Покш Березникень райононь Парынзэлесэ неть оймсема читнестэ ютавтозель «Ашо лисьма» кенярксчи, конась алтазель Семиянь, вечкемань ды кемемань чинтень.
Мероприятиясь мольсь кезэрень «Ашо лисьманть» вакссо, конантень покштятне-сырькайтне икелень шкатнестэ сакшность озномо, эстест да малавиксэст туртов паро уцяскань вешеме.
Кенярксчисэнть теезельть эрьва кодат площадкат. Неть: «Тюштянь налксемат», косо эрьвантень меревсь невтемс ёрокчинть эрзянь налксематнесэ; эйкакштнень туртов аравтозельть батутт, нурямот, микшневсь ламбамо вата; площадкатнестэ вейкесэнть пурнавозтне каванявсть тантей ярсамопельде, симдевсть брагадо ды чайде; важодсь кенярксчинь фотозона; истя жо ульнесть «Военно-патриотической воспитаниянь» ды «Служба по контракту», «Фольклорно-обрядовой» площадкат, важодсть микшнемань павильонт.
Кенярксчинтень пурнавозтненень шумбракстнемань вал марто пшкадекшнесть Покш Березникень муниципальной райононь прявтось Иван Иванович Игонов, конась истя жо макссь казнеть райононь сеть семиятненень, кить вейсэ эрить ламо иень перть, МР-нь Культурань, национальной политикань ды архивень тевень министрань васенце полавтыцясь Александр Иванович Карьгин, МР-нь Госсобраниянь депутатось Евгений Евгеньевич Ледяйкин, Орданьбуень ды Отяжелень районтнэнь Владыкась Вениамин.
Паро ёжомарямо сыцятненень казсть Покш Березникень райононь Культурно-досуговой центрань важодицятне ды художественной самодеятельностень участниктне, инжетне – «Вастома» фольклорной ансамблясь, «Бред Бит» эстрадань кавер-группась ды республикасонть весенень содавикс Андрей Бочканов морыцясь. «Ашо лисьма» кенярксчись прядовкшнось дискотекасо.
Эряви тешкстамс, кенярксчись ютавтовсь Культурань инициативатнень Президентэнь фондонть лезксэнзэ вельде.