Вторник, марта 19, 2024
Важное

«… Растениеводствань отраслясонть минек туртов васень тевесь – пурнамс малав 1,5 млн. тоннат сюро. Тень туртов эрьва гектарсто саема малав 30 центнерт ды сюротнень алов моданть ламолгавтомс 500 тёжат гектарс. Минь сынек мельс, весементь кастомс эстенек, таштамс кором, сырья ды а ваномс кинь-бути мель.

Ветеринарной службанок виев, секскак аравтано задача – велень хозяйствань продукциянь нолдамонть туртов ве ёндо а усксемс сырья. Мелят васенцеде саинек малав 80 тёжат тоннат оень культурат (тень ютксо 42 тёжат тоннат рапс, 26 тоннат соя, 6,5 тёжат тоннат лияназ). Весе производительтнень тердян кемекстамс кормовой базанть эсь вийсэ.  Эстенек нолдамс комбикоромт, заводонок важодевельть ансяк эсь продукциясо».(МР-нь Прявтонть В.Д.Волковонь МР-нь Госсобраниянтень Кучомасто).

– МР-нь Прявтонть Владимир Дмитриевич Волковонь Кучомасонть ёвтазь мельтнень-арсематнень совавтано эрямос, – толкови  «Сабанчеевское» велень  хозяйствань предприятиянь прявтось Д.Н.Игушкин. – Минек хозяйствасо важодицятне нейке анокт лисемс тундонь паксясо тевтнень топавтомо. Анокстынек сатышка видьмекст, удобрения. Тракторонь-машинань парксо прядовома лангсо техникань витнемась. Ютазь субутасто ютавтынек покш промкс, ков сакшность трактористтнэ, шофертнэ, тинге лангсо важодицятне, сетне, кить кемекстазь тундонь-паксянь тевтнень марто. Вейсэ толковинек кие, косо карми важодеме, кодат тевть карми топавтомо ды истя седе тов.«Сабанчеевское» велень хозяйствань предприятиянь прявтонть Д.Н.Игушкинэнь валонзо коряс, тедеде сюротнень алов явовить колмо тёжадо ламо гектарт мода, ламбамо якстерькаенть алов – 2 тёжат 300 гектарт, силосокс кукурузанть алов – 800 гектарт, зёрнакс  кукурузанть алов – 200 гектарт. Истя жо видеви рапс, кснав ды истя седе тов.Тешкстасынек, ламбамо якстерькаень видеме лисить 6 комплекст, сюронь – 8 комлекст.  Кода свал, сюронь видеме кармить С.И.Фадеев, Н.Д.Иневаткин, В.И.Учеваткин, А.Н.Федоров, А.Н.Виряскин, М.Ф.Удалов, Ю.А.Учеваткин, В.И.Понетайкин.

Кеме нежеть

Ламбамо якстерькай эрьва иестэ виднить В.П.Федотов, В.М.Пшеничников, В.Д.Иневаткин, А.С.Гуров, А.Г.Чепухин, А.А.Беляев. Видеманть мельга кеместэ карми ваномо растениеводствань коряс прявтонь полавтыцясь В.С.Кочурина.

Вера Сергеевна те тевенть топавты аволь умок. Икеле важодсь Отяжелень райононь администрациясо. Те а корты седе, агрономонь тевенть а содасы. Мекевланк, сон эсь тевень алкуксонь специалист. В.С.Кочурина нурька шкас тонавтнинзе «Сабанчеевское» велень хозяйствань предприятиянь паксятнень, косо седе ламо чачи сюро эли шуж. Ламо урожаень саемга, ушодксонзо коряс эрьва иестэ полавтневить ламбамо якстерькаень паксятне.Вера Сергеевна сеске кель-вал мусь аволь ансяк хозяйствань прявттнэнь, истя жо тесэ весе важодицятнень марто.

– Вера Сергеевна кеме нежем, – тешкстась велень хозяйствань прявтось Д.Н.Игушкин. – Мелят эрьва гектарсто саинек 34,5 центнерт сюро, весемезэ лиссь 16 тёжат 890 тоннат. Удалась ламбамо якстерькаеськак. Эрьва гектарсто пурназель 438 центнерт. Весемезэ «Ромодановосахар» предприятияв ильтязь 108 тёжат тоннат ламбамо якстерькай. Теньсэ, нама, покш таликазо прявт агрономонть Вера Сергеевна Кочуринань.

«Сабанчеевское» велень хозяйствань предприятиянь прявтонть Д.Н.Игушкинэнь кеме нежензэ – управляющейтне А.Н.Камашев ды Н.Б.Игушкин. Сынь весементь теить мельгаст кемекстазь велетнесэ: Дюркинасо, Аловелесэ, Сабанцелесэ, Таразбуесэ, Алашеевкасо эрямонть вадрялгавтомга. Кудотнесэ улезэ сатышка кши, велень хозяйствань продукция. Ды, нама, рана валске эрицятненень улевель ков молемс важодеме.

Изнявкстнэ кецявтыть

Тешкстасынек, «Сабанчеевское» велень хозяйствань предприятиясо важодицятне мелят виевстэ тевест топавтсть. Истя, миезь 7 тёжат 200 тоннат ловсо, эрьва скалсто потявтозь 7 тёжат 160 килограммат, мезесь манынь коряс седе ламо.

– Мелят выручкась лиссь 430 миллионт 600 тёжат целковойть, – видькстась хозяйствань прявтось Д.Н.Игушкин. – Прибылесь кармась 81 миллион 250 тёжат целковойть. Те пек ламо манынь коряс. Хозяйстваванть зарплатась – 25 тёжат 500 целковойть. Тень лангс апак вано, изнявкстнэнь лангс а лотксетяно. Аволь умок Мордовиянь Технопарксо МР-нь Прявтось Владимир Дмитриевич Волков ютавтсь республикань агропромышленной комплексэнть виевгавтомга промкс. Тосо сон тердсь велень хозяйствань предприятиянь прявттнэнь покшолгавтомс велесэ важодицятнень зарплатаст.  Зарплатась улезэ – 31 тёжа 500 целковойть. Минь весементь тейсынек хозяйствасонть важодицятнень зарплатаст кастомга.Апак кавтолдо мертяно, те тевесь карми топавтозь. Тесэ варма мельга валт а ёртнить.

Тесэ витнить тракторт

…… Сабанцеле велень тракторонь-машинань паркось. Минек лембестэ  вастымизь механикесь П.В.Суняйкин.

– Тесэ виевстэ моли тракторонь, автомашинань витнемась, – ёвтни Петр Васильевич. – А течи-ванды анокт кармить лисемс паксяв кавксо МТЗ-1221 трактортнэ, «Джон-Дир» тракторось. Сынст витнить трактористтнэ Александр Федоров, Александр Аньчков, Анатолий Данилов. Тесэ истя жо витнить эсь «КамАЗ» автомашинаст М.М.Палькин, В.Г.Саврушкин, ялакстнэ В.П. ды А.П.Федотовтне. Запасной пельксэнь коряс кодаткак стакачить а содатано.Механикенть П.В.Суняйкинэнь валонзо коряс, автомашинань витнемантень покш мель яви шоферэсь А.П.Федотов. Сон а соды ютко шкаяк.Тешкстасынек, А.П.Федотов тескень, Сабанцелень. «Сабанчеевское» велень хозяйствань предприятиясо важоди 2019 иень сентябрясто саезь. Икеле 40 иеть важодсь Саратовань областень Энгельс ошсо.

– Кода иля корта, тиринь ёнксонь пертьпельксэнь мазычитне изнясть, – ёвтни Александр Петрович. – Велявтынь эсень тиринь ёнксов. Ды овсе а янксян. Тесэ ули важодема таркам, тесэ монень содавикс эрьва лушмось. Муинь ламо од ялгат

.… Сабанцеле велестэ сыргинек мельспаросо. Течияк тосонь ломантне тевест топавтыть седейшкава.  Сынь содыть, ансяк виевстэ важодезь, таштавить изнявкстнэ.Петр ЗиновьевФототне Эдуард Ретунскоень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».