Вторник, марта 19, 2024
Важное


«Тепличное» акционерной обществась ашти Саранскоенть песэ чилисема ёно, Озёрный посёлканть маласо. Бути ардат машинань кияванть Чаунза ёнов, хозяйствась парсте неяви. А содыця ломанеськак чарькоди, кичиресэнть неень шкань кеме хозяйства.
Ламо иень перть тесэнь коллективсэнть теевсь паро кой: Велень хозяйствань ды перерабатывающей промышленностень роботникень кенярксчистэнть ёвтамс поздоровт тосо важодицятненень. Тедеде торжественной промксось ютась ноябрянь 23-це чистэ. Ды, куш ульнесь субута, предприятиянь актовой залось тыц пешксель. Тесэнь коллективентень поздоровонь ёвтамо сакшность Мордовиянь Правительствань Председателень васенце полавтыцясь – республикань Велень хозяйствань ды продовольствиянь министрась В.Н.Сидоров, Саранск ошонь агропромышленной комплексэнь профсоюзонь председателесь Т.А.Агеева.


«Тепличное» акционерной обществась республикань агропромышленной комплекссэнть кеместэ кирди эсь тарканзо. Зярдо-бути велень хозяйствань вишка предприятиясь эзь ёма рынкань отьмантень. Тесэнь коллективесь кедензэ эзинзе нолда ды прявтонть Александр Михайлович Живаев марто од лувтнесэ уставасть вешнеме хозяйствань ветямонь од кить-янт. Мезе теньстэ лиссь, ней содави ды парсте неяви. «Тепличное» акционерной обществась сови Россиянь вете сехте виев истят предприятиятнень юткс. Тесэнь продукциясь республикань эрицятненень, ды аволь ансяк, пек содавикс. Сынст кастовт эмежтнень рамсить покш мельсэ. Сынь пек паро качествань. Мордовиядонть башка, тесэ кастовиця продукциянть покш мельсэ рамить Россиянь лия регионтнэстэяк. Хозяйствасонть роботась ладязь истя, штобу весемесь кандоволь лезэ. Миезь продукциянть кис ярмактне нолдавить производстванть одкстомтомантень, од технологиятнень тевс нолдамонтень, социальной сферантень.
Те иесь республикань агропромышленной комплексэнь предприятиятненень а берянель. Саезь урожаесь мелень коряс лиссь пек седе ламо. «Тепличное» акционерной обществасо хозяйстванть ветямосо улить башка ёнкст, конатне косояк а вастневить. Сайсынек эмежень кастоманть. Тесэ кастыть панжадо таркасо ды вельтявкс ало. Эрьва лувонть парсте содама. Эряви содамс, зяро валдо максомс вельтявкс ало кастовиця куяртнэнень. Панжадо таркасо кастовицятнень мельга якамось лия. Паро урожаень саемга, топавтомат весе технологиятнень.
Коллективентень лембе валонь ёвтамодо мейле акционерной обществань прявтось Александр Михайлович Живаев пачтясь: «Иень перть добовазь аволь аламо. Мелень коряс миезь продукция 600 миллионт целковойде ламо. Зярдо-бути те ульнесь ансяк тешксэнек, ней вана саевксэнек! Тень удало ашти коллективенек паро роботазо. Нама, тенек пек лездасть од технологиятне, од лампатне, конатнень нолдынек тевс. Сынст вельде вейке квадратной метрасто саинек 146 килограммат эмежть».
Эряви меремс, «Тепличнойсэ» свал моли од теплицатнень строямось. Те сюлмавозь моданть полавтнеманзо марто. Тевс нолдазь лембень максомань од станциясь, кона часозонзо максы 53 мегаватт энергия. Сонзэ вельде кастозь ды миезь 10 тёжат тоннат эмежть. Мелень коряс сынст питнест пек валгсть. Александр Михайлович ёвтась сюкпря Мордовиянь Велень хозяйствань министерствантень, «Виктория» подрядчикень организациянтень, кона лездась теемс те тевенть. Те иень маень куншкавидьстэ калавтозельть ташто теплицатне, а уш ноябрясто од теплицатнестэ пурназель од урожай.
Вельтязь таркасо эмежень кастомась – аволь шожда тев. Александр Михайлович ёвтась покш сюкпря агропромышленной службантень, конань прявтсо Марина Александровна Водогреева. Сынь свал ваныть технологиянть а колсеманзо мельга. «Тепличнойсэ» сехте покш производствась 3 № цехсэ. Те иестэнть тесэ кастсть ды мисть 120100 тоннат продукция. Весе делегациятне, кить сакшныть опыт мельга «Тепличноев», тонавтнить тесэ. Сы иестэ тесэнь роботыцятне арсить ламолгавтомс продукциянть. Тесэ важодить эсь тевень содыця ломанть. Сынь свал икельцетнень ютксо. Неть: Е.Н.Захарова, С.В.Котова, В.И.Шукшин.
Колмоце цехенть эйстэ а кадновить 4 № цехень роботыцятнеяк. Ды, куш тесэ моли покш реконструкция, курок тевтне прядовить ды цехесь таго карми эмежень кастомо. Истямо лувсо роботыть лия цехень важодицятнеяк.
Пурнавозтненень поздоровонь валт ёвтась Владимир Николаевич Сидоров. Эсь кортамосонзо сон тешкстызе: «Тепличноесь» – истямо предприятия, конанть ламо изнявксонзо. Меельце шкастонть тесэ теезь покш эскелькс икелев. Электричества вельде кастовиця культуратнень алов явозь 23 гектарт. Шабрань Ульяновской областьсэ истямо жо предприятиясо светокультуратнень алов явозь ансяк кавто гектарт ды тень коряс эрьва косо прянь шнамодонть а сизильть. Зярдо марясть, зяро минек «Тепличнойсэ», кургост сеске пекстызь». Владимир Николаевич ёвтась тесэнь важодицятненень поздоровт, кеме шумбрачи ды роботасо од изнявкст.
Кортамотнеде мейле ульнесть казнеть. Истямо чистэ сынтемест а кода. Бути весень тешкстамс, кить казезельть, газетань лопаськак а саты. Сехте покш казне максозь овощеводонтень-тепличницантень Людмила Николаевна Крыскинанень. Те – «Велень хозяйствань ды перерабатывающей комплексэнь заслуженной роботник» почётонь лемесь. «Тепличноев» авась важодеме сась 1983 иестэ. Ламо иеть роботась ТЭЦ-2 посёлкань теплицатнесэ, конат истя жо совильть «Тепличноентень». Мейле тердизь седе покш теплицатнес. Людмила Николаевна пря эзь покшкавтне. Мезе ды кодамо робота ансяк эзь савкшно топавтомс. Эрьва тевенть сон тейсь седейшкава ды шкастонзо. Аванть паро роботазо апак редя эзь кадово. Те покш казненть кувалма мельспаросо ашти коллективеськак, косо сон роботы. Людмила Николаевна тевензэ кадомо а бажи ды арси роботамс седе товгак.
Предприятиянь роботыцясь Надежда Васильевна Кудряшкина казезь Мордовия Республикань Почётонь грамотасо. Россиянь Велень хозяйствань министерстванть пельде Благодарность максозь Елена Дмитриевна Крымованень. Мордовиянь Велень хозяйствань министерстванть пельде Почётонь грамота максозь Татьяна Васильевна Дружинкинанень ды Екатерина Григорьевна Каткованень. Ёвтасынек, тешкстазетне казезтнестэ ансяк а покш пельксэсь. Эрьва кодат грамотат ды казнеть получасть ламо лия важодицятнеяк. А вана Надежда Фёдоровна Давыдованень максозель башка казне. Неть читнестэ авась тешкстызе юбилеензэ. «Тепличное» акционерной обществасо сон роботы 1976 иестэ саезь. Лисни, ниленьгеменде ламо иеть. Надежда Фёдоровна сеть ломантнестэ, кить кепедсть предприятиянть ды важодить течинь чис. Зярдо сась тей роботамо, весемесь ансяк ушодовиль. Сон эзь тандадо стакачиденть ды вана роботы течинь чис. Сонензэ истя жо казезельть цецят ды поздоровт.
Меельцекс кенярксчинтень пурнавозтненень невтезель паро концерт.
Николай Евдокимов

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».