Орданьбуень райононь Чукало велесь ашти аволь пек васоло райононь куншкакуронть эйстэ, мазыйдеяк мазый таркасо. Велесь аволь вишкинетнестэ, эрямось моли эсь лувсо, ломантне котьмить эрьва чинь тевсэст ды кемить вандынь паро эрямонтень.
Аволь умок минь содавтынек те эрзянь веленть ды кортнинек тесэнь администрациянь прявтонть Игорь Алексеевич Михайлов марто. Игорь Алексеевич ёвтнесь веленть течинь эрямодонзо ды сы шкантень мельтнеде-арсематнеде.
– Минек Чукалонь администрациянть юрс совить кавто велеть – сонсь Чукалось ды шабра рузонь Жарёнки велесь, – ёвтни Игорь Алексеевич. – Велетне маласот, эрицятнеяк уш весе вейс сюлмавозь, Жарёнкасо улить эрзяткак. Эрицятнеде поселениясонть весемезэ лововить 900 ломанть.
Эряви меремс, Игорь Михайлов сонськак Жарёнкань. Велень поселениянь прявтокс роботы малав кавто иеть.
– Теде икеле ламо косо роботамс савсь. Зярыя иеть Московов ардтнинь. Лиякс ульнесь а кода, – корты Игорь Михайлов. – Мейле пшкадсть тень варчамс виень велень администрациянь прявтокс. Арсия ды карминь. Вана роботан. Нама, неень роботам икеленсетнень коряс пек явови. Ней монь роботась седе пек сюлмавозь ломантнень марто – свалшкань вастовомат, кортамот, пеняцямотнень ды мелявкстнэнь решамот.
Роботась моли кода республикань ламот лия велетнесэяк. Куш кодамо тевень ды кевкстемань коряс эрицятне чиить прявтонтень. Кода тешксты Игорь Михайлов, седе сеедьстэ велень эрицятне пеняцить эсь шабратнень лангс: веенстнэнь модаст эзь явово, лиянтень шабранть теевксэнзэ мешить. Меельценть коряс аволь умок велень прявтонтень пшкадстькак кавто шабратне.
– Шабратненень кодаяк а явовить эсь модань участкатне. Вейке шабранть кирвазсь банязо, конась аштесь межанть лангсо. Омбоцесь пшкадсь администрацияв, банянть, келя, межастонть эряви аравтомс кемекстазь таркас (закононь коряс межас стявтомс теевкст а мереви). Банянть стявтомсто жо эсест юткова весементь кортакшнызь, кевкстемат арасельть, – ёвтни Игорь Алексеевич. – Мон ардынь тов, ускинь мартон кадастрань инженер, тонась онкстынзе межатнень, стявтсь тешкс. Лиссь, омбоце шабранть гаражозо истя жо ашти межасо. Сынь жо вейкест-вейкест ютксо кодаяк а ладить. Истямо тевсэ сехте прявтось – муемс весень туртов лисемань виде ки, штобу сыньгак вейкест-вейкест марто ладявольть ды тонгак чумокс а кадовлить. Ломантнень марто важодемасонть те сехте стакась.
Истят тевтне улить куш косо. Игорь Михайловонь валонзо видеть, ломантнень марто эряви муемс кель-вал ды эрьва мелявксонть решамс видестэ.
Чукалонь велень поселениянь роботниктне неень шкасто башка мель явить специальной военной операциянь участниктнень семиятнень марто важодемантень. Мобилизованнойть улить кода Чукалосто, истя шабра Жарёнкастояк. Сынст семиятненень максови весе эрявикс лезксэсь.
– Весе пшкадематнень коряс снартнетяно лездамс, – тешксты велень администрациянь прявтось. – Монь телефононь номерэм семиятне содасызь, бути мезе эряви, гайневтить. Ней вана аволь умок пшкадсь вейке мобилизованноенть низэ. Эрявсь бригада, конат ветить канализация. Монь истят содавиксэнь улить, гайневтинь, сынь састь ды весементь теизь. Сынст пшкадематнень коряс шканть а таргсетяно, весементь тейтяно куроксто.
Тесэ важодить национальной ды лия проекттнэнь эрямос совавтоманть коряскак. Истя, ютазь иестэ «Комплексное развитие сельских территорий» программанть лувсо од ки теезель Красноармейской ульцяванть ловсонь-товарной ферманть видьс. Икеле иестэнть «Безопасные качественные дороги» нацпроектэнть вельде од ки тейсть трассанть эйстэ веленть видьс. Китнень коряс мелявксось велесэнть аламонь-аламонь изняви.
Неень шкасто Чукало велесэ важодить школа, ФАП, Культурань кудо, почтань отделения, библиотека, лавкат. Ансяк вейкесь апаркстомты – арасть важодема таркат. Самай те тувталось панияк тесэнь эрицятнень вадря эрямонть мельга покш оштнев. Эдь семиянть эряви трямс ды од ломантне уш а бажить сюлмамс эсь эрямонть тиринь веленть марто.
– Ломантне бу эрявольть-аштевельть тиринь ёнкссо, ансяк МАПО «Ардатов» предприятиядонть башка роботамс а косо. Тосонь ферматнесэ-паксятнесэ важодить зярыя кементь ломанть. Кить-бути роботыть тесэнь учреждениятнесэ. Кой-кить ардтнить 18 вайгельбеде васоло Орданьбуе ошов, лиятне Московга-кува, – корты Игорь Алексеевич. – Школасонок маень меельце читнес тонавтнесть 35 эйкакшт, 10-це ды 11-це класстнэс якицятнень усксить Низовкав. Эряви меремс, тесэ аволь ансяк Чукалонь, Жарёнкань эйкакштнеяк. Ды те овсе аволь ламо. Иеде иес жо седеяк аламолгадыть. Те мелявксось аволь ансяк минек, райононь ды республикань лия велетнесэяк истямо лувось. Эйкакшт арасть. Ды те пек берянь.
Теньсэ парось алкукс арась. Эдь эйкакштомо ды од ломантеме велетне курок овсе ёмить. Теде мелявтыяк И. А. Михайлов. Сон сонсь ламо эйкакшонь тетя. Нинзэ марто трить-кастыть сисем эйкакшт. Вишкине цёрыньканстэнь ансяк кавксо ковт.
– Эйкакштне – покш сюпавчи. Сынь минек вандынь чинек, кемеманок, – кемексты Игорь Михайлов. – Монь койсэ, ламо эйкакшонь трямось – те аволь стакачить, мекевлангт, весемесь моли седеяк шождасто вейке-вейкень чарькодезь ды вейке-вейкенень лездазь. Мон эсь прям лован уцяскав тетякс.
Башка мель велесэнть явови культурной эрямонтень. Тесэ бажить а менстямс вейкеяк кенярксчинь мероприятия ды свал анокстыть эрицятнень туртов концертт, вастовомат. Покш мероприятият ютавтовить Авань чистэнть, Сыре ломаннень алтазь ковстонть, Од иень вастовомсто ды лия кенярксчитнестэ. Эрьва ие маень 9-це чистэ Чукалонь эрицятне пурнавкшныть войнасо чавовозтненень кеврунгонть ваксс торжественной мероприятияс, конась алтавкшны Ине Изнямонь чинтень. Весементь тень лангсо пек ламо важодить велень библиотекаресь Олеся Викторовна Кузнецова ды Культурань кудонь прявтось Любовь Ивановна Исайкина.
Культурань кудонть юрсо важодить «Театрал» драматической кужинесь ды «Вдохновение» кружокось, «Клуб любителей скандинавской ходьбы» мелень коряс клубось, косо покш мель явить эрямонь шумбра лувонтень ды кеместэ важодить кода сыретнень, истя жо од ломантнень мартояк.
Олеся Викторовна пек ламо мероприятият алты тиринь эрзянь келентень. Тесэнь эрицятне пек бажить ванстомс эсь раськень койтнень-кирдатнень, тиринь келенть. Ды культурань важодицятне тенень явить покш мель. Те ёнкссонть пек лезды Чукалонь «Эрзянь ават» народной фольклорной ансамблясь, конась эсь моротнень вельде невти эрзянь культуранть, келенть, койтнень мазычист ды сюпавчист. Ансяк вана клубось веши одкстомтома, те Чукало велень эрицятнень умонь мелявкс, конась кодаяк а решави.
Чукалосо эрить тевень вечкиця ды панжадо седей ломанть. Сынь ванстыть эсь раськень койтнень-кирдатнень ды теить весементь эсь веленть ванстомга ды сонзэ виевгавтомга.
Юлия ЕРЕМИНА