Суббота, сентября 26, 2020
Важное



Неень шкасто, зярдо весень лангс прась покш кажо - педиця ормась, коронавирусось, седе сеедьстэ карминек арсеме медицинадонть.



Карминек ледстнеме седе, кодамо мель ломантнень шумбрачист ванстоманть лангс явсть икеле, кодамо явить ней. А карман васов якамо, токаса ансяк Кочкурбуень Сурвеленть (Сабаеванть). Ушодан се шкастонть, зярдо велесэнек панжозель фельдшерэнь-акушерэнь пункт. Те ульнесь ютазь пингень 1930-це иетнестэ. Сонзэ прявтсоль эсенек велень тейтересь Белявкина Елизавета Ефимовна. Сондензэ ды седе, кода Сабаева велесэ теезель ды панжозель больницясь, ёвтнесь тенек Елизавета Ефимовнань цёразо - Валерий Тарасович Фомичев, технической наукань докторось, профессорось, Российской Федерациянь наукань заслуженной деятелесь. В.Т.Фомичев ламо иень перть важодсь ды нейгак важоди Волгоградонь архитектурно-строительной университетсэ. Волгоградсо эрязьгак, а стувтни чачома велензэ. Сонзэ марто вастневинек, зярдо пачколинь Волгоградов. Мейле сонськак сакшнось Саранскоев. Те шкас кирдтяно сюлмавкст, сёрмалетяно карадо-каршо сёрминеть Интернетэнть вельде.


Вана мезе ёвтнесь В.Т.Фомичев се шкадонть, зярдо Сурвелесэ панжозель велень больницясь, косо важодсть сонзэ авазо ды тетязо: «1935 иестэ Саранскоень Московской куросо медтехникумсонть панжозель фельдшерэнь-акушерэнь школа. Тов тонавтнеме сайсть васняяк од тейтерть, кить прядсть 9 класст. Тов молемс мель сайсь Сабаевасто од тейтересь Елизавета Белявкинаяк. Те ульнесь монь авам. 1938 иестэ сон велявтсь Сабаевав. Путызь фельдшерэнь-акушерэнь пунктонь прявтокс. Кавто иень ютазь (1940 иестэ) Сабаевасо ушодсть од больницянь стявтомо. Од кудось покшоль ды кувакаль. Чапозель чувтонь чочкосто, уштневсь пенгесэ. Эйсэнзэ ве шкасто лецявсть 25 сэредицят. Тоско удсестькак, ярснестькак. Сакшныльть аволь ансяк Сурвелестэ, шабра велетнестэяк: Давыдвелестэ, Кацялайстэ, Тат.Умысстэ, Мураньстэ ды натой Кочкурвелестэяк. (Те кудосонть моненьгак савсь аштемс вишкинестэ - Р.Щ.) Сонзэ прявтокс Саратовань медицинской институтонть прядомадо мейле кучозель Тарас Григорьевич Фомичев. Кавто од ломантне тусть вейке-вейкень мельс ды 1941 иестэ вейсэндизь эрямост.

1942 иестэ тетям Т.Г.Фомичев тусь фронтов. Украинской фрононь 3-це десантной гвардейской дивизиянть марто пансь ятонть эйсэ Италиянть видьс пачкодемс, олякстомтсь Украинанть, Молдавиянть, Румыниянть, Венгриянть, Словакиянть, Югославиянть, Австриянть. Кудов велявтсь 1946 иестэ.

Ськамонзо кадовозь, авам, Елизавета Ефимовна, топавтсь врачонь, фельдшерэнь ды акушерэнь тевтнень. Стака ней ёвтамс, зяро эйкакшт чачсть сонзэ кедь лангс. Мейле чачтсь сонськак. Те ульнесь, зярдо немецтне панезельть Сталинградсто (1943 иестэ) ды ков мейле эрямо сынь монгак. Мельган састь тетям-авам. Но Сабаевась - монь чачома велем, седейпельксэм».

Седе тов Валерий Тарасович сёрмадсь, кода 1950 иестэ сынь тусть эрямо Кочкуровав. Тосо 1936 иестэ госпланонь проектэнь коряс строязель райононь больницясь. Эйсэнзэ, амбулаториядонть, лецямонь кудотнеде башка, стявтозельть кудот врачтнень ды больницясо лия важодицятнень туртов. Кочкуровасо больницясь ней истя жо пекстазь. Кадсть ансяк поликлиника. Тосонь сыре ломантне, кинень савсь пшкалемс лезкс мельга, Елизавета Ефимовна ды Тарас Григорьевич Фомичевтнень нейгак ледстнить паро валсо.

Войнадо мейле Сабаевань больницяв састь од врачт. Ютксост О.Ф. Черных, кона ютась войнань толонть пачк. Лиссь мирденень минек велень цёра экшс ды сась мельганзо чачома велезэнзэ. Ольга Фёдоровнань Сурвелесэ пек вечкилизь. Нейгак сеедьстэ ледстнить эйсэнзэ аволь ансяк сыре ломантне, сынст эйкакшост ды нуцькасткак, ды сонзэ лемс ёвтыть сюконямо валт.

Мейле врачтне полавтневсть апак лотксе. Ламо иеть ломантнень шумбрачист ванстомантень макссь A.А.Майер. Шкань ютазь (70-це иетнестэ) Сурвелесэ панжозель чачтома кудо, косо вансть покш пекесэ аватнень шумбрачист мельга, лездасть эйкакштнень чачтомсто. Кавто кудотнень ваксс стявтсть таго вейке - кирьпецень. Тосо аштесть врачось ды медсестрась, вастсть васенцеде сыця сэредицятнень, ванкшность эйсэст, сень содамга, мейсэ ды кодамо ормасо сынь сэредить. Сындест башка больницясо ульнесть лия лецицят, сэредицятнень мельга ваныцят, ярсамопелень пидицят, кияксонь шлицят-нардыцят. Коллективсэнть лововсть комсь ды седеяк ламо ломанть. Ютазь пингень 70-це иетнестэ Сабаевань больницясо врачокс ульнесть А.Н.Уланов, сондензэ мейле В.А. Сардаев, 1991 иестэ - B.Н. Падеров.

Сабаевань больницясо медсазоронь тевть кувать топавтсть Гудкова (Пищикова) Нина Сергеевна (45 иеть), Тулупова (Гангеева) Серафима Михайловна (43 иеть) ды лият.

Сурвелесэ кармить тееме од ФАП

Сурвелесэ лецямонь кудось, кона стявтозель 1940 иестэ, ней арась. Кадозь ансяк амбулаториясь,косо, сахаронь ды давлениянь онкстнема прибортнэде башка, лия кодамояк медицинской оборудования арась.

Ялатеке, кода мерсь тосо важодицясь, медсазорось Валентина Ромашкина (сондензэ башка ули таго вейке медсазор - эйкакшонь), ормалгадыцянть
лезкстэме а кадсызь. Эрявиндеряй путомс укол - тейсызь. Тердить «скоройгак» (таго-зярдо больницянть ульнесь эсензэ машиназо - Р.Щ.). Текень пес пачтясь тенек кенярксов куля: Сабаевасо арсить стявтомс фельдшерэнь-акушерэнь од пункт.

Те кулянть кемевтемга пшкадинек Кочкуровань райононь поликлиникань прявтонь тевтнень топавтыцянтень Р.Г.Начаркинанень. Раиса Григорьевна кенярдовтымизь седеяк пек. Келя, Сабаевасо ФАП-нть арсить панжомс уш таштамковонь (сентябрянь) 30-це чистэнть. Те тееви шумбрачинь ванстомань нацпроектэнть топавтомга. ФАП-сонть карми улеме весе се оборудованиясь, кодамо эряви ломантнень шумбрачист содамонть, орматнень лангс ливтеманть туртов. Башка таркат улить явозь терапевтэнтень, фельдшерэнтень, медсазоронтень.

Авань орматнень содамга карми сакшномо гинеколог. Диспансеризациянь ютавтомаськак седе шождалгады. Коронавирусонть кувалма сон апрельстэ лоткавтозель. Икеле сон ютавтневсь амбулаториясо, кона ашти веленть лия песэ. Се таркась аволь маласо. Секс ломантненень стака ульнесь пачкодемс тов. Кода мерсь Р.Г.Начаркина, ней ФАП-нть туртов Кочкуровань администрациясь явсь пек паро тарка - веленть куншкасо, почтанть икеле. Диспансеризациясь тедеде ушодови неть читнестэ. Эйзэнзэ тердевить сеть ломантне, кинень эзть топоде 65 иеть ды кинь арась умонь шкань (хронической) ормазо. Зярс сон карми молеме Кочкуровань поликлиникасо.

Седеяк паро улевель, ФАП-нтень панжиндерявольть аптекаяк. Икеле аптекатнеде кавтольть. Ней вейксэ вайгельбень кувалмосо велесэ арась вейкеяк. Келя, «аптекатне а идить пряст», лиякс мерезь, арась пельдест покш ярмакт (доход).

Раиса ЩАНКИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».