Вторник, марта 19, 2024
Важное

огород

Ушодовсь медьковось. Кизэнь куншкась, сехте пси шкась. Шка витемс видемстэ нолдазь ильведькстнэнь ды арсемс вадря урожаень саемань  аравтлув.

Панжиковонть ды умарьковонть коряс медьковось маряви оймсема шкакс. Тундонь видемась кадовсь удалов, 1 урожаень пурнамо шкась эште васоло. Ансяк сад ды эмежпирень алкуксонь азорось тевтеме зярдояк а ашти, кода кортыть - эрьва шканть эсензэ тевензэ-мелявксонзо.

Медьковонь прявт тевтне - касовкстнэнь валномась ды, андомась, зыянов тикшетнеде ванськавтомась, моданть кавшакавтомась. Валномс седе паро аштень ведьсэ, кона эжсь чинь каршо, рана валске эли сундерьгадозь чинть валгомадо мейле. Теде мейле моданть эряви кавшакавтомс. Кизэнть куншкасто эмежпиретне кенярдовтыть сельме эсь 1 мазычисэст. Кой-кона эмежтне ды куракштне уш максыть 1 васень урожай.

ЯГУДАНЬ КУРАКШТНЕНЬ АНДОМАСЬ

Бути ягудатнесэ а сатыть питательной веществатне, сестэ тантей ды сюпав урожай иля учо. Бути пиресэнк касыть инзейть, шукшторовт ды борбольть сынст эрявить андомс макро-ды микроэмлементсэ.

Нама, ягудань куракштненень андомась седе пек эряви тунда ды сёксня, ансяк кизэнь андомантькак а эряви стувтнемс. Сынь лездыть касовкстнэнень кенерстемс паро урожай.

Кизэнь перть инзеенть ды ёжевиканть эряви андомс колмоксть: цветямо шкастонть, ягудань теевема шкастонть ды урожаенть пурнамодо мейле.

Шукшторовонть ды борболенть кизна удобрениясо андомс а эряви, ансяк куракштнень ало модась улезэ летьке.

Инзейтнень эряви кочкамс эрьва чистэ, пек кенерезетне курок наксадыть. Раужо шукшторовонь пурнамонть истя жо а эряви сацтнемс, кенерезетне курок певерить. Ашо ды якстере шукшторовтне седе нардевстэ аштить куракшонть лангсо, сынь ковонь пертькак а певерить.

ЭМЕЖПИРЕНЬ МЕЛЯВКСТНЭ

Нама, эмежпиресэяк июньстэ ламо тевтнеде. Сезононть ушодомсто парсте важодемадо мейле сась васень урожаень пурнамонь шкась. Те рана кенериця капстась, модамаресь ды сёксня видезь пейнечурькась. Капстась ды модамаресь кувать ванстомс а маштовить, капстатне лазновить, секс сындест эряви ярсамс сёксень эмежтнень урядамс.

Васень эмежтнень урядамодо мейле моданть анокстама сы иентень. Те таркантень паро видемс сидератт - те истят тикшеть (рапс, горчица, клевер, ликша, люцерна, кснав ды лият), конат моданть сюпалгавтыть азотсо ды микроэлементсэ ды а нолдыть зыянов тикшетнень касоманть, вадрялгавтыть модань структуранть. Модась ванстови аволь ансяк зыянов тикшетнеде ды эрьва кодат орматнеде, истя жо те пек паро удобрения.

ИДИНК КАСОВКСТНЭНЬ  ЗЫЯНОВ УНЖАТНЕДЕ ДЫ ОРМАТНЕДЕ

Кизэнть куншкасто сыргозить касовкстнэнь туртов сехте зыянов унжатне ды кандыть мартост эрьва кодат ормат. Пасленовой культуратнень (томаттнэнь, баклажантнэнь, модамаренть ды переценть) - те колорадской жукось ды фитофторозось. Капстанть лангс каявить капстань карвось, ашо нимилявтне ды лия унжат. Капстась майси кила ормадонть. Куяртнэнень сехте покш зыян кандыть паутинной клещесь ды антракноз ормась. Чурькась пели чурькань карводонть ды мучнистой росадонть. Идинк эсь урожаенк ды шкастонзо ютавтодо профилактика орматнеде ды зыянонь кандыця унжатнеде.

ВАЛНОМАСЬ: ЗЯРДО, КОДА ДЫ ЗЯРО

Эмежень валномась пси шкастонть аволь стяконь тев - эряви содамс зярдо, зяро ды кода валомс касовксонть, штобу аволь ансяк аволь коське касовксось, эште улезэ тень эйстэ седе покш лезэ. Эмежпиренть эряви валномс видестэ, касовкстнэнь мелест витезь. Валномс эряви истя, штобу ведесь пачкодезэ ундокстнэс, сестэ ансяк касовксонтень ули лезэ - совазо 20-30 сантиметрас. Штобу ведесь соваволь зняронь сэрть, эряви валомс эрьва кавонзазь метрантень 30 литрадо а седе аламо ведь.

Эмежпирень вечкицятне ловить, пси шкасто ланга-прява сеедьстэ валноматне лезэ а кандыть, мекевланк кандыть зыян касовксонтень.

Эряви содамс, ведесь аволь ансяк симди касовксонть ды сонзэ лопатненень, цецятненень ды эмежтненень пачти модастонть минеральной вейсэндявкст, истя жо пси читнестэ касовксонтень максы экше.

Чуваров моданть эряви валномс седе сеедьстэ, сёвонь моданть - чуросто. Модасонть летькень а сатомась неяви сеске:

  • эмежесь лоткась касомадо;
  • киртявсь урожайностесь;
  • касовксось беряньстэ цвети эли цецятне прыть;

прыть сюлмавкстнэ.

ЧУВТТНЭНЬ ВАЛНОМАСЬ

Летькень асатомась касовкстнэнень канды седеяк покш зыян питательной элементтнэнь асатоманть коряс.

Ламот регионтнэсэ медьковось иень сехте пси ков, секс самай те шкастонть эряви покш мель явомс чувттнэнь ды куракштнень валномантень. Нормась улезэ истямо:

од куракшонтень - 1-2 ведрат;

покш куракшонтень - 3-4 ведрат;

3-5 иесэ чувтонтень - 5-8 ведрат;

7-10 иесэнтень - 12-15 ведрат.

Пси шкастонть 1-5 иесэ чувтынетнень валномат седе сеедьстэ (недлязонзо весть).  

 «СЮКПРЯНЬ» ЕВТАМГА

Зярдо кочкавить весе ягудатне, илядо стувто ёвтамс «сюкпря» сад пиресэнк касыця кстыйтненень. Касовкстнэнь перька моданть кавшакавтынк, ундокстнэнь кемекстамга куракштнень аламодо вальсемат. Шкастонзо керсемат устнэнь, бути сынь а эрявить ягудань плантациянть покшолгавтомс.

ЦЕЦЯТНЕЯК УЧИТЬ МЕЛЕНЬ ЯВОМА

Медьковсто истя жо покш мель явома цецятненень. Шкастонзо керсемат пужозь цецятнень, штобу авольть тееве видьмекст. Касовксось карми виензэ путомо видьмекстнэнь кенерстемантень, тень эйстэ цветямось лавшоми. Бути арсетядо саемс те цецястонть видьмекст, сестэ кадодо зярыя цецят, сехте виевтнень, кадовикстнэнь керсинк.

Сэрей цецятнень: гладиолустнэнь, георгинтнэнь, шток-розатнень сюлмсинк нежес, штобу авольть сяворе ды сиве.

Медьковонтень пионтнэ уш цветявить. Киртинк цветоностнэнь, лопатнень керямс а эрявить. Куракштнень алов каяма компост эли перегной ды моданть вадрясто кавшакавтома.

Розатнень сехте виевстэ цветямонь шкась сави медьковонтень. Те шкастонть сынь пек парсте валномат. Вейке куракшонтень каяма кемень литрадо а седе аламо. Истя жо те ковстонть розань куракштнень кавксть-колмоксть андомат органической удобрениясо. Медьковсто таргамат тюльпанонь, гиацинтэнь чурькатнень. Тень теема эрьва иестэ, лиякс цецятне кармить иеде иес виш-калгадомо. Таргазь чурькатнень ванкшномат, кочкамат седе нардевтнень. Парсте костямат ды ванстомат коське таркасо.

Лопанть анокстызе Надежда Кеняйкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».