалгавтызе тевенть.

– Тесэ васняяк тешкстама сень, миграционной пунктонь инспектортнэ ней ломантнень марто вастневеме кармасть седе чуросто. Ней ламо документт, справкат ды лия эрявиксэнть мереви теемс Госуслугань порталсо эли МФЦ-сэ. Истя, неень шкань технологиятнень эрямос совавтозь, ламо мезе полавтовсь, паряк, шождалгавтовсь. Ансяк монень седе мелень коряс, зярдо ломаненть марто вастоват, кунсолосыть мелявксонзо, весементь тензэ толковасак, лездат. Сестэ марят эсь прят седе эрявиксэкс, тевентень ойменть путат. Эрямось жо моли икелев ды од совавтоматнеяк а берянть, сынь шождалгавтыть важодеманок, – тешксты Марина Петровна.

Юткошканзо авась бажи ютавтомс Александр Фёдорович мирдензэ ды Пётр цёранзо марто. Семиясь сонзэ туртов сехте покш питнейчи. А вана авань уцяскань салавачикс Марина Ляляцкова лови вейке-вейкень чарькодеманть.

– Свал эряви кунсоломс вейке-вейкень, марямс ды чарькодемс. Сестэ семиясо карми вечкема, уцяска ды сэтьмечи, – тешксты тейтерь-авась.
Весе иетнень перть миграционной пунктонь старшей инспекторось Марина Ляляцкова маштсь тееме кеме сюлмо эсь важодеманть ды семиянть ютксо.

– Монь туртов пек эрявикс се, мезе теян. Ансяк бути аволь уле истямо кеме тыл, кода семиям, аволь уле чарькодема мирдень пельде, те профессиясонть, паряк, аволинь кирдевеяк. Весе стакачитне изнявить, бути малавикс ломанеть чарькодить эйсэть, лездыть ды роботат истямо вадря коллективсэ, – кемексты минек героинясь.



Юлия ЕРЕМИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».