Суббота, октября 24, 2020
Важное


Азорось сон паро, ламо шка яви пирензэ-тингензэ, ракшанзо ды кардазонзо мельга якамонтень. Ялатеке сехте покш мель яви кудонумолонзо туртов, конатненень строясь башка кардыне. Весемезэ нумолкайтнеде тосо 25-шка, ансяк цифрась полавтневи эрьва ковсто, эдь неть мазый ракшатне левксыить колоньгемень чис весть. Владимир Дмитриевич тевень содазь ёвтни нумолотнень ланга ды сынст эрямонь койдест. Вишка фермасонзо кирдевить кавто породань нумолот: Калифорниянь ды Од Зеландиянь. Сынь эрьва кодамо тюсонь: ашот, сёрмавт, тюжат, раужот. Башка пирявкс потсо аштить атяка нумолотне. Сынь сехте покшт ды эчкеть. Покш нумолнэтне явозь потиця левкскетнень эйстэ. Нумолнэтне аволь свал аштить кудынесэст, чизэнзэ весть-кавксть азорост нолдтни эйсэст оляс. Бути пертьпельксэсь маней, пансесынзе пиревгак, тосо тенст кастови луганар. Владимир Дмитриевич, кода ветеринар, пек парсте ваны нумолотнень шумбрачист мельга: анды эрявикс ярсамопельде – тикшеде, капстадо, морковдо, витаминдэ, сэредькстнэде тейни прививкат. Эрьва клетканть экшсэ понгавтозь сёрмадовкс, зярдо левксыи авакась.

Нумолкайтне а вечкить, зярдо сынст токшить, пелемадонть тарныть-сорныть. А стяко тусь валмеревксэсь «пелицясь, теке нумоло». Кортыть, тандадомадонть сынст седеесткак сезевкшны, секскак седе паро, зярдо мартост ози ансяк вейке ломань.
Кудонумолотне кастовить аволь налксемань кисэ, сынст сывелест пек лезэв эйкакштнень, стакасто сэредицятнень, спортсментнэнь, сыре ломантнень туртов.

Те тевесь Владимир Дмитриевичнень а канды покш ярмакт, сон касты цёранзо, нуцьканзо, роднянзо-раськензэ туртов, эдь неень шкане ванькс сывеленть стака муемс ды истят кудонь ферматне пек лездыть шумбрачист мельга пштистэ ваныця ломантненень.

Оймеёжонть паролгавтомань кисэ жо Бухаркин тейсь пирензэ удалов оймсемань тарка. Зярыя иеде теде икеле тинге песэ чудиця Чурька лейнесь пештявкшнось шукшто, покш тикшеде, вельтявкшнось пиже нарсо. Владимир Дмитриевич васняяк ванськавтызе лейненть, пансь трактор, чувовтсь а покш эрьке. Сонзэ перька озавтнесь килейть, кальть, пекшеть, кузт, умаринат. Эрькинентень нолдась вишка калнэть. Истямо мазычи ней тосо! Кизэнь пси читнестэ тесэ экше ды мельспаро. Кодаткак пирявкст оймсема таркантень сон эзь ладсе, киньгак эрькенть вакссто а панси, ансяк ваны ваньксчинть мельга. Лей берёксонть кизна касты вазнэть, конатнень туртов тосонь лугась пек вечкевикс.

Минь сеедьстэ а нетяно мазычинть эсенек судо удалдо. Лиясто мазычись вакссонок, ансяк эряви аламошка вий путомс сонзэ тешкстамс ды неемс. В.Д.Бухаркин тень редизе ды ней лови Чурька лей лангонть, кода ней мерить, «релаксонь» таркакс, конанть а полавтсы кодамояк пси мастортнэнь курортнэнь лангс. Шабранзояк истят жо мелест. Келя, ней виртнес а пачкодят ды якамскак тува пелезеват идем ракшатнень ды лёмзийтнень кувалма. Секскак, истят оймсема таркинетне кудо удалга паро лув, конанть арсить поладомс Сабанцелень лия эрицятнеяк.

Марина ДЕВЯТОВА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».